അഖില സുരേഷ്
മഞ്ഞുകാലത്ത് പലര്ക്കും നേരിടേണ്ടി വരുന്ന പ്രധാന പ്രശ്നമാണ് വരണ്ട ചര്മം. ഇത് പലര്ക്കും സൗന്ദര്യ പ്രശ്നം മാത്രമല്ല, ആരോഗ്യ പ്രശ്നം കൂടിയാണ്. ചര്മം വരണ്ടു ചൊറിഞ്ഞ് പൊട്ടുവാനും അസ്വസ്ഥതകളും തിണര്പ്പുമെല്ലാമുണ്ടാകും. ഇതിന് പരിഹാരമായി ഉപയോഗിയ്ക്കാറ് മോയിസ്ചറൈസറുകളാണ്. എന്നാല് ഇവയും പലപ്പോഴും ഗുണം നല്കാറില്ല. ഇത്തരം വരണ്ട ചര്മത്തിന് മരുന്നായി ഗ്ലിസറിന് ഉപയോഗിച്ചുള്ള ഒരു മോയിസ്ചറൈസര് വീട്ടില് തന്നെ തയ്യാറാക്കാം. ചര്മത്തില് മാത്രമല്ല, കാല് വിണ്ടു കീറുന്നതിനും ചുണ്ടിലുമെല്ലാം പുരട്ടാവുന്ന ഒന്നാണിത്.
ഗ്ലിസറിന്
ഇതിനായി വേണ്ടത് നാല് കൂട്ടുകളാണ്. ഗ്ലിസറിന്, കറ്റാര് വാഴ ജെല്, വെളിച്ചെണ്ണ, റോസ് വാട്ടര് എന്നിവയാണ് ഇവ. സ്വാഭാവിക മോയിസ്ചറൈസിംഗ് ഗുണം നല്കുന്ന ഗ്ലിസറിന് പല സോപ്പുകളിലും ചര്മ സംരക്ഷണ വസ്തുക്കളിലുമെല്ലാം ഉപയോഗിയ്ക്കുന്ന ഒന്നാണ്. ഇതിന് സ്വാഭാവികമായ വഴുവഴുപ്പുണ്ട്. യാതൊരു ദോഷവും ചര്മത്തില് വരുത്താത്ത ഒന്നു കൂടിയാണിത്. ചുണ്ടില് പുരട്ടാനും ആരോഗ്യകരമാണ് ഗ്ലിസറിന്. വരണ്ട ചര്മത്തിനുള്ള മികച്ചൊരു മരുന്നാണിത്.
കറ്റാര് വാഴ
കറ്റാര് വാഴ പൊതുവേ ചര്മ സംരക്ഷണത്തിന് മികച്ചതാണ്. ഇതിലെ വൈറ്റമിന് ഇ ചര്മത്തിന് ഏറെ ഗുണം നല്കുന്നു. ഇതിനും സ്വാഭാവിക മോയിസ്ചറൈസിംഗ് ഗുണമുണ്ട്. ഇന്നത്തെ കാലത്ത് കറ്റാര് വാഴ പല സൗന്ദര്യ, മുടി സംരക്ഷണ ക്രീമുകളിലേയും ചേരുവയാണ്. ആരോഗ്യപരമായ ഗുണങ്ങളും ഇതിനേറെയുണ്ട്. ഇത് തികച്ചും സ്വാഭാവിക രൂപത്തില് ഉളളത് എടുക്കുന്നതാണ് നല്ലത്. വാങ്ങുന്നതെങ്കില് ശുദ്ധമായത് നോക്കി വാങ്ങുക.
വെളിച്ചെണ്ണ
ആരോഗ്യകരമായ കൊഴുപ്പടങ്ങിയ വെളിച്ചെണ്ണ എപ്പോഴും നല്ലൊരു മോയിസ്ചറൈസിംഗ് ലോഷനാണ്. മുടിയ്ക്കും ചര്മത്തിനും ചുണ്ടിനുമെല്ലാം ഉപയോഗിയ്ക്കാവുന്ന ഒന്നാണിത്. കൈകാലുകളിലെ മൊരിയ്ക്കും അലര്ജിയ്ക്കുമെല്ലാ നല്ലൊന്നാന്തരം മരുന്നാണ് വെളിച്ചെണ്ണ. ഇത് ശുദ്ധമായത്, അതായത് വിര്ജിന് കോക്കനട്ട് ഓയില് ഉപയോഗിയ്ക്കുന്നതാണ് ഗുണഫലം കിട്ടാന് മികച്ചത്.
പനിനീര്
പനിനീര് അഥവാ റോസ് വാട്ടറും സൗന്ദര്യ, ചര്മ സംരക്ഷണത്തിന് ഉപയോഗിയ്ക്കുന്ന ഒന്നു തന്നെയാണ്. വരണ്ട ചര്മത്തിനായുളള ഈ പ്രത്യേക കൂട്ട് തയ്യാറാക്കാന് ഏറെ എളുപ്പമാണ്. ഇതിനായി ചേരുവകള് എല്ലാം കൂട്ടിച്ചേര്ക്കാം. നമുക്ക് ആവശ്യത്തിനുള്ള അളവില് എടുത്താല് മതിയാകും. ചിലര്ക്ക് വല്ലാത്ത എണ്ണമയം ഇഷ്ടമാകില്ല. ഇതിന് അനുസരിച്ച് വെളിച്ചെണ്ണ, ഗ്ലിസറിന് എന്നിവയുടെ അളവ് കുറവെടുക്കാം. വല്ലാതെ വരണ്ട ചര്മമെങ്കില് ഇത് കൂടുതല് എടുക്കാം. ഇതെല്ലാം കൂട്ടിക്കലര്ത്തി ലോഷനുണ്ടാക്കാം. ഇത് ചര്മത്തിനും ഉപ്പുറ്റിയിലും ചുണ്ടിലുമെല്ലാം പുരട്ടാം.