ഓട്ടവ: കാനഡ പാര്ലമെന്റിന്റെ ഉപരിസഭയായ സെനറ്റിലേക്ക് (Senate) പുതിയ നിയമനങ്ങള് നടത്തി പ്രധാനമന്ത്രി മാര്ക്ക് കാര്ണി. മുന് പ്രധാനമന്ത്രി ജസ്റ്റിന് ട്രൂഡോ കൊണ്ടുവന്ന ‘രാഷ്ട്രീയ നിഷ്പക്ഷത’ (Nonpartisanship) എന്ന കര്ശന മാനദണ്ഡത്തില് വലിയ മാറ്റങ്ങള് വരുത്തിക്കൊണ്ടാണ് കാര്ണിയുടെ പുതിയ നീക്കം. കാനഡയുടെ തന്ത്രപ്രധാന വ്യവസായങ്ങള്, സാമ്പത്തിക-സാമൂഹിക മേഖലകള്, നിയമസംവിധാനങ്ങള് എന്നിവയില് മികച്ച വൈദഗ്ധ്യമുള്ളവര്ക്ക് മുന്ഗണന നല്കാനാണ് പുതിയ തീരുമാനമെന്ന് പ്രധാനമന്ത്രിയുടെ ഓഫീസ് വ്യക്തമാക്കി.
രാഷ്ട്രീയ പരിചയമുള്ളവര് നിയമനിര്മ്മാണ സഭകളില് ഉണ്ടാകുന്നത് ഗുണം ചെയ്യുമെന്ന വിലയിരുത്തലിന്റെ അടിസ്ഥാനത്തിലാണ് ഈ മാറ്റം. എന്നാല്, ഇത് സെനറ്റിനെ വീണ്ടും പഴയതുപോലെ പാര്ട്ടി അനുഭാവികള്ക്ക് പദവികള് വെച്ചുമാറുന്ന ഒരു രാഷ്ട്രീയ കേന്ദ്രമാക്കി മാറ്റുമോ എന്ന ആശങ്കയും ഉയരുന്നുണ്ട്.
മാര്ക്ക് കാര്ണി പ്രഖ്യാപിച്ച ആദ്യ നാല് സെനറ്റ് നിയമനങ്ങളില് പ്രമുഖ രാഷ്ട്രീയ പശ്ചാത്തലമുള്ള രണ്ട് പേര് ഇടംപിടിച്ചു. ലിബറല് പാര്ട്ടിയുടെ മുതിര്ന്ന തന്ത്രജ്ഞനും പ്രധാനമന്ത്രി മാര്ക്ക് കാര്ണിയുടെ ഓഫീസിലെ ഉദ്യോഗസ്ഥനുമായിരുന്ന ടോം പിറ്റ്ഫീല്ഡും, കണ്സര്വേറ്റീവ് പാര്ട്ടിയുടെ കെബെക്കില് നിന്നുള്ള പാര്ലമെന്റ് അംഗമായിരുന്ന റിച്ചാര്ഡ് മാര്ട്ടലും. റിച്ചാര്ഡ് മാര്ട്ടലിനെ അപ്രതീക്ഷിതമായാണ് കാര്ണി സെനറ്റിലേക്ക് തിരഞ്ഞെടുത്തത്.
നിലവില് ഇരുവരും സ്വതന്ത്ര അംഗങ്ങളായിട്ടായിരിക്കും സെനറ്റില് പ്രവര്ത്തിക്കുക. ട്രൂഡോയുടെ കാലത്ത് സെനറ്റ് കടുത്ത രാഷ്ട്രീയ സ്വാധീനത്തില് നിന്ന് മുക്തമാവുകയും, മുന് സര്ക്കാരുകളുടെ കാലത്തെ അപേക്ഷിച്ച് കൂടുതല് ഗവണ്മെന്റ് ബില്ലുകളില് ഭേദഗതികള് വരുത്തിക്കൊണ്ട് ശക്തമായ മേല്നോട്ട ചുമതല വഹിക്കുകയും ചെയ്തിരുന്നു. ഈ സ്വതന്ത്ര സ്വഭാവം നിലനിര്ത്തിക്കൊണ്ടുതന്നെ സെനറ്റിന്റെ ദീര്ഘകാല താല്പര്യങ്ങള് സംരക്ഷിക്കാനാണ് താന് ശ്രമിക്കുന്നതെന്ന് മാര്ക്ക് കാര്ണി വ്യക്തമാക്കി.
