ഓട്ടവ: റഷ്യൻ ഭീഷണികളെ നേരിടുന്നതിൽ ബാൾട്ടിക്-നോർഡിക് രാജ്യങ്ങളുടെ അനുഭവം കാനഡ മാതൃകയാക്കണമെന്ന് അന്താരാഷ്ട്ര നയതന്ത്ര പ്രതിനിധികൾ. ഓട്ടവയിൽ പോളിഷ് എംബസി സംഘടിപ്പിച്ച ചർച്ചയിൽ, റഷ്യയുടെ നിലവിലെ അട്ടിമറി നീക്കങ്ങൾ ഭാവിയിൽ കാനഡയുടെ ആർട്ടിക് മേഖലയിൽ നടപ്പിലാക്കാൻ സാധ്യതയുള്ള തന്ത്രങ്ങളുടെ മുന്നോടിയാണെന്ന് യൂറോപ്യൻ ഉദ്യോഗസ്ഥർ മുന്നറിയിപ്പ് നൽകി. റെയിൽ പാളങ്ങളിൽ ബോംബ് സ്ഥാപിക്കൽ, ഊർജ്ജ-വാർത്താവിനിമയ ശൃംഖലകൾക്ക് നേരെയുള്ള ഡ്രോൺ ആക്രമണങ്ങൾ, സൈബർ യുദ്ധം എന്നിവയിലൂടെ റഷ്യ യൂറോപ്യൻ സുരക്ഷയെ വെല്ലുവിളിക്കുകയാണെന്ന് പോളിഷ് അംബാസഡർ വിറ്റോൾഡ് ഡിസെൽസ്കി ചൂണ്ടിക്കാട്ടി.
റഷ്യൻ ഹൈബ്രിഡ് ആക്രമണങ്ങളെ നേരിടാൻ സ്വീഡൻ നടപ്പിലാക്കുന്ന ‘ടോട്ടൽ ഡിഫൻസ് സിസ്റ്റം’ കാനഡയ്ക്കും ഗുണകരമാകുമെന്ന് സ്വീഡിഷ് അംബാസഡർ സിഗ്നെ ബർഗ്സ്റ്റാളർ പറഞ്ഞു. സൈനിക പ്രതിരോധത്തിനപ്പുറം, സാധാരണ പൗരന്മാർക്കും ബിസിനസ് സ്ഥാപനങ്ങൾക്കും അടിയന്തര സാഹചര്യങ്ങളെ നേരിടാൻ പരിശീലനം നൽകുന്ന ഈ പദ്ധതി രാജ്യത്തിന്റെ പ്രതിരോധശേഷി വർദ്ധിപ്പിക്കുന്നു. റഷ്യയുടെ ലക്ഷ്യം നാറ്റോ സഖ്യകക്ഷികളുടെ ഐക്യം തകർക്കുക എന്നതാണെന്നും, ഇതിനെതിരെ ആഗോളതലത്തിൽ ഒറ്റക്കെട്ടായി നിൽക്കണമെന്നും ചർച്ചയിൽ ആവശ്യമുയർന്നു.
കാനഡയുടെ ഭൗമഭാഗത്തിന്റെ 40 ശതമാനത്തോളം ആർട്ടിക് മേഖലയിലാണെങ്കിലും ഭീഷണികൾ ദൂരെയാണെന്ന മിഥ്യാധാരണയിലാണ് പല കാനഡക്കാരും എന്ന് ലിബറൽ എംപി അഹമ്മദ് ഹുസൈൻ അഭിപ്രായപ്പെട്ടു. പ്രവിശ്യാ ഭരണകൂടങ്ങളുടെ ആരോഗ്യ-വിദ്യാഭ്യാസ മേഖലകളിലെ ഡിജിറ്റൽ സംവിധാനങ്ങൾ സൈബർ ആക്രമണങ്ങൾക്ക് ഇരയാകാൻ സാധ്യതയുള്ളത് വലിയ ആശങ്കയാണ്. ആർട്ടിക് മേഖലയുടെ സുരക്ഷ ഉറപ്പാക്കുന്നതിനും റഷ്യയുടെ കടന്നുകയറ്റങ്ങൾ ചെറുക്കുന്നതിനും സഖ്യകക്ഷികളുമായുള്ള വിവരശേഖരണവും സഹകരണവും കൂടുതൽ ശക്തമാക്കാനാണ് കാനഡയുടെ തീരുമാനം.
