ഓട്ടവ: അലാസ്കയ്ക്ക് സമീപമുള്ള ആർട്ടിക് സമുദ്രത്തിൽ രണ്ട് ചൈനീസ് ഗവേഷണ കപ്പലുകൾ എത്തിയതോടെ അമേരിക്കയും കാനഡയും നിരീക്ഷണം ശക്തമാക്കി. ‘ഷുവേ ലോങ്’ (Snow Dragon), ‘ഷുവേ ലോങ് 2’ (Snow Dragon 2) എന്നീ കപ്പലുകളാണ് വടക്കൻ മേഖലയിലേക്ക് നീങ്ങിയത്. കപ്പലുകളുടെ സാന്നിധ്യം കണ്ടെത്തിയതിനെ തുടർന്ന് യു.എസ്. കോസ്റ്റ് ഗാർഡും കനേഡിയൻ-അമേരിക്കൻ സൈനിക സംവിധാനങ്ങളും ഇവയുടെ നീക്കങ്ങൾ നിരീക്ഷിച്ചുവരികയാണ്.
നിലവിൽ കപ്പലുകൾ കാനഡയുടെ പ്രധാന സമുദ്രാതിർത്തിക്ക് പുറത്താണെന്നാണ് വിവരം. കപ്പലുകളുടെ നീക്കങ്ങളും അവ ഉപയോഗിക്കുന്ന ഉപകരണങ്ങളും സംബന്ധിച്ച് അമേരിക്കയും കാനഡയും കൂടുതൽ വിവരങ്ങൾ ശേഖരിച്ചുവരികയാണ്.
കാലാവസ്ഥാ പഠനത്തിനും സമുദ്ര-പരിസ്ഥിതി ഗവേഷണത്തിനുമാണ് കപ്പലുകൾ ആർട്ടിക് മേഖലയിലേക്ക് അയച്ചതെന്നാണ് ചൈനയുടെ വിശദീകരണം. എന്നാൽ, കപ്പലുകളിൽ കടലിനടിയിലെ വിവരങ്ങൾ ശേഖരിക്കാൻ ശേഷിയുള്ള അത്യാധുനിക ഉപകരണങ്ങളുണ്ടെന്നത് സുരക്ഷാ മേഖലയിലെ ആശങ്ക വർധിപ്പിച്ചിട്ടുണ്ട്.
ഈ ഉപകരണങ്ങൾ ഉപയോഗിച്ച് കടലിനടിയിലെ ഭൂമിശാസ്ത്രപരമായ വിവരങ്ങൾ, അന്തർവാഹിനികളുടെ സഞ്ചാരവുമായി ബന്ധപ്പെട്ട വിവരങ്ങൾ, സമുദ്രത്തിനടിയിലൂടെ കടന്നുപോകുന്ന ആശയവിനിമയ കേബിളുകളെക്കുറിച്ചുള്ള വിവരങ്ങൾ എന്നിവ ശേഖരിക്കാൻ കഴിയുമോയെന്ന സംശയമാണ് അമേരിക്കൻ, കനേഡിയൻ സുരക്ഷാ വിദഗ്ധർ ഉന്നയിക്കുന്നത്.
ആർട്ടിക് മേഖലയിൽ ചൈന–റഷ്യ സഹകരണം ആശങ്കയാകുന്നു
ആർട്ടിക് മേഖലയിൽ റഷ്യയുമായി സഹകരിച്ച് ചൈന സ്വാധീനം വർധിപ്പിക്കുന്നതും കാനഡയ്ക്കും അമേരിക്കയ്ക്കും ആശങ്കയുണ്ടാക്കുന്നുണ്ട്. വാണിജ്യ, ശാസ്ത്രീയ ഗവേഷണ പ്രവർത്തനങ്ങൾക്കപ്പുറം ഈ മേഖലയിലെ ചൈനീസ് സാന്നിധ്യം തന്ത്രപ്രധാനമായ ലക്ഷ്യങ്ങൾക്കായും ഉപയോഗിക്കപ്പെടാനുള്ള സാധ്യതയാണ് സുരക്ഷാ ഉദ്യോഗസ്ഥർ പരിശോധിക്കുന്നത്.
ഇതിന്റെ പശ്ചാത്തലത്തിൽ ആർട്ടിക് അതിർത്തിയിലെ നിരീക്ഷണവും പ്രതിരോധ സംവിധാനങ്ങളും ശക്തിപ്പെടുത്താനാണ് കാനഡയുടെ നീക്കം. കടലിലെ സംശയാസ്പദമായ നീക്കങ്ങൾ വേഗത്തിൽ കണ്ടെത്തുന്നതിനായി പുതിയ യുദ്ധക്കപ്പലുകളും അന്തർവാഹിനികളും സ്വന്തമാക്കുന്നതിനുള്ള നടപടികളും സർക്കാർ ആരംഭിച്ചിട്ടുണ്ട്.
കടലിനടിയിൽ പ്രത്യേക സെൻസറുകൾ സ്ഥാപിക്കുന്നതും പദ്ധതിയിലുണ്ട്. ആർട്ടിക് മേഖലയിലെ വിശാലമായ കടൽപരിധി നിരീക്ഷിക്കുന്നതിനും ദേശീയ സുരക്ഷാ ഭീഷണികൾ നേരത്തെ കണ്ടെത്തുന്നതിനും കൂടുതൽ നിക്ഷേപം അനിവാര്യമാണെന്ന് കനേഡിയൻ ഉദ്യോഗസ്ഥർ വ്യക്തമാക്കി.
ചൈനീസ് ഗവേഷണ കപ്പലുകളുടെ സാന്നിധ്യം നിലവിൽ നേരിട്ടുള്ള ഭീഷണിയായി പ്രഖ്യാപിച്ചിട്ടില്ലെങ്കിലും, ആർട്ടിക് മേഖലയിലെ വർധിച്ചുവരുന്ന ചൈനീസ് സാന്നിധ്യം അമേരിക്കയും കാനഡയും സൂക്ഷ്മമായി നിരീക്ഷിച്ചുവരികയാണ്.
