എഡ്മിന്റൻ: ആൽബർട്ടയിൽ റോഡപകടത്തെത്തുടർന്ന് ഓർമ്മശക്തി നഷ്ടപ്പെട്ട 41കാരൻ തനിക്ക് സംഭവിച്ച അപകടത്തിന്റെ ചുരുളഴിക്കാൻ സ്വന്തം നിലയിൽ അന്വേഷണം ആരംഭിച്ചു. അപകടത്തെത്തുടർന്ന് 8 ദിവസം കോമയിലായിരുന്നു.ജീവിതത്തിലേക്ക് തിരിച്ചെത്തിയ സ്റ്റാൻ ഡ്വോർകോവ്സ്കി എന്ന വ്യവസായിയാണ്, അപകടത്തിന്റെ ദുരൂഹത നീക്കാനുള്ള ശ്രമങ്ങളുമായി മുന്നോട്ട് പോകുന്നത്. കോമയിൽ നിന്ന് ഉണർന്നപ്പോൾ അദ്ദേഹത്തിന് സ്വന്തം പ്രായമോ അടുത്ത സുഹൃത്തുക്കളെയോ തിരിച്ചറിയാൻ സാധിച്ചിരുന്നില്ല.
ആൽബർട്ടയിലെ നിസ്കു (Nisku) പ്രദേശത്തെ റോഡരികിലുള്ള ഓടയിൽ നിന്നാണ് സ്റ്റാനെ ഗുരുതരമായ പരുക്കുകളോടെ കണ്ടെത്തിയത്. കടുത്ത തലച്ചോറിലെ പരുക്കും 24 വാരിയെല്ലുകളിലെ ഒടിവുകളുമായി അതീവ ഗുരുതരാവസ്ഥയിലായിരുന്നു അദ്ദേഹം. ഒരു ഇലക്ട്രിക് ഡർട്ട് ബൈക്കിന് സമീപമാണ് ഇദ്ദേഹത്തെ കണ്ടെത്തിയതെങ്കിലും, അപകടത്തിന്റെ കൃത്യമായ കാരണം കണ്ടെത്താൻ പൊലീസിനോ ബന്ധുക്കൾക്കോ ഇതുവരെ സാധിച്ചിട്ടില്ല. അപകടം നടന്ന ദിവസത്തെ സംഭവങ്ങളെക്കുറിച്ച് സ്റ്റാന് നിലവിൽ യാതൊരു ഓർമ്മയുമില്ല. പൂർണ്ണമായ ആരോഗ്യത്തിലേക്ക് തിരിച്ചെത്തുന്നതിന് മുൻപ് അന്ന് എന്താണ് സംഭവിച്ചതെന്ന് വ്യക്തമാകേണ്ടതുണ്ടെന്ന് അദ്ദേഹം മാധ്യമങ്ങളോട് പ്രതികരിച്ചു.
ഇതിന്റെ ഭാഗമായി, അപകടദിവസം താൻ സഞ്ചരിച്ച വഴികൾ കേന്ദ്രീകരിച്ചും ലഭ്യമായ സിസിടിവി (CCTV) ദൃശ്യങ്ങൾ പരിശോധിച്ചും അദ്ദേഹം സ്വന്തമായി തെളിവുകൾ ശേഖരിച്ചുവരികയാണ്. റോയൽ കനേഡിയൻ മൗണ്ടഡ് പോലീസ് (RCMP) സംഭവത്തിൽ ഔദ്യോഗിക അന്വേഷണം ആരംഭിച്ചിട്ടുണ്ട്. സ്റ്റാന്റെ ഓർമ്മശക്തി പൂർണ്ണമായി തിരിച്ചുകിട്ടാൻ മാസങ്ങളോ വർഷങ്ങളോ എടുത്തേക്കാമെന്നാണ് മെഡിക്കൽ സംഘത്തിന്റെ വിലയിരുത്തൽ. നിലവിൽ ബിസിനസ്സ് സംരംഭങ്ങൾ താൽക്കാലികമായി നിർത്തിവെച്ച് വിശ്രമത്തിൽ കഴിയുന്ന അദ്ദേഹത്തിന് ഭാര്യയും നാല് മക്കളുമടങ്ങുന്ന കുടുംബം പൂർണ്ണ പിന്തുണ നൽകുന്നുണ്ട്.
