ഓട്ടവ: കാനഡയുടെ സമ്പദ്വ്യവസ്ഥാ വളർച്ചാ നിരക്കിനേക്കാൾ വേഗത്തിൽ ടൂറിസം മേഖല മുന്നേറുന്നതായി ഡെസ്റ്റിനേഷൻ കാനഡ അറിയിച്ചു. 2026-ൽ രാജ്യം ടൂറിസം രംഗത്ത് മികച്ച നേട്ടങ്ങൾ കൈവരിക്കുമെന്നും ആഗോള ടൂറിസം വിപണിയിൽ വലിയൊരു പങ്ക് കാനഡ സ്വന്തമാക്കുമെന്നുമുള്ള റിപ്പോർട്ടാണ് പുറത്തുവിട്ടത്. 2025-നെ അപേക്ഷിച്ച് ടൂറിസം മേഖലയിൽ നിന്നുള്ള വരുമാനത്തിൽ 6 ശതമാനം വർധനയാണ് ഈ വർഷം പ്രതീക്ഷിക്കുന്നത്. ഇത് ഏകദേശം 140.9 ബില്യൺ ഡോളറിൽ എത്തുമെന്നാണ് കണക്കാക്കുന്നത്. 2035-ഓടെ ടൂറിസം വരുമാനം 216.3 ബില്യൺ ഡോളറായി ഉയരുമെന്ന് പ്രതീക്ഷിക്കുന്നു. ഇത് 2024-ലെ വരുമാനത്തേക്കാൾ 67 ശതമാനം കൂടുതലാണ്.
കാനഡയിലെ പത്തിൽ ഒന്ന് എന്ന കണക്കിൽ തൊഴിലവസരങ്ങൾ സൃഷ്ടിക്കുന്നത് ടൂറിസം മേഖലയാണ്. കഴിഞ്ഞ വർഷം മാത്രം മുനിസിപ്പൽ, പ്രൊവിൻഷ്യൽ, ഫെഡറൽ നികുതിയിനത്തിൽ 32.7 ബില്യൺ ഡോളറാണ് ഈ മേഖല നൽകിയത്.കാനഡയിലുള്ളവർ വിദേശയാത്രകൾക്ക് പകരം സ്വന്തം രാജ്യത്തിനുള്ളിലെ വിനോദസഞ്ചാര കേന്ദ്രങ്ങൾ തിരഞ്ഞെടുക്കുന്നത് ഈ വളർച്ചയ്ക്ക് പ്രധാന കാരണമാണെന്നും റിപ്പോർട്ട് വിലയിരുത്തുന്നു.
കഴിഞ്ഞ വർഷത്തെ അപേക്ഷിച്ച് കനേഡിയൻ നിവാസികൾ അമേരിക്കയിലേക്ക് നടത്തുന്ന യാത്രകളിൽ 12.5 ശതമാനം കുറവുണ്ടായതായി സ്റ്റാറ്റിസ്റ്റിക്സ് കാനഡയുടെ ഫെബ്രുവരിയിലെ കണക്കുകൾ വ്യക്തമാക്കുന്നു. തുടർച്ചയായ 14-ാം മാസമാണ് ഈ കുറവ് രേഖപ്പെടുത്തുന്നത്. അതേസമയം, അമേരിക്കയിൽ നിന്ന് കാനഡയിലേക്കുള്ള സഞ്ചാരികളുടെ എണ്ണത്തിൽ 5.9 ശതമാനവും മറ്റു രാജ്യങ്ങളിൽ നിന്നുള്ള സഞ്ചാരികളുടെ എണ്ണത്തിൽ 7.5 ശതമാനവും വർധനയുണ്ടായി. രാജ്യാന്തര വിനോദസഞ്ചാര വിപണിയിലെ 2.1 ട്രില്യൺ ഡോളറിന്റെ നിക്ഷേപ സാധ്യതകൾ പ്രയോജനപ്പെടുത്താനുള്ള തയ്യാറെടുപ്പിലാണെന്നും റിപ്പോർട്ട് പറയുന്നു.
