ഡല്ഹി: സൗത്ത് ഡല്ഹിയിലെ മാല്വിയ നഗറിലുള്ള ബഹുനില റസ്റ്റോറന്റിന് തീപിടിച്ച് 20 പേര് വെന്തുമരിച്ചു. ഹൗസ് റാണി പരിസരത്ത് സ്ഥിതി ചെയ്യുന്ന പ്രമുഖ ലെമണ് ഗ്രീന് റസ്റ്റോറന്റിലാണ് നാടിനെ നടുക്കിയ വന് ദുരന്തമുണ്ടായത്. കൊല്ലപ്പെട്ടവരില് വിദേശികളുമുണ്ടെന്നാണ് പ്രാഥമിക റിപ്പോര്ട്ടുകള് സൂചിപ്പിക്കുന്നത്. പ്രദേശത്ത് നിലവില് അഗ്നിശമന സേനയുടെയും പൊലീസിന്റെയും നേതൃത്വത്തില് വിപുലമായ രക്ഷാപ്രവര്ത്തനം തുടരുകയാണ്.
രാവിലെ 9:45 ഓടെയാണ് റസ്റ്റോറന്റില് തീപിടിത്തമുണ്ടായതായി അധികൃതര്ക്ക് വിവരം ലഭിക്കുന്നത്. ഉടന് തന്നെ അഗ്നിശമന സേനാംഗങ്ങള് സ്ഥലത്തെത്തി അതിവേഗത്തില് രക്ഷാപ്രവര്ത്തനം ആരംഭിക്കുകയായിരുന്നു. സിഎടിഎസ് (CATS) ആംബുലന്സുകളുടെ സഹായത്തോടെ കെട്ടിടത്തിനുള്ളില് കുടുങ്ങിയ 37 പേരെ പരിക്കുകളോടെ രക്ഷപ്പെടുത്തി വിവിധ ആശുപത്രികളിലേക്ക് മാറ്റിയിട്ടുണ്ടെന്ന് ഉദ്യോഗസ്ഥര് സ്ഥിരീകരിച്ചു.
ഡല്ഹി ഫയര് സര്വീസസ് നല്കുന്ന വിവരമനുസരിച്ച്, റസ്റ്റോറന്റിന്റെ ബേസ്മെന്റില് നിന്ന് ആദ്യം മൂന്ന് പേരെയാണ് പരിക്കുകളോടെ രക്ഷപ്പെടുത്തി ആശുപത്രിയില് പ്രവേശിപ്പിച്ചത്. റസ്റ്റോറന്റിലേക്ക് പടര്ന്ന തീപിടിത്തത്തിന്റെ കൃത്യമായ കാരണം എന്താണെന്ന് ഇതുവരെ വ്യക്തമായിട്ടില്ല. നിലവില് തീ പൂര്ണ്ണമായും നിയന്ത്രണവിധേയമാക്കിയിട്ടുണ്ടെങ്കിലും, കെട്ടിടത്തിനുള്ളില് ഇനിയും ആരെങ്കിലും കുടുങ്ങിക്കിടക്കുന്നുണ്ടോ എന്ന് ഉറപ്പുവരുത്താന് അധികൃതര് ഊര്ജ്ജിതമായ തിരച്ചില് നടത്തിവരികയാണ്.
