ലണ്ടന്: യുകെയിലെ പ്രമുഖ തീരദേശങ്ങളില് അത്ഭുതവും ആശങ്കയും സൃഷ്ടിച്ച് നീല നിറത്തിലുള്ള ലക്ഷക്കണക്കിന് കടല്ജീവികള് വന്തോതില് കരയ്ക്കടിയുന്നു. തെളിഞ്ഞ ഇലക്ട്രിക് ബ്ലൂ (Electric Blue) നിറത്തിലുള്ള ഈ അപൂര്വ്വ ജീവികള് ഇംഗ്ലണ്ടിലെ കംബ്രിയയിലുള്ള സെന്റ് ബീസ് (St Bees) ബീച്ചിലാണ് ഏറ്റവും ഒടുവിലായി റിപ്പോര്ട്ട് ചെയ്യപ്പെട്ടത്. നേരത്തെ വെയില്സ് തീരങ്ങളിലും സമാനമായ രീതിയില് ഇവ പ്രത്യക്ഷപ്പെട്ടിരുന്നു. കഴിഞ്ഞ ഒരു പതിറ്റാണ്ടിനിടയില് യുകെ തീരങ്ങളില് കാണപ്പെടുന്ന ഏറ്റവും വലിയ കരയ്ക്കടിയല് സംഭവങ്ങളിലൊന്നാണിതെന്ന് സമുദ്ര ഗവേഷകരും ചൂണ്ടിക്കാണിക്കുന്നു.
കാഴ്ചയില് ജെല്ലിഫിഷുകളോട് സാദൃശ്യമുണ്ടെങ്കിലും ശാസ്ത്രീയമായി ‘വെലെല്ല വെലെല്ല’ (Velella velella) അഥവാ ‘ബൈ-ദി-വിന്ഡ് സെയിലേഴ്സ്’ (By-the-wind sailors) എന്നറിയപ്പെടുന്ന ഇവ യഥാര്ത്ഥത്തില് ജെല്ലിഫിഷുകളല്ല. ആയിരക്കണക്കിന് കുഞ്ഞു ജീവികള് ഒന്നിച്ചു ജീവിക്കുകയും പ്രവര്ത്തിക്കുകയും ചെയ്യുന്ന ‘കൊളോണിയല് ഹൈഡ്രോയിഡുകള്’ (Colonial Hydrozoans) എന്ന വര്ഗ്ഗത്തില്പ്പെട്ട ജീവികളാണിവ. ഏകദേശം രണ്ട് ഇഞ്ച് (5 സെന്റീമീറ്റര്) മാത്രം വലിപ്പമുള്ള ഇവയുടെ ശരീരത്തിന് മുകളിലായി പായമരത്തിന് സമാനമായ സുതാര്യമായ ഭാഗമുണ്ട്. കാറ്റിന്റെ ഗതിക്കനുസരിച്ച് കടല് ഉപരിതലത്തില് സഞ്ചരിക്കാന് ഇവയെ സഹായിക്കുന്നത് ഈ ഭാഗമാണ്.
കടലില് വീശിയടിച്ച ശക്തമായ കാറ്റിലും അസാധാരണമായ ചൂടിലും പെട്ടാണ് ഇവ കൂട്ടത്തോടെ തീരത്തേക്ക് ഒഴുകിയെത്തിയത്. ആഗോളതലത്തില് അനുഭവപ്പെടുന്ന കാലാവസ്ഥാ വ്യതിയാനവും സമുദ്രത്തിലെ താപനിലയിലുണ്ടായ മാറ്റങ്ങളുമാണ് ഇതിന് പിന്നിലെ പ്രധാന കാരണമെന്ന് വിദഗ്ധര് സംശയിക്കുന്നു. തൊടുമ്പോള് ചെറിയ രീതിയില് ചൊറിച്ചില് ഉണ്ടാക്കാന് സാധ്യതയുള്ളതിനാല് ബീച്ചിലെത്തുന്നവര് ഇവയെ സ്പര്ശിക്കരുതെന്നും ജാഗ്രത പാലിക്കണമെന്നും അധികൃതര് നിര്ദ്ദേശിച്ചിട്ടുണ്ട്.
