എഡ്മിന്റൻ: അടുത്ത പത്ത് വർഷത്തിനുള്ളിൽ ആൽബർട്ടയിലെ എണ്ണമണൽ (Oil Sands) ഉൽപ്പാദനം ഇരട്ടിയാക്കുകയെന്ന ലക്ഷ്യവുമായി പ്രവിശ്യാ സർക്കാർ മുന്നോട്ടുപോകുമ്പോൾ പുതിയ പദ്ധതികളിൽ വൻതോതിൽ നിക്ഷേപം നടത്താൻ എണ്ണക്കമ്പനികൾ തയ്യാറാകുമോ എന്ന ചർച്ച ശക്തമാകുന്നു. ഫെഡറൽ, പ്രവിശ്യാ സർക്കാരുകൾ പ്രഖ്യാപിച്ച നയപരമായ മാറ്റങ്ങൾ വ്യവസായത്തിന് അനുകൂല സാഹചര്യമൊരുക്കുന്നുണ്ടെങ്കിലും നിക്ഷേപ തീരുമാനങ്ങൾ അത്ര എളുപ്പമാകില്ലെന്നാണ് സാമ്പത്തിക വിദഗ്ധരുടെ വിലയിരുത്തൽ.
ആൽബർട്ട പ്രീമിയർ ഡാനിയേൽ സ്മിത്താണ് അടുത്ത പത്ത് വർഷത്തിനുള്ളിൽ എണ്ണമണൽ ഉൽപ്പാദനം ഇരട്ടിയാക്കുകയെന്ന ലക്ഷ്യം പ്രഖ്യാപിച്ചത്. ഫെഡറൽ സർക്കാർ പരിസ്ഥിതി നയങ്ങളിൽ വരുത്തിയ മാറ്റങ്ങളും നികുതി ഇളവുകളും പുതിയ റോയൽറ്റി പദ്ധതിയും എണ്ണമേഖലയ്ക്ക് കൂടുതൽ അവസരങ്ങൾ തുറന്നിട്ടുണ്ട്.
കാനഡയിൽ നിന്ന് ഏഷ്യൻ വിപണികളിലേക്ക് എണ്ണ കയറ്റുമതി വർധിപ്പിക്കാൻ ലക്ഷ്യമിടുന്ന പസഫിക് ലിങ്ക് പൈപ്പ്‌ലൈൻ പദ്ധതിയിലും ഫെഡറൽ, ആൽബർട്ട സർക്കാരുകൾ പ്രധാന നിക്ഷേപ പങ്കാളികളാണ്. ദക്ഷിണ ബ്രിട്ടീഷ് കൊളംബിയയിലേക്ക് എണ്ണ എത്തിക്കുന്നതിനുള്ള പദ്ധതിയാണിത്.
എന്നാൽ സർക്കാരുകളുടെ നയപരമായ പിന്തുണ ലഭിച്ചതുകൊണ്ടുമാത്രം കമ്പനികൾ വൻതോതിൽ നിക്ഷേപം നടത്തുമെന്ന് ഉറപ്പില്ലെന്ന് കാൽഗറി സർവകലാശാലയിലെ സ്കൂൾ ഓഫ് പബ്ലിക് പോളിസിയിലെ ആർ.ജെ. ജോൺസ്റ്റൺ ചൂണ്ടിക്കാട്ടി. വ്യവസായം ആവശ്യപ്പെട്ട പല ആനുകൂല്യങ്ങളും ലഭിച്ച സാഹചര്യത്തിൽ ഇനി നിക്ഷേപത്തിലൂടെ ഫലം കാണിക്കേണ്ട ഉത്തരവാദിത്തം കമ്പനികൾക്കാണെന്നും അദ്ദേഹം പറഞ്ഞു.
കഴിഞ്ഞ വർഷങ്ങളിൽ കടം കുറയ്ക്കുന്നതിനും ഓഹരി ഉടമകൾക്ക് കൂടുതൽ ലാഭവിഹിതം നൽകുന്നതിനും ഓഹരികൾ തിരിച്ചുവാങ്ങുന്നതിനുമാണ് എണ്ണക്കമ്പനികൾ കൂടുതൽ മുൻഗണന നൽകിയതെന്ന് എൻവെറസിലെ മുതിർന്ന അനലിസ്റ്റ് മൈക്കൽ ബെർഗർ പറഞ്ഞു. ഈ സമീപനം തുടർന്നേക്കാമെങ്കിലും ഉൽപ്പാദനം വർധിപ്പിക്കാനുള്ള താൽപര്യവും കമ്പനികൾക്കുണ്ടെന്ന് അദ്ദേഹം വ്യക്തമാക്കി.
2000 മുതൽ 2014 വരെയുള്ള കാലയളവിൽ എണ്ണമേഖലയിൽ വൻതോതിലുള്ള നിക്ഷേപവും പദ്ധതികളുടെ ദ്രുതഗതിയിലുള്ള വികസനവുമായിരുന്നു ഉണ്ടായിരുന്നതെന്ന് എആർസി ഫിനാൻഷ്യൽ പങ്കാളിയും മുൻ ഡെവൺ കാനഡ മേധാവിയുമായ ക്രിസ് സീസൺസ് പറഞ്ഞു. എന്നാൽ 2014-ലെ ആഗോള എണ്ണവില തകർച്ച വ്യവസായത്തിന് വലിയ തിരിച്ചടിയായി. തുടർന്ന് ഓരോ ബാരൽ എണ്ണ ഉൽപ്പാദിപ്പിക്കുന്നതിനുള്ള ചെലവ് കുറയ്ക്കുന്നതിൽ കമ്പനികൾ ശ്രദ്ധ കേന്ദ്രീകരിച്ചു. പുതിയ പദ്ധതികളിലും സാമ്പത്തിക അച്ചടക്കം തുടരുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു.
വികസന പദ്ധതികളുമായി പ്രമുഖ കമ്പനികൾ
കാനഡയിലെ പ്രമുഖ എണ്ണമണൽ ഉൽപ്പാദകരായ ഇംപീരിയൽ ഓയിൽ, സൺകോർ എനർജി, സെനോവസ് എനർജി തുടങ്ങിയ കമ്പനികൾ ഉൽപ്പാദനം വർധിപ്പിക്കുന്നതിനുള്ള സാധ്യതകൾ പരിശോധിച്ചുവരികയാണ്.
ആസ്പൻ, ക്ലാർക്ക് ക്രീക്ക്, കോർണർ എന്നീ മൂന്ന് പദ്ധതികളിലൂടെ നിലവിലെ മൊത്തം ഉൽപ്പാദനശേഷി ഇരട്ടിയാക്കാൻ കഴിയുമെന്ന് ഇംപീരിയൽ ഓയിൽ സി.ഇ.ഒ ജോൺ വീലൻ വ്യക്തമാക്കി. പ്രതിദിനം 1.5 ലക്ഷം ബാരൽ ഉൽപ്പാദിപ്പിക്കാൻ ലക്ഷ്യമിടുന്ന ആസ്പൻ പദ്ധതിയുടെ അന്തിമ നിക്ഷേപ തീരുമാനം നേരത്തെ ഈ ദശകത്തിന്റെ അവസാനത്തോടെ എടുക്കാനായിരുന്നു കമ്പനിയുടെ നീക്കം. എന്നാൽ പദ്ധതി നേരത്തേ ആരംഭിക്കുന്നതിനുള്ള സാധ്യതയും പരിശോധിക്കുന്നുണ്ട്.
അടുത്ത പത്ത് വർഷത്തിനുള്ളിൽ ആറ് ഇൻ-സിറ്റു പദ്ധതികൾ നടപ്പാക്കാനാണ് സൺകോർ എനർജി ലക്ഷ്യമിടുന്നത്. നിലവിലുള്ള പദ്ധതികൾക്കപ്പുറം കൂടുതൽ വികസനം വേഗത്തിൽ നടപ്പാക്കാൻ കഴിയുമോയെന്നും കമ്പനി പരിശോധിക്കുന്നുണ്ടെന്ന് സി.ഇ.ഒ റിച്ച് ക്രൂഗർ പറഞ്ഞു.
അതേസമയം, ചെറുകിട എണ്ണക്കമ്പനിയായ അത്തബാസ്ക ഓയിൽ കോർപ്പറേഷനെ 5.7 ബില്യൺ ഡോളറിന് ഏറ്റെടുക്കാനുള്ള നീക്കത്തിലൂടെ സെനോവസ് എനർജിയും ഉൽപ്പാദനശേഷി വർധിപ്പിക്കാൻ ലക്ഷ്യമിടുന്നു. അത്തബാസ്കയുടെ എണ്ണമണൽ ആസ്തികളിൽനിന്നുള്ള ഉൽപ്പാദനം 2032-ഓടെ പ്രതിദിനം 40,000 ബാരൽ എണ്ണയ്ക്ക് തുല്യമായ അളവിൽനിന്ന് 1,15,000 ബാരലായി ഉയർത്താനാകുമെന്നാണ് സെനോവസിന്റെ കണക്കുകൂട്ടൽ.
നികുതി നയം, റോയൽറ്റി, പുതിയ പൈപ്പ്‌ലൈൻ പദ്ധതികൾ, നിയന്ത്രണ നടപടികളിലെ കാര്യക്ഷമത എന്നിവയുമായി ബന്ധപ്പെട്ട സമീപകാല പ്രഖ്യാപനങ്ങൾ വികസന പദ്ധതികൾക്ക് അനുകൂലമാണെന്ന് സെനോവസ് സി.ഇ.ഒ ജോൺ മക്കെൻസി പറഞ്ഞു.
കാർബൺ പുറന്തള്ളൽ നിയന്ത്രണവും നിർണായകം
എണ്ണമണൽ ഉൽപ്പാദനം വർധിപ്പിക്കുന്നതിനൊപ്പം കാർബൺ പുറന്തള്ളൽ കുറയ്ക്കുന്നതിനുള്ള പാത്ത്‌വേസ് കാർബൺ സ്റ്റോറേജ് പദ്ധതിയും നിർണായകമാണ്. 2021-ൽ പ്രഖ്യാപിച്ച ഈ പദ്ധതി പിന്നീട് വെട്ടിച്ചുരുക്കിയിട്ടുണ്ട്. പസഫിക് ലിങ്ക് പൈപ്പ്‌ലൈൻ വഴി വർധിക്കുന്ന ഉൽപ്പാദനവുമായി ബന്ധപ്പെട്ട ഹരിതഗൃഹ വാതക പുറന്തള്ളലിന്റെ ഒരു ഭാഗം കുറയ്ക്കുകയാണ് ലക്ഷ്യം.
കഴിഞ്ഞ വർഷം ഫെഡറൽ സർക്കാരും ആൽബർട്ട സർക്കാരും ഒപ്പുവെച്ച ഊർജ കരാർ പ്രകാരം പൈപ്പ്‌ലൈൻ പദ്ധതിയും പാത്ത്‌വേസ് പദ്ധതിയും പരസ്പരം ബന്ധപ്പെട്ട വ്യവസ്ഥകളോടെയാണ് മുന്നോട്ടുപോകുന്നത്. പാത്ത്‌വേസ് പദ്ധതിയുമായി ബന്ധപ്പെട്ട ചർച്ചകളുടെ ഫലം അനുസരിച്ചായിരിക്കും കനേഡിയൻ നാചുറൽ റിസോഴ്‌സസിന്റെ വികസന പദ്ധതികളെന്നും കമ്പനി പ്രസിഡന്റ് സ്കോട്ട് സ്റ്റൗത്ത് വ്യക്തമാക്കി.
നിലവിലുള്ള പദ്ധതികൾ പുനർവികസിപ്പിക്കുക, ഉൽപ്പാദന ശേഷി വിപുലീകരിക്കുക, പുതിയ പദ്ധതികൾ ആരംഭിക്കുക തുടങ്ങിയ വിവിധ മാർഗങ്ങളിലൂടെ എണ്ണമണൽ മേഖലയ്ക്ക് വളർച്ച നേടാനാകുമെന്ന് വിദഗ്ധർ വിലയിരുത്തുന്നു.
സർക്കാരുകളുടെ നയപരമായ പിന്തുണയും എണ്ണവിപണിയിലെ സാഹചര്യങ്ങളും അനുകൂലമാണെങ്കിലും കമ്പനികൾ എത്രത്തോളം മൂലധനം നിക്ഷേപിക്കാൻ തയ്യാറാകുമെന്നതാണ് ഇനി നിർണായകമാകുന്നത്.
