വാഷിങ്ടൺ: പശ്ചിമേഷ്യയിൽ അമേരിക്കൻ പൗരന്മാർക്ക് സുരക്ഷാ മുന്നറിയിപ്പുമായി യുഎസ് വിദേശകാര്യ മന്ത്രാലയം. ഇറാനിൽനിന്നും ഇറാൻ അനുകൂല ഹൂതി വിഭാഗങ്ങളിൽനിന്നും അമേരിക്കൻ സ്ഥാപനങ്ങൾക്കും നേരെ ആക്രമണ ഭീഷണിയുണ്ടാകാമെന്ന വിലയിരുത്തലിന്റെ അടിസ്ഥാനത്തിലാണ് മുന്നറിയിപ്പ്.
ഗൾഫ് രാജ്യങ്ങൾ ഉൾപ്പെടെ പശ്ചിമേഷ്യയിലെ 12 രാജ്യങ്ങളിലുള്ള അമേരിക്കൻ പൗരന്മാരോടാണ് ജാഗ്രത പാലിക്കാൻ നിർദേശിച്ചിരിക്കുന്നത്. മേഖലയിലെ സംഘർഷസാഹചര്യം കണക്കിലെടുത്ത് വ്യോമപാതകൾ അടച്ചിടാനും വിമാന സർവീസുകൾ മുന്നറിയിപ്പില്ലാതെ റദ്ദാക്കാനും സാധ്യതയുണ്ടെന്നും അധികൃതർ അറിയിച്ചു.
യാത്രാതടസ്സങ്ങൾ നേരിടാൻ തയ്യാറായിരിക്കണമെന്ന് പശ്ചിമേഷ്യയിലെ യുഎസ് എംബസികൾ പൗരന്മാരോട് ആവശ്യപ്പെട്ടു. ഗൾഫ് രാജ്യങ്ങൾക്ക് പുറമെ ജോർദാൻ, ഇറാഖ്, ലബനൻ, യമൻ, ഇറാൻ, ഇസ്രയേൽ എന്നിവിടങ്ങളിലെ അമേരിക്കൻ നയതന്ത്രകാര്യാലയങ്ങളും സുരക്ഷാ മുന്നറിയിപ്പ് നൽകിയിട്ടുണ്ട്.
അതേസമയം, ഇറാൻ നിലപാടുകളിലും നടപടികളിലും ഉടൻ മാറ്റം വരുത്തിയില്ലെങ്കിൽ തുടർനടപടികൾ എളുപ്പത്തിൽ പൂർത്തിയാക്കാനാകുമെന്ന് യുഎസ് പ്രസിഡന്റ് ഡോണൾഡ് ട്രംപ് പറഞ്ഞു. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന് പിന്തുണ പ്രഖ്യാപിച്ച് സമൂഹമാധ്യമത്തിൽ പങ്കുവെച്ച കുറിപ്പിലായിരുന്നു ട്രംപിന്റെ പരാമർശം.
ഹോർമുസ് കടലിടുക്ക് വീണ്ടും തുറക്കുന്നതുമായി ബന്ധപ്പെട്ട നിർദേശം ഇപ്പോഴും പരിഗണനയിലുണ്ടെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി. അതേസമയം, അമേരിക്ക തെറ്റായ കണക്കുകൂട്ടലുകൾ നടത്തരുതെന്ന് ഇറാൻ പ്രതിരോധ മന്ത്രിയും മുന്നറിയിപ്പ് നൽകി.
അമേരിക്കയുടെ ഉപരോധങ്ങൾ നിലനിൽക്കുമ്പോഴും ഇറാന്റെ എണ്ണ ഉൽപ്പാദനശേഷിയിൽ ഗണ്യമായ വർധനയുണ്ടായതായി ഇറാന്റെ ഔദ്യോഗിക വാർത്താ ഏജൻസിയായ ഐആർഎൻഎ റിപ്പോർട്ട് ചെയ്തു.
പശ്ചിമേഷ്യയിലെ സംഘർഷസാഹചര്യം തുടരുന്നതിനിടെ അമേരിക്കൻ പൗരന്മാർക്കും സ്ഥാപനങ്ങൾക്കും നേരെയുള്ള സുരക്ഷാഭീഷണി സംബന്ധിച്ച ആശങ്കകൾ വർധിക്കുകയാണ്. യാത്രാ നിയന്ത്രണങ്ങളും വ്യോമഗതാഗതത്തിലെ തടസ്സങ്ങളും മേഖലയിലെ സാഹചര്യം കൂടുതൽ സങ്കീർണമാക്കാൻ സാധ്യതയുണ്ട്.
