ഓട്ടവ: വടക്കൻ ഒന്റാരിയോയിലെ ക്രോഫോർഡ് നിക്കൽ പദ്ധതിക്ക് (Crawford Nickel Project) ഫെഡറൽ സർക്കാർ അനുമതി നൽകി. പരിസ്ഥിതി, കാലാവസ്ഥ വ്യതിയാന മന്ത്രാലയത്തിന്റെ അനുകൂല തീരുമാനപ്രസ്താവനയാണ് ഇപ്പോൾ പുറത്തുവന്നിരിക്കുന്നത്. 2019-ലെ ഭേദഗതി വരുത്തിയ ഇംപാക്ട് അസസ്മെന്റ് ആക്ട് പ്രകാരം അനുമതി ലഭിക്കുന്ന ആദ്യത്തെ ഖനന പദ്ധതിയാണിത്. പദ്ധതിയിലൂടെ നിർമാണഘട്ടത്തിൽ 5,000 തൊഴിലവസരങ്ങളും പ്രവർത്തനം ആരംഭിച്ച ശേഷം 1,300 സ്ഥിരം തൊഴിലവസരങ്ങളും സൃഷ്ടിക്കുമെന്ന് സർക്കാർ അറിയിച്ചു.
ടിമിൻസിന് വടക്കായി ഏകദേശം 42 കിലോമീറ്റർ അകലെയുള്ള തുറന്ന ഖനന (ഓപ്പൺ-പിറ്റ്) രീതിയിലുള്ള നിക്കൽ-കോബാൾട്ട് ഖനിയാണിത്. പ്രതിവർഷം ഏകദേശം 9 കോടി ടൺ ധാതു വേർതിരിച്ചെടുക്കാൻ ശേഷിയുള്ള പദ്ധതി 41 വർഷത്തെ പ്രവർത്തനകാലയളവിൽ കാനഡയുടെ സമ്പദ്വ്യവസ്ഥയ്ക്ക് ഏകദേശം 70 ബില്യൺ കനേഡിയൻ ഡോളറിന്റെ സംഭാവന നൽകുമെന്നാണ് വിലയിരുത്തൽ.
പ്രധാനമന്ത്രി മാർക്ക് കാർണിയുടെ പുതിയ പ്രോജക്ട് അനുമതി സംവിധാനമായ മേജർ പ്രോജക്ട്സ് ഓഫീസ് (Major Projects Office) വഴി അംഗീകാരം ലഭിക്കുന്ന ആദ്യ ഖനി പദ്ധതിയെന്ന പ്രത്യേകതയും ക്രോഫോർഡ് പദ്ധതിക്കുണ്ട്.
പരിസ്ഥിതി ആശങ്കകൾക്കിടയിലും അനുമതി
പദ്ധതി മത്സ്യ-പക്ഷി ആവാസവ്യവസ്ഥ, ജലനിലവാരം, തദ്ദേശീയ ആദിവാസി സമൂഹങ്ങൾ, കാനഡയുടെ കാലാവസ്ഥാ ലക്ഷ്യങ്ങൾ എന്നിവയെ പ്രതികൂലമായി ബാധിക്കാമെന്ന് പരിസ്ഥിതി വിലയിരുത്തൽ റിപ്പോർട്ട് ചൂണ്ടിക്കാട്ടിയിരുന്നു. എന്നിരുന്നാലും, പദ്ധതിയിലൂടെ രാജ്യത്തിന് ലഭിക്കുന്ന സാമ്പത്തികവും സാമൂഹികവുമായ നേട്ടങ്ങൾ പരിഗണിച്ചാണ് അനുമതി നൽകിയതെന്ന് പരിസ്ഥിതി മന്ത്രി ജൂലി ഡബ്രൂസിൻ വ്യക്തമാക്കി.
അതേസമയം, ഖനി പ്രവർത്തിക്കുന്ന മുഴുവൻ കാലയളവിലും പാലിക്കേണ്ട നിരവധി നിയമപരമായ നിബന്ധനകളും നിയന്ത്രണങ്ങളും സർക്കാർ ഏർപ്പെടുത്തിയിട്ടുണ്ട്. തദ്ദേശീയ സമൂഹങ്ങളുടെ ആരോഗ്യവും ജീവിതോപാധിയും സാംസ്കാരിക പൈതൃകവും പരമ്പരാഗത ഭൂവിനിയോഗവും സംരക്ഷിക്കുന്നതിനുള്ള നടപടികൾ പദ്ധതിയുടെ ഭാഗമാക്കണമെന്നും നിർദേശിച്ചിട്ടുണ്ട്.
മാലിന്യ സംസ്കരണത്തിനും കർശന വ്യവസ്ഥകൾ
ഖനനത്തിൽ നിന്നുള്ള അവശിഷ്ടങ്ങൾ സുരക്ഷിതമായി കൈകാര്യം ചെയ്യുന്നതിനായി പ്രത്യേക ടെയിലിങ്സ് മാനേജ്മെന്റ് സംവിധാനം സ്ഥാപിക്കുകയും പദ്ധതിയുടെ മുഴുവൻ കാലയളവിലും അതിന്റെ സുരക്ഷ ഉറപ്പാക്കുകയും വേണം.
പദ്ധതിക്ക് അനുമതി ലഭിച്ചതോടെ എഞ്ചിനീയറിങ് രൂപകൽപ്പന, ധനസമാഹരണം, നിർമാണം ആരംഭിക്കാൻ ആവശ്യമായ പ്രവിശ്യാ-ഫെഡറൽ അനുമതികൾ എന്നിവ നേടാനുള്ള നടപടികളുമായി മുന്നോട്ടുപോകുമെന്ന് കാനഡ നിക്കൽ കമ്പനി അറിയിച്ചു .2027-ൽ അന്തിമ നിർമ്മാണ തീരുമാനം ഉണ്ടാകുമെന്നാണ് കമ്പനി പ്രതീക്ഷിക്കുന്നത്. നിർണായക ധാതുക്കളുടെ ഉത്തരവാദിത്തപരമായ വികസനത്തിനുള്ള മാതൃകയാണ് ഈ പദ്ധതിയെന്ന് കമ്പനിയുടെ സി.ഇ.ഒ മാർക്ക് സെൽബി അഭിപ്രായപ്പെട്ടു.
