ഇലക്ട്രിക് വാഹന വിപണിയിലെ കടുത്ത വെല്ലുവിളികളെ അതിജീവിച്ച് ഒല ഇലക്ട്രിക് ഓഹരികള് വിപണിയില് ശക്തമായ തിരിച്ചുവരവ് നടത്തുന്നു. സര്വീസ് സംബന്ധമായ പരാതികളും വിപണിയിലെ മത്സരവും കാരണം തിരിച്ചടി നേരിട്ട കമ്പനി, കഴിഞ്ഞ ഒരു മാസത്തിനിടെ ഓഹരി വിലയില് 60 ശതമാനത്തോളം വര്ധനവാണ് രേഖപ്പെടുത്തിയത്. മാര്ച്ച് മാസത്തില് 22.25 രൂപ എന്ന റെക്കോര്ഡ് താഴ്ചയിലേക്ക് വീണ ഓഹരി നിലവില് 36.56 രൂപ നിലവാരത്തിലാണ് വ്യാപാരം തുടരുന്നത്. ഏപ്രില് മാസത്തിലെ മികച്ച വില്പന കണക്കുകളാണ് ഈ മുന്നേറ്റത്തിന് പ്രധാനമായും കരുത്തുപകര്ന്നത്.
സ്വന്തമായി വികസിപ്പിച്ച ലിഥിയം അയണ് ഫോസ്ഫേറ്റ് (ഭാരത് 4680) ബാറ്ററികളും സര്വീസ് സെന്ററുകളുടെ എണ്ണം വര്ധിപ്പിച്ചതുമാണ് ഒലയുടെ ഈ കുതിപ്പിന് പിന്നിലെ പ്രധാന ഘടകങ്ങള്. ഏപ്രില് മാസത്തില് മറ്റ് പ്രമുഖ ഇലക്ട്രിക് ഇരുചക്ര വാഹന ബ്രാന്ഡുകള് വില്പനയില് ഇടിവ് രേഖപ്പെടുത്തിയപ്പോള്, ഒല 20 ശതമാനം വളര്ച്ചയോടെ 12,166 യൂണിറ്റുകള് വിറ്റഴിച്ച് വിപണിയില് ആധിപത്യം ഉറപ്പിച്ചു. ആഗോള വിപണിയിലെ ക്രൂഡ് ഓയില് വില വര്ധനവും പെട്രോള് ലഭ്യതയിലെ ആശങ്കകളും ഉപഭോക്താക്കളെ കൂടുതല് ഇലക്ട്രിക് വാഹനങ്ങളിലേക്ക് ആകര്ഷിക്കുന്നതും ഒലയ്ക്ക് ഗുണകരമായി.
എങ്കിലും, കമ്പനിയുടെ പ്രതിസന്ധികള് പൂര്ണ്ണമായും ഒഴിഞ്ഞിട്ടില്ലെന്നാണ് സാമ്പത്തിക വിദഗ്ധരുടെ വിലയിരുത്തല്. സര്വീസ് സംബന്ധമായ പരാതികള് ഇപ്പോഴും പൂര്ണ്ണമായി പരിഹരിക്കപ്പെടാത്തത് ഒരു വലിയ വെല്ലുവിളിയായി തുടരുന്നു. വരും മാസങ്ങളിലെ ബുക്കിംഗ് നിരക്കും വില്പനയും കൂടി വിലയിരുത്തിയാല് മാത്രമേ ദീര്ഘകാലാടിസ്ഥാനത്തിലുള്ള ഓഹരിയുടെ സ്ഥിരത ഉറപ്പിക്കാനാവൂ. എന്നിരുന്നാലും, സര്വീസ് വേഗത വര്ധിപ്പിച്ചതും പാര്ട്സുകളുടെ ലഭ്യത ഉറപ്പാക്കിയതും വരും ദിവസങ്ങളില് ഒല ഓഹരികള്ക്ക് കൂടുതല് ആത്മവിശ്വാസം നല്കുമെന്നാണ് നിക്ഷേപകരുടെ പ്രതീക്ഷ.
