‘കോണ്ടോ കണ്‍വേര്‍ഷന്‍’ പദ്ധതിക്കെതിരെ പിയേര്‍ പൊളിയേവ്; ഡെവലപ്പര്‍മാരെ സഹായിക്കാനുള്ള ‘ബെയ്ലൗട്ട്’ പാക്കേജെന്ന് വിമര്‍ശനം

ഓട്ടവ: കാനഡയിലെ ശൂന്യമായി കിടക്കുന്ന കോണ്ടോമിനിയം അപ്പാര്‍ട്ട്‌മെന്റുകള്‍ വാങ്ങി മിതമായ നിരക്കിലുള്ള ഭവനങ്ങളാക്കി മാറ്റാനുള്ള ഫെഡറല്‍-ബ്രിട്ടിഷ് കൊളംബിയ സര്‍ക്കാരുകളുടെ പുതിയ പദ്ധതിക്കെതിരെ കടുത്ത വിമര്‍ശനവുമായി കണ്‍സര്‍വേറ്റീവ് പാര്‍ട്ടി നേതാവ് പിയേര്‍ പൊളിയേവ്. വന്‍കിട റിയല്‍ എസ്റ്റേറ്റ് ഡെവലപ്പര്‍മാരെ സഹായിക്കാനുള്ള ഈ സാമ്പത്തിക രക്ഷാപാക്കേജ് ഉടനടി റദ്ദാക്കണമെന്ന് അദ്ദേഹം ആവശ്യപ്പെട്ടു. ലിബറല്‍ പാര്‍ട്ടിയിലെ വന്‍കിട അധികാര ഇടനിലക്കാര്‍ക്ക് വേണ്ടി മാത്രമാണ് പ്രധാനമന്ത്രി മാര്‍ക്ക് കാര്‍ണി ഇത്തരം പാക്കേജുകള്‍ പ്രഖ്യാപിക്കുന്നതെന്നും പൊളിയേവ് കുറ്റപ്പെടുത്തി.

കഴിഞ്ഞ വ്യാഴാഴ്ചയാണ് പ്രധാനമന്ത്രി മാര്‍ക്ക് കാര്‍ണിയും ബി.സി. പ്രീമിയര്‍ ഡേവിഡ് എബിയും ചേര്‍ന്ന് ‘ബില്‍ഡ് കമ്മ്യൂണിറ്റീസ് സ്‌ട്രോങ്ങ് ഫണ്ട്’ (Build Communities Strong Fund) വഴി ബി.സി.യിലെ പ്രാദേശിക അടിസ്ഥാന സൗകര്യ വികസനത്തിനായി അടുത്ത 10 വര്‍ഷത്തിനുള്ളില്‍ 5 ബില്യണ്‍ ഡോളറിലധികം നിക്ഷേപിക്കുമെന്ന് പ്രഖ്യാപിച്ചത്. ഇതിന്റെ ഭാഗമായാണ് 2,200ലധികം ഒഴിഞ്ഞുകിടക്കുന്ന കോണ്ടോ യൂണിറ്റുകള്‍ കുറഞ്ഞ നിരക്കിലുള്ള വീടുകളാക്കി മാറ്റാന്‍ ‘കോണ്ടോ കണ്‍വേര്‍ഷന്‍’ പദ്ധതി പ്രഖ്യാപിച്ചത്. ഭവനലഭ്യത അതിവേഗം വര്‍ധിപ്പിക്കാനുള്ള ഏറ്റവും കാര്യക്ഷമമായ മാര്‍ഗ്ഗമാണിതെന്നാണ് പ്രധാനമന്ത്രിയുടെ ഓഫീസ് വ്യക്തമാക്കുന്നത്. എന്നാല്‍ മന്ദഗതിയിലായ റിയല്‍ എസ്റ്റേറ്റ് വിപണിയില്‍ വില കുറയ്ക്കാന്‍ തയ്യാറാകാത്ത വന്‍കിട ബില്‍ഡര്‍മാരെ സഹായിക്കാനാണ് ഈ പദ്ധതിയെന്ന് ഹൗസിങ് വിദഗ്ധരും ചൂണ്ടിക്കാണിക്കുന്നു.

ഡെവലപ്പര്‍മാരുടെ ബിസിനസ്സ് തകര്‍ച്ചയുടെ ഭാരം പൊതുജനങ്ങളുടെ നികുതിപ്പണത്തില്‍ നിന്ന് ഈടാക്കുന്നത് അന്യായമാണെന്ന് പൊളിയേവ് പറഞ്ഞു. ലാഭം സ്വകാര്യ കമ്പനികള്‍ക്കും നഷ്ടം പൊതുജനങ്ങള്‍ക്കും എന്ന നയമാണ് പ്രധാനമന്ത്രിയുടേത്. വില കുറയുന്നത് വരെ വിപണിക്ക് അനുസരിച്ച് കാത്തിരിക്കുകയാണ് യഥാര്‍ത്ഥ സാമ്പത്തിക തന്ത്രമെന്നും അദ്ദേഹം കൂട്ടിച്ചേര്‍ത്തു. കാനഡ മോര്‍ഗേജ് ആന്‍ഡ് ഹൗസിങ് കോര്‍പ്പറേഷന്റെ (CMHC) കണക്കുകള്‍ പ്രകാരം വന്‍കൂവറില്‍ മാത്രം നിലവില്‍ നിര്‍മ്മാണം പൂര്‍ത്തിയായി ശൂന്യമായി കിടക്കുന്ന കോണ്ടോകളുടെ എണ്ണം കഴിഞ്ഞ വര്‍ഷത്തെ അപേക്ഷിച്ച് 76 ശതമാനം വര്‍ധിച്ച് 4,376 ആയി ഉയര്‍ന്നിട്ടുണ്ട്.

വര്‍ഷങ്ങളോളം ശൂന്യമായി കിടക്കാവുന്ന ഈ കെട്ടിടങ്ങള്‍ കൃത്യമായ സാമ്പത്തിക സംവിധാനങ്ങളിലൂടെ സാധാരണക്കാര്‍ക്ക് താങ്ങാനാവുന്ന വീടുകളാക്കി മാറ്റുകയാണ് തങ്ങളുടെ ലക്ഷ്യമെന്ന് പ്രധാനമന്ത്രി മാര്‍ക്ക് കാര്‍ണി വ്യക്തമാക്കി. എന്നാല്‍ വിപണി വിലയേക്കാള്‍ കുറഞ്ഞ നിരക്കിലാണോ ഈ കെട്ടിടങ്ങള്‍ സര്‍ക്കാര്‍ വാങ്ങുന്നത് എന്ന കാര്യം അദ്ദേഹം വ്യക്തമാക്കിയില്ല. ഈ പദ്ധതി റദ്ദാക്കുന്നതിനൊപ്പം, കാനഡയില്‍ വീട് നിര്‍മ്മാണം വേഗത്തിലാക്കണമെന്നും വീടുകള്‍ക്ക് മേലുള്ള നികുതികള്‍ പൂര്‍ണ്ണമായി ഒഴിവാക്കണമെന്നുമാണ് കണ്‍സര്‍വേറ്റീവ് പാര്‍ട്ടിയുടെ നിലപാട്. ബില്‍ഡര്‍മാര്‍ മുന്‍സിപ്പാലിറ്റികള്‍ക്ക് നല്‍കേണ്ട ചാര്‍ജ്ജുകളില്‍ 50 ശതമാനം വരെ ഇളവ് നല്‍കാനും ഈ പുതിയ കരാറില്‍ വ്യവസ്ഥയുണ്ട്.