ഓട്ടവ: കാനഡയിലെ ‘ട്രാന്സ് മൗണ്ടന്’ (Trans Mountain) പൈപ്പ്ലൈന് തന്ത്രപ്രധാനമായ ഒരു ദേശീയ ആസ്തിയാണെന്നും, അതിന്റെ ഉടമസ്ഥാവകാശം ഫെഡറല് സര്ക്കാര് തന്നെ നിലനിര്ത്തണമെന്നും ഭൂരിഭാഗം കാനഡക്കാരും ആഗ്രഹിക്കുന്നതായി പുതിയ സര്വേ ഫലം. ആംഗസ് റീഡ് ഇന്സ്റ്റിറ്റ്യൂട്ട് (Angus Reid Institute) പുറത്തുവിട്ട പുതിയ അഭിപ്രായസര്വേയില് പങ്കെടുത്ത 54 ശതമാനം ആളുകളും പൈപ്പ്ലൈന് സര്ക്കാരിന്റെ ഉടമസ്ഥതയില് തന്നെ തുടരണമെന്ന അഭിപ്രായക്കാരാണ്.
നികുതിദായകരുടെ പണം തിരികെ പിടിക്കുന്നതിനായി പൈപ്പ്ലൈന് സ്വകാര്യ മേഖലയ്ക്ക് വില്ക്കണമെന്ന് 23 ശതമാനം പേര് അഭിപ്രായപ്പെട്ടപ്പോള്, ബാക്കി 23 ശതമാനം പേര് ഇക്കാര്യത്തില് കൃത്യമായ നിലപാട് വ്യക്തമാക്കിയില്ല. കാനഡയുടെ ഊര്ജ്ജ കയറ്റുമതി വിപുലീകരിക്കുന്നതില് ഈ പൈപ്പ്ലൈന് നിര്ണായക പങ്കുവഹിക്കുമെന്നാണ് വ്യവസായ പ്രമുഖരുടെ വിലയിരുത്തല്. 2018-ല് സര്ക്കാര് പൈപ്പ്ലൈന് ഏറ്റെടുത്ത തീരുമാനത്തെ പിന്തുണയ്ക്കുന്നവരുടെ എണ്ണത്തിലും വര്ധനവുണ്ടായിട്ടുണ്ട്. 2025 ഫെബ്രുവരിയില് 34 ശതമാനം പേര് മാത്രമാണ് ഈ തീരുമാനത്തെ പിന്തുണച്ചിരുന്നതെങ്കില്, നിലവിലിത് 42 ശതമാനമായി ഉയര്ന്നു.
കൂടാതെ, സര്ക്കാരുകള് പൈപ്പ്ലൈനുകളില് നിക്ഷേപം നടത്തുന്നതോ ഉടമസ്ഥാവകാശം വഹിക്കുന്നതോ ഉചിതമാണെന്ന് 56 ശതമാനം കാനഡക്കാരും അഭിപ്രായപ്പെടുന്നു. പൈപ്പ്ലൈനുകള് പൂര്ണ്ണമായും സ്വകാര്യ മേഖലയുടെ നിയന്ത്രണത്തില് മാത്രമായിരിക്കണം എന്ന് കരുതുന്നത് 21 ശതമാനം പേര് മാത്രമാണ്. ജൂലൈ 10 മുതല് 14 വരെ 2,649 കനേഡിയന് മുതിര്ന്ന പൗരന്മാരില് നിന്ന് ഓണ്ലൈനായി ശേഖരിച്ച വിവരങ്ങളുടെ അടിസ്ഥാനത്തിലാണ് ആംഗസ് റീഡ് ഇന്സ്റ്റിറ്റ്യൂട്ട് ഈ സര്വേ ഫലം തയ്യാറാക്കിയത്.
