വൻകൂവർ: ഈ വർഷത്തെ എൽ നിനോ പ്രതിഭാസവുമായി ബന്ധപ്പെട്ട ഭീമൻ അണ്ടർവാട്ടർ കെൽവിൻ തരംഗം ബ്രിട്ടിഷ് കൊളംബിയ (ബി.സി) തീരത്തേക്ക് നീങ്ങുന്നതായി ശാസ്ത്രജ്ഞർ. ഒക്ടോബർ മധ്യത്തോടെ തരംഗം തീരത്തെത്തുമെന്നാണ് പ്രതീക്ഷ. ഇത് ഉയർന്ന വേലിയേറ്റത്തിന്റെയും കൊടുങ്കാറ്റ് മൂലമുള്ള കടൽക്ഷോഭത്തിന്റെയും ആഘാതം വർധിപ്പിക്കുമെന്ന് വിദഗ്ധർ മുന്നറിയിപ്പ് നൽകി.
കെൽവിൻ തരംഗം സ്വാഭാവിക കാലാവസ്ഥാ പ്രതിഭാസമാണ്. എന്നാൽ മനുഷ്യനിർമിത കാലാവസ്ഥാ വ്യതിയാനം മൂലം സമുദ്രനിരപ്പ് ഇതിനകം ഉയർന്ന സാഹചര്യത്തിൽ ഇതിന്റെ ആഘാതം കൂടുതൽ രൂക്ഷമായേക്കുമെന്നാണ് വിലയിരുത്തൽ.
ഇതിന് മുമ്പുണ്ടായ ചെറിയ കെൽവിൻ തരംഗം ജൂണിൽ ബി.സി തീരത്തെത്തിയിരുന്നു. ചില പ്രദേശങ്ങളിൽ അന്ന് കടൽനിരപ്പ് 30 സെന്റിമീറ്ററിലധികം ഉയർന്നതായി എൻവയോൺമെന്റ് ആൻഡ് ക്ലൈമറ്റ് ചേഞ്ച് കാനഡയിലെ ഗവേഷകനായ ബിൽ മെറിഫീൽഡ് പറഞ്ഞു. അടുത്തെത്തുന്ന തരംഗം ഇതിലും ശക്തമായിരിക്കുമെന്നാണ് പ്രതീക്ഷ.
എങ്ങനെയാണ് കെൽവിൻ തരംഗം രൂപപ്പെടുന്നത്?
സാധാരണയായി പസഫിക് സമുദ്രത്തിലെ ഭൂമധ്യരേഖയ്ക്ക് സമീപം കാറ്റ് കിഴക്കുനിന്ന് പടിഞ്ഞാറേക്ക് വീശുന്നതിനാൽ വെള്ളം തെക്കേ അമേരിക്കയിൽനിന്ന് ഏഷ്യയിലേക്ക് നീങ്ങുന്നു. എന്നാൽ എൽ നിനോ വർഷങ്ങളിൽ ഈ കാറ്റ് ദുർബലമാകുകയോ ദിശ മാറുകയോ ചെയ്യുന്നു. ഇതോടെ വെള്ളം കിഴക്കോട്ട് നീങ്ങുകയും തെക്കേ അമേരിക്കൻ തീരത്തെത്തിയ ശേഷം വടക്കോട്ടും തെക്കോട്ടുമായി അമേരിക്കൻ തീരങ്ങളിലൂടെ സഞ്ചരിക്കുകയും ചെയ്യുന്നു.
സുനാമി പോലുള്ള വലിയ തിരമാലയല്ല കെൽവിൻ തരംഗം. പകരം വിശാലമായ പ്രദേശത്ത് സമുദ്രോപരിതലത്തിന്റെ ഉയരം താൽക്കാലികമായി ഉയരുന്ന പ്രതിഭാസമാണിത്.
ഉയർന്ന വേലിയേറ്റത്തിൽ ആഘാതം രൂക്ഷമാകും
ഉയർന്ന വേലിയേറ്റം അനുഭവപ്പെടുന്ന സമയത്ത് കെൽവിൻ തരംഗം തീരത്തെത്തിയാൽ സ്ഥിതി കൂടുതൽ ഗുരുതരമാകുമെന്ന് വിദഗ്ധർ പറയുന്നു. ഇതിന് പുറമെ ശീതകാല കൊടുങ്കാറ്റും ശക്തമായ വടക്കൻ കാറ്റും ഉണ്ടായാൽ കടൽനിരപ്പ് വീണ്ടും ഉയരാം.
കെൽവിൻ തരംഗം, ഉയർന്ന വേലിയേറ്റം, കൊടുങ്കാറ്റ് എന്നിവ ഒരേസമയം സംഭവിക്കുന്നത് തീരപ്രദേശങ്ങളിൽ വെള്ളപ്പൊക്കത്തിനും തീരശോഷണത്തിനും സാധ്യത വർധിപ്പിക്കും. കാലാവസ്ഥാ വ്യതിയാനം മൂലം സമുദ്രനിരപ്പ് ഇതിനകം ഉയരുന്നതും സ്ഥിതിഗതികൾ സങ്കീർണമാക്കുന്നുണ്ട്.
എൽ നിനോ മൂലം സമുദ്രത്തിൽ സംഭരിച്ചിരിക്കുന്ന ചൂടിന്റെ ഒരു ഭാഗം അന്തരീക്ഷത്തിലേക്ക് പുറത്തുവിടപ്പെടുന്നതിനാൽ ആഗോള താപനിലയിലും ഇതിന്റെ പ്രതിഫലനമുണ്ടാകുമെന്ന് ഗവേഷകർ ചൂണ്ടിക്കാട്ടുന്നു. 2027 റെക്കോർഡ് ചൂടേറിയ വർഷമായി മാറാൻ സാധ്യതയുണ്ടെന്നും വിദഗ്ധർ മുന്നറിയിപ്പ് നൽകിയിട്ടുണ്ട്.
