ഓട്ടവ: കാനഡയും ഫ്രാൻസും തമ്മിലുള്ള തന്ത്രപ്രധാന ബന്ധം കൂടുതൽ ശക്തമാക്കുന്നതിന്റെ ഭാഗമായി പ്രധാനമന്ത്രി മാർക്ക് കാർണി ഫ്രഞ്ച് പ്രസിഡന്റ് ഇമ്മാനുവേൽ മക്രോണുമായി കൂടിക്കാഴ്ച നടത്തും. സെപ്റ്റംബർ 20ന് ഫ്രാൻസിന്റെ സെന്റ്-പിയറി-എറ്റ്-മിക്വലോൺ പ്രദേശത്താണ് കൂടിക്കാഴ്ച നടക്കുന്നത്.
ഊർജം, പ്രതിരോധം, നിർണായക ധാതുക്കൾ, എയ്റോസ്പേസ്, ക്വാണ്ടം സാങ്കേതികവിദ്യ, ഉപഗ്രഹങ്ങൾ, സൂപ്പർകമ്പ്യൂട്ടിംഗ് തുടങ്ങിയ തന്ത്രപ്രധാന മേഖലകളിലെ സഹകരണം ശക്തിപ്പെടുത്തുന്നതായിരിക്കും ചർച്ചകളുടെ പ്രധാന ലക്ഷ്യം. മാറിവരുന്ന ആഗോള സുരക്ഷാ-സാമ്പത്തിക സാഹചര്യത്തിൽ കാനഡയും ഫ്രാൻസും തമ്മിലുള്ള പങ്കാളിത്തത്തിന് കൂടുതൽ പ്രാധാന്യം നൽകുകയാണ് ഇരുരാജ്യങ്ങളും.
അമേരിക്കയുമായുള്ള വ്യാപാര സംഘർഷത്തിനിടെ യൂറോപ്യൻ പങ്കാളികളുമായുള്ള ബന്ധം ശക്തിപ്പെടുത്തുന്നത് കാനഡയുടെ സാമ്പത്തിക വൈവിധ്യവൽക്കരണ തന്ത്രത്തിനും പ്രധാനമാണ്. യൂറോപ്പുമായുള്ള വ്യാപാരം, ഊർജ സുരക്ഷ, പ്രതിരോധ സഹകരണം എന്നിവയിൽ പുതിയ അവസരങ്ങൾ കണ്ടെത്താൻ ഫ്രാൻസുമായുള്ള അടുത്ത ബന്ധം കാനഡയ്ക്ക് സഹായകരമാകുമെന്നാണ് വിലയിരുത്തൽ.
