ടൊറന്റോ: ഒന്റാരിയോയിലെ ഹൈസ്കൂൾ വിദ്യാർത്ഥികൾക്കിടയിൽ ക്ലാസുകൾ ഒഴിവാക്കുന്ന പ്രവണത വർദ്ധിക്കുന്ന പശ്ചാത്തലത്തിൽ കടുത്ത നടപടിയുമായി ഫോർഡ് സർക്കാർ. വിദ്യാർത്ഥികളുടെ അവസാന ഗ്രേഡിന്റെ 15 ശതമാനം വരെ ഹാജർ നിലയെ അടിസ്ഥാനമാക്കി നൽകാനാണ് സർക്കാർ ആലോചിക്കുന്നത്. ക്ലാസ് മുറികളിൽ വിദ്യാർത്ഥികളുടെ സാന്നിധ്യം ഉറപ്പാക്കുകയാണ് ലക്ഷ്യമെന്ന് വിദ്യാഭ്യാസ മന്ത്രി പോൾ കലാൻഡ്ര വ്യക്തമാക്കി.
സർക്കാർ പുറത്തുവിട്ട കണക്കുകൾ പ്രകാരം, കഴിഞ്ഞ അധ്യയന വർഷം 90 ശതമാനം ഹാജർ രേഖപ്പെടുത്തിയത് വെറും 40 ശതമാനം സെക്കൻഡറി സ്കൂൾ വിദ്യാർത്ഥികൾ മാത്രമാണ്. 2018-ൽ ഇത് 60 ശതമാനമായിരുന്നു. കോവിഡ് കാലത്തിന് ശേഷം ഹാജർ നില സാധാരണ നിലയിലേക്ക് തിരിച്ചെത്തിയിട്ടില്ലെന്നാണ് വിദ്യാഭ്യാസ മന്ത്രാലയത്തിന്റെ വിലയിരുത്തൽ.
എന്തുകൊണ്ട് വിദ്യാർത്ഥികൾ സ്കൂളിൽ എത്തുന്നില്ല?
ഹാജർക്കുറവിന് പിന്നിൽ പ്രധാനമായും മൂന്ന് കാരണങ്ങളാണ് വിദഗ്ദ്ധർ ചൂണ്ടിക്കാണിക്കുന്നത്. യുവാക്കൾക്കിടയിൽ വർദ്ധിച്ചുവരുന്ന മാനസികാരോഗ്യ വെല്ലുവിളികളാണ് കുട്ടികൾ സ്കൂളിൽ നിന്ന് വിട്ടുനിൽക്കാൻ പ്രധാന കാരണമെന്ന് വിദ്യാഭ്യാസ കൺസൾട്ടന്റായ റെബേക്ക ഗ്രീവ്സ് പറയുന്നു.
കോവിഡ് കാലത്തിന് ശേഷം സ്കൂളിന് പുറത്തും വിദ്യാഭ്യാസം സാധ്യമാണെന്ന ചിന്ത കുട്ടികൾക്കിടയിൽ വർദ്ധിച്ചു.
പാഠഭാഗങ്ങളും കുറിപ്പുകളും ഓൺലൈനായി ലഭിക്കുന്നത് കുട്ടികളെ ക്ലാസിൽ നേരിട്ടെത്തുന്നതിൽ നിന്ന് പിന്തിരിപ്പിക്കുന്നു.
ഹാജറിന് മാർക്ക് നൽകുന്നത് മാനസികാരോഗ്യ പ്രശ്നങ്ങളോ കുടുംബപരമായ ബുദ്ധിമുട്ടുകളോ നേരിടുന്ന കുട്ടികളെ ‘ശിക്ഷിക്കുന്നതിന്’ തുല്യമാകുമെന്ന് വിമർശനമുയരുന്നുണ്ട്. ഗതാഗത പ്രശ്നങ്ങൾ, സാമ്പത്തിക ബുദ്ധിമുട്ടുകൾ തുടങ്ങിയ കാരണങ്ങളാൽ സ്കൂളിൽ എത്താൻ കഴിയാത്ത വിദ്യാർത്ഥികളെ ഈ തീരുമാനം പ്രതികൂലമായി ബാധിക്കുമെന്ന് ടൊറന്റോ സർവകലാശാലയിലെ വിദഗ്ദ്ധർ ചൂണ്ടിക്കാട്ടുന്നു.
അതേസമയം, അസുഖം, മതപരമായ അവധി എന്നിവയ്ക്ക് ഇളവുകൾ നൽകുമെന്നും പ്രവിശ്യാ സർക്കാർ അറിയിച്ചിട്ടുണ്ട്.
