കാനഡയില്‍ രക്തദാനത്തില്‍ വന്‍ ഇടിവ്; പൗരന്മാര്‍ മുന്നോട്ട് വരണമെന്ന് കനേഡിയന്‍ ബ്ലഡ് സര്‍വീസസ്

ഓട്ടവ: കാനഡയില്‍ രക്തദാനം ചെയ്യുന്നവരുടെ എണ്ണത്തില്‍ വന്‍ കുറവ്.
പൗരന്മാര്‍ അടിയന്തരമായി രക്തദാനം നടത്തണമെന്ന് കനേഡിയന്‍ ബ്ലഡ് സര്‍വീസസ് (Canadian Blood Services) അഭ്യര്‍ത്ഥിച്ചു. ജൂണ്‍ 1 മുതല്‍ രാജ്യത്തെ രക്തശേഖരത്തില്‍ ഏകദേശം 20 ശതമാനത്തോളം കുറവുണ്ടായതായി അധികൃതര്‍ അറിയിച്ചു. കെബെക് ഒഴികെയുള്ള കനേഡിയന്‍ പ്രവിശ്യകളില്‍ രക്തവിതരണം നിയന്ത്രിക്കുന്ന സംഘടനയാണ് കനേഡിയന്‍ ബ്ലഡ് സര്‍വീസസ്.

നിലവില്‍ പല ബ്ലഡ് ഗ്രൂപ്പുകളുടെയും ശേഖരം ഏതാനും ദിവസത്തേക്ക് മാത്രമുള്ള അളവിലേക്ക് ചുരുങ്ങിയിരിക്കുകയാണ്. ആശുപത്രികളുടെ ആവശ്യകത നിറവേറ്റുന്നതിനായി പ്രതിവാരം പതിനെട്ടായിരത്തോളം (18,000) രക്തദാന അപ്പോയിന്റ്‌മെന്റുകളാണ് കനേഡിയന്‍ ബ്ലഡ് സര്‍വീസസിന് ആവശ്യമുള്ളത്. എന്നാല്‍ ജൂണ്‍ തുടക്കം മുതല്‍ ഓരോ ആഴ്ചയിലും 1,500 മുതല്‍ 2,500 വരെ അപ്പോയിന്റ്‌മെന്റുകളുടെ കുറവാണ് രേഖപ്പെടുത്തുന്നത്.

വേനല്‍ക്കാലത്ത് രക്തദാനത്തില്‍ കുറവുണ്ടാകാറുണ്ടെങ്കിലും, ഇത്തവണ പ്രതീക്ഷിച്ചതിലും വലിയ തോതിലുള്ള ഇടിവാണ് സംഭവിച്ചിരിക്കുന്നത്. ഓഗസ്റ്റ് മാസത്തിലെ ദീര്‍ഘകാല വാരാന്ത്യ അവധി (August long weekend) മുന്നില്‍ക്കണ്ട്, അപകട കേസുകളും അടിയന്തര ചികിത്സാ ആവശ്യങ്ങളും വര്‍ദ്ധിക്കാന്‍ സാധ്യതയുള്ളതിനാല്‍ എല്ലാ ബ്ലഡ് ഗ്രൂപ്പുകളില്‍പ്പെട്ടവരും മുന്നോട്ടുവരണമെന്ന് വികസന വിഭാഗം ഡയറക്ടര്‍ റയാന്‍ ആസും വൈസ് പ്രസിഡന്റ് റോണ്‍ വെസിനയും വ്യക്തമാക്കി. ശേഖരിക്കുന്ന രക്തത്തിന്റെ ആയുസ്സ് (Shelf life) 42 ദിവസം മാത്രമായതിനാല്‍ നിരന്തരമായ ശേഖരണം അത്യന്താപേക്ഷിതമാണ്.

നിലവിലെ പ്രതിസന്ധി പരിഹരിക്കാന്‍ വാരാന്ത്യങ്ങളിലുള്‍പ്പെടെ കൂടുതല്‍ അപ്പോയിന്റ്‌മെന്റുകള്‍ ക്രമീകരിക്കാനും പ്ലാസ്മ ദാന കേന്ദ്രങ്ങളില്‍ നേരിട്ടുള്ള രക്തദാനത്തിന് സൗകര്യമൊരുക്കാനും സംഘടന തീരുമാനിച്ചിട്ടുണ്ട്. സമാനമായി കെബെക് പ്രവിശ്യയിലെ ‘ഹെമ-കെബെക്’ (Hema-Quebec) കേന്ദ്രങ്ങളിലും രക്തശേഖരത്തില്‍ കുറവ് അനുഭവപ്പെടുന്നുണ്ട്. ആവശ്യക്കാര്‍ക്ക് blood.ca വെബ്സൈറ്റ് വഴിയോ, GiveBlood ആപ്പ് വഴിയോ 1-888-2-DONATE എന്ന നമ്പറിലോ ബന്ധപ്പെട്ട് അപ്പോയിന്റ്‌മെന്റുകള്‍ ബുക്ക് ചെയ്യാവുന്നതാണ്.