ഭോപ്പാൽ: കേണൽ സോഫിയ ഖുറേഷിക്കെതിരെ വിവാദ പരാമർശം നടത്തിയ മധ്യപ്രദേശ് ബിജെപി മന്ത്രി കുൻവർ വിജയ് ഷായെ പ്രോസിക്യൂട്ട് ചെയ്യാൻ അനുമതി നൽകേണ്ടതില്ലെന്ന് സംസ്ഥാന സർക്കാർ. ഇക്കാര്യം സുപ്രീംകോടതിയെ ഉടൻ അറിയിച്ചേക്കും. മന്ത്രിക്കെതിരെ പരാതി നൽകിയ വ്യക്തിയില്ലെന്നതാണ് സർക്കാരിന്റെ പ്രധാന വാദം. സംസ്ഥാന സർക്കാർ എടുത്ത തീരുമാനം ഗവർണർ മംഗുഭായ് പട്ടേൽ അംഗീകരിച്ചിട്ടുണ്ട്.
മന്ത്രിക്കെതിരെ എഫ്ഐആർ രജിസ്റ്റർ ചെയ്യാൻ കോടതി നേരത്തെ നിർദേശം നൽകിയിരുന്നു. എന്നാൽ പ്രോസിക്യൂഷൻ നടപടികളുമായി മുന്നോട്ടുപോകാൻ സംസ്ഥാന സർക്കാരിന്റെ അനുമതി ആവശ്യമായിരുന്നു. ഈ അനുമതി നൽകേണ്ടതില്ലെന്നാണ് സർക്കാർ നിലപാട്.
വിജയ് ഷാ വിവാദ പരാമർശത്തിൽ പിന്നീട് മാപ്പ് പറഞ്ഞിട്ടുണ്ടെന്നും പ്രസംഗത്തിൽ സോഫിയ ഖുറേഷിയുടെ പേര് നേരിട്ട് പരാമർശിച്ചിട്ടില്ലെന്നും സർക്കാർ വാദിച്ചേക്കും. ഈ വിശദീകരണങ്ങൾ ഉൾപ്പെടെ സുപ്രീംകോടതിയിൽ നിലപാട് അറിയിക്കാനാണ് നീക്കം.
പഹൽഗാം ആക്രമണത്തിന് പിന്നാലെയായിരുന്നു വിവാദ പരാമർശം
ഇൻഡോർ ജില്ലയിലെ മഹുവിൽ നടന്ന സർക്കാർ പരിപാടിക്കിടെയായിരുന്നു വിജയ് ഷായുടെ വിവാദ പരാമർശം. പഹൽഗാം ഭീകരാക്രമണത്തിന് ഇന്ത്യ നൽകിയ തിരിച്ചടിയെയും പ്രധാനമന്ത്രി നരേന്ദ്ര മോദിയുടെ ഇടപെടലിനെയും അഭിനന്ദിക്കുന്നതിനിടെയായിരുന്നു പരാമർശം.
ഭീകരവാദികൾ ഇന്ത്യൻ സ്ത്രീകളെ അപമാനിച്ചുവെന്നും അതിന് മറുപടി നൽകാൻ അതേ സമുദായത്തിൽനിന്നുള്ള ഒരു സഹോദരിയെ അയച്ചുവെന്നുമായിരുന്നു മന്ത്രിയുടെ പ്രസംഗത്തിലെ പരാമർശം. ഓപ്പറേഷൻ സിന്ദൂറുമായി ബന്ധപ്പെട്ട വാർത്താസമ്മേളനങ്ങൾക്ക് നേതൃത്വം നൽകിയവരിൽ ഒരാളായിരുന്നു കേണൽ സോഫിയ ഖുറേഷി.
മന്ത്രിയുടെ പ്രസംഗത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ സംഭവം വലിയ വിവാദമായി. വിമർശനം ശക്തമായതിനെ തുടർന്ന് തന്റെ വാക്കുകൾ വളച്ചൊടിച്ചുവെന്ന് വിശദീകരിച്ച് വിജയ് ഷാ രംഗത്തെത്തിയിരുന്നു.
മന്ത്രിയുടെ ക്ഷമാപണത്തിലും കോടതിക്ക് അതൃപ്തി
കേസിന്റെ മുൻ പരിഗണനയ്ക്കിടെ മന്ത്രിയുടെ നിലപാടിനെതിരെ സുപ്രീംകോടതി രൂക്ഷ വിമർശനം ഉന്നയിച്ചിരുന്നു. പരാമർശത്തിൽ മതിയായ രീതിയിൽ മാപ്പ് പറയാതെ മന്ത്രി കോടതിയുടെ ക്ഷമ പരീക്ഷിക്കുകയാണെന്ന് ജസ്റ്റിസ് സൂര്യകാന്ത്, ജസ്റ്റിസ് ജോയ്മല്യ ബാഗ്ചി എന്നിവരടങ്ങിയ ബെഞ്ച് നിരീക്ഷിച്ചിരുന്നു.
മന്ത്രി ഓൺലൈനിലൂടെ നടത്തിയ ക്ഷമാപണത്തെയും ബെഞ്ച് വിമർശിച്ചിരുന്നു. ഷാ പരസ്യമായി ക്ഷമാപണം നടത്തിയിട്ടുണ്ടെന്നും അത് ഓൺലൈനിൽ ലഭ്യമാണെന്നും അഭിഭാഷകൻ കെ. പരമേശ്വരർ കോടതിയെ അറിയിച്ചിരുന്നു.
എന്നാൽ ഇപ്പോൾ പ്രോസിക്യൂഷന് അനുമതി നൽകേണ്ടതില്ലെന്ന സംസ്ഥാന സർക്കാരിന്റെ തീരുമാനം കേസിൽ പുതിയ നിയമപോരാട്ടത്തിന് വഴിവെക്കാനാണ് സാധ്യത. സുപ്രീംകോടതിയുടെ തുടർനടപടിയാണ് ഇനി നിർണായകം.
