ഓട്ടവ: കാനഡയിലെ അർഹരായ കുടുംബങ്ങൾക്കുള്ള കാനഡ ചൈൽഡ് ബെനഫിറ്റ് (CCB) തുക നാളെ ബാങ്ക് അക്കൗണ്ടുകളിലെത്തും. കാനഡ റവന്യൂ ഏജൻസി (CRA) വഴിയാണ് ആനുകൂല്യം വിതരണം ചെയ്യുന്നത്. 2026 ജൂലൈയിൽ ആരംഭിച്ച പുതിയ ആനുകൂല്യ വർഷത്തിലെ നാലാമത്തെ പ്രതിമാസ പേയ്മെന്റാണിത്.
2026 ജൂലൈ മുതൽ 2027 ജൂൺ വരെയുള്ള ആനുകൂല്യ കാലയളവിലെ തുകകൾ 2025ലെ കുടുംബത്തിന്റെ ക്രമീകരിച്ച അറ്റവരുമാനത്തെ അടിസ്ഥാനമാക്കിയാണ് കണക്കാക്കുന്നത്. പണപ്പെരുപ്പത്തിനനുസരിച്ച് ആനുകൂല്യ തുകകൾ പുതുക്കിയിട്ടുണ്ട്.
കുട്ടികളുടെ പ്രായമനുസരിച്ചുള്ള ആനുകൂല്യം
2025ലെ ക്രമീകരിച്ച കുടുംബ അറ്റവരുമാനം 38,237 കനേഡിയൻ ഡോളറിൽ താഴെയുള്ള അർഹരായ കുടുംബങ്ങൾക്ക് പരമാവധി ആനുകൂല്യം ലഭിക്കും.
- ആറു വയസ്സിൽ താഴെയുള്ള കുട്ടികൾക്ക്: പ്രതിമാസം പരമാവധി 679.75 ഡോളർ; വർഷത്തിൽ 8,157 ഡോളർ.
- ആറു മുതൽ 17 വയസ്സുവരെയുള്ള കുട്ടികൾക്ക്: പ്രതിമാസം പരമാവധി 573.58 ഡോളർ; വർഷത്തിൽ 6,883 ഡോളർ.
കുടുംബത്തിന്റെ വരുമാനം 38,237 ഡോളർ കടന്നാൽ വരുമാനവും കുട്ടികളുടെ എണ്ണവും അനുസരിച്ച് ആനുകൂല്യ തുക കുറയും. അർഹരായ കുടുംബങ്ങൾക്ക് പ്രവിശ്യാ-പ്രദേശീയ ചൈൽഡ് ബെനഫിറ്റ് പദ്ധതികളുടെ തുകയും സി.സി.ബിയോടൊപ്പം ലഭിച്ചേക്കാം.
ഭിന്നശേഷിയുള്ള കുട്ടികൾക്കായി അധിക സഹായം
ഭിന്നശേഷിയുള്ള കുട്ടികളെ വളർത്തുന്ന അർഹരായ കുടുംബങ്ങൾക്ക് ചൈൽഡ് ഡിസബിലിറ്റി ബെനഫിറ്റ് (CDB) വഴി അധിക തുകയും ലഭിക്കാം. കുടുംബവരുമാനവും മറ്റ് അർഹതാ മാനദണ്ഡങ്ങളും അനുസരിച്ചാണ് ഈ സഹായം കണക്കാക്കുന്നത്.
വാർഷിക സി.സി.ബി തുക 240 ഡോളറിൽ താഴെയാണെങ്കിൽ പ്രതിമാസ ഗഡുക്കൾക്ക് പകരം ജൂലൈയിൽ ഒറ്റത്തവണയായി നൽകും.
ആർക്കൊക്കെ അപേക്ഷിക്കാം?
കാനഡയിലെ പൗരന്മാർ, സ്ഥിരതാമസക്കാർ, സംരക്ഷിത വ്യക്തികൾ എന്നിവർക്ക് പുറമെ നിശ്ചിത നിബന്ധനകൾ പാലിക്കുന്ന ചില താൽക്കാലിക താമസക്കാർക്കും ആനുകൂല്യത്തിന് അർഹതയുണ്ടാകാം. സാധാരണയായി, വർക്ക് അല്ലെങ്കിൽ സ്റ്റഡി പെർമിറ്റുമായി കാനഡയിൽ തുടർച്ചയായി 18 മാസം താമസിച്ചവരും സാധുവായ പെർമിറ്റ് കൈവശമുള്ളവരുമായിരിക്കണം.
ആനുകൂല്യം തുടർന്നും ലഭിക്കുന്നതിന് അർഹരായ വ്യക്തികളും അവരുടെ പങ്കാളികളും ഓരോ വർഷവും ആദായനികുതി റിട്ടേൺ സമർപ്പിക്കണം. കുടുംബവരുമാനത്തിന്റെ അടിസ്ഥാനത്തിലാണ് ആനുകൂല്യ തുക പുതുക്കുന്നത്.
എങ്ങനെ അപേക്ഷിക്കാം?
പുതിയതായി അപേക്ഷിക്കുന്നവർക്ക് കുട്ടിയുടെ ജനനം രജിസ്റ്റർ ചെയ്യുന്ന സമയത്ത് തന്നെ അപേക്ഷിക്കാം. അല്ലെങ്കിൽ സി.ആർ.എയുടെ ഓൺലൈൻ അക്കൗണ്ട് വഴി അപേക്ഷിക്കുകയോ RC66 അപേക്ഷാഫോം പൂരിപ്പിച്ച് തപാൽ വഴി അയയ്ക്കുകയോ ചെയ്യാം.
അടുത്ത പേയ്മെന്റ് തീയതികൾ
ഒക്ടോബർ 20ന് ശേഷമുള്ള 2026ലെ അടുത്ത സി.സി.ബി പേയ്മെന്റുകൾ:
- നവംബർ 20
- ഡിസംബർ 11
നിശ്ചിത തീയതിയിൽ തുക ലഭിച്ചില്ലെങ്കിൽ ആദ്യം സി.ആർ.എ അക്കൗണ്ടിൽ പേയ്മെന്റ് നില പരിശോധിക്കണം. തുടർന്ന് അഞ്ച് പ്രവൃത്തിദിവസം കാത്തിരുന്നിട്ടും തുക ലഭിച്ചില്ലെങ്കിൽ സി.ആർ.എയുമായി ബന്ധപ്പെടാമെന്ന് അധികൃതർ നിർദേശിക്കുന്നു.
