ഓട്ടവ: കാനഡയില്‍ ലൈംഗികരോഗങ്ങള്‍ (STIs) ആശങ്കാജനകമായ വിധത്തില്‍ വര്‍ധിക്കുന്നതായി ചീഫ് പബ്ലിക് ഹെല്‍ത്ത് ഓഫീസറുടെ ഏറ്റവും പുതിയ റിപ്പോര്‍ട്ട്. കഴിഞ്ഞ ഒരു പതിറ്റാണ്ടിനിടെ സിഫിലിസ് രോഗബാധിതരുടെ എണ്ണത്തില്‍ നാലിരട്ടിയിലധികം വര്‍ധനയാണ് രേഖപ്പെടുത്തിയിട്ടുള്ളത്. ഗര്‍ഭസ്ഥ ശിശുക്കളിലേക്കും നവജാതശിശുക്കളിലേക്കും പകരുന്ന കൊന്‍ജെനിറ്റല്‍ സിഫിലിസ് (Congenital Syphilis) കേസുകള്‍ വര്‍ധിക്കുന്നത് ശിശുമരണങ്ങള്‍ക്കും ഗുരുതരമായ ആരോഗ്യപ്രശ്‌നങ്ങള്‍ക്കും കാരണമാകുന്നത് കാനഡയിലെ ആരോഗ്യ മേഖലയെ വലിയ രീതിയില്‍ പ്രതിസന്ധിയിലാക്കുന്നു.
സിഫിലിസിന് പുറമെ ഗൊണോറിയ, ക്ലാമീഡിയ തുടങ്ങിയ രോഗങ്ങളും രാജ്യത്ത് വ്യാപകമായി പടരുന്നുണ്ട്. സാമൂഹികമായ അപകര്‍ഷതാബോധവും പരിശോധനകള്‍ നടത്തുന്നതിലുള്ള തടസ്സങ്ങളുമാണ് പലപ്പോഴും രോഗനിര്‍ണ്ണയം വൈകുന്നതിന് പ്രധാന കാരണമാകുന്നത്. കൂടാതെ, ഡേറ്റിങ്് ആപ്പുകളുടെ അമിത ഉപയോഗം, കോണ്ടം ഉപയോഗത്തിലുണ്ടായ കുറവ്, പകര്‍ച്ചവ്യാധി കാലത്ത് പരിശോധനകളില്‍ വന്ന മുടക്കം എന്നിവ രോഗവ്യാപനത്തിന്റെ ആക്കം കൂട്ടി. ഗൊണോറിയയ്ക്കെതിരെയുള്ള ആന്റിബയോട്ടിക് പ്രതിരോധം ഉയരുന്നത് രോഗചികിത്സയെ കൂടുതല്‍ സങ്കീര്‍ണ്ണമാക്കുന്നുണ്ട്.
രോഗലക്ഷണങ്ങള്‍ പ്രകടമാകാതെ വ്യാപിക്കുന്ന ഇത്തരത്തിലുള്ള രോഗബാധ തടയാന്‍ പ്രാദേശികമായി ദ്രുത പരിശോധനകള്‍ പ്രോത്സാഹിപ്പിക്കണമെന്ന് ആരോഗ്യ വിദഗ്ദ്ധര്‍ നിര്‍ദ്ദേശിക്കുന്നു. മുന്‍വിധികളില്ലാത്ത ചികിത്സാ അന്തരീക്ഷവും കൂടുതല്‍ മെച്ചപ്പെട്ട പൊതുജനാരോഗ്യ ഇടപെടലുകളും ഉറപ്പാക്കുന്നതിലൂടെ മാത്രമേ സിഫിലിസ് ഉള്‍പ്പെടെയുള്ള രോഗങ്ങളുടെ വ്യാപനം ഫലപ്രദമായി ചെറുക്കാന്‍ കഴിയൂ എന്ന് റിപ്പോര്‍ട്ട് ചൂണ്ടിക്കാണിക്കുന്നു.
