ഒന്റാരിയോ: ഒന്റാരിയോ ഇമിഗ്രന്റ് നോമിനി പ്രോഗ്രാമിന് (OINP) കീഴില്‍ ഉയര്‍ന്ന വരുമാനമുള്ള ഉദ്യോഗാര്‍ത്ഥികള്‍ക്ക് നല്‍കുന്ന പോയിന്റുകള്‍ വര്‍ധിപ്പിച്ചു. കാനഡയില്‍ ജോലി ചെയ്യുന്ന വിദഗ്ധരായ വിദേശ തൊഴിലാളികള്‍ക്ക് കനേഡിയന്‍ പെര്‍മനന്റ് റെസിഡന്‍സിക്ക് (PR) നാമനിര്‍ദ്ദേശം ലഭിക്കാനുള്ള സാധ്യത ഉയര്‍ത്തുന്നതാണ് ഈ നീക്കം.
പുതിയ മാറ്റമനുസരിച്ച്, വര്‍ഷത്തില്‍ കുറഞ്ഞത് 80,000 കനേഡിയന്‍ ഡോളര്‍ സമ്പാദിക്കുന്ന ഉദ്യോഗാര്‍ത്ഥികള്‍ക്ക് ഒന്റാരിയോ വര്‍ക്ക്ഫോഴ്സ് പ്രയോറിറ്റി സ്ട്രീമിന് (OWPS) കീഴില്‍ വരുമാന ഘടകത്തിനായി 10 പോയിന്റുകള്‍ ലഭിക്കും. മുന്‍പ് 70,000 കനേഡിയന്‍ ഡോളറോ അതില്‍ കൂടുതലോ സമ്പാദിക്കുന്നവര്‍ക്ക് പരമാവധി 8 പോയിന്റുകളാണ് ലഭിച്ചിരുന്നത്. ഈ മാറ്റം 2026 ഒക്ടോബര്‍ 5 മുതല്‍ പ്രാബല്യത്തില്‍ വരികയും യോഗ്യരായ ഉദ്യോഗാര്‍ത്ഥികളുടെ പ്രൊഫൈലുകളില്‍ സ്വയം പുതുക്കപ്പെടുകയും ചെയ്തിട്ടുണ്ട്.
കഴിഞ്ഞ അഞ്ച് വര്‍ഷത്തിനുള്ളില്‍ കാനഡ റെവന്യൂ ഏജന്‍സി നല്‍കിയ അസസ്‌മെന്റ് നോട്ടീസിലെ വാര്‍ഷിക വരുമാനത്തെ അടിസ്ഥാനമാക്കിയാണ് ഇത് കണക്കാക്കുന്നത്. ഒന്റാരിയോ റാങ്കിങ് സിസ്റ്റത്തില്‍ ലഭിക്കുന്ന ഉയര്‍ന്ന സ്‌കോര്‍ പ്രവിശ്യാ നാമനിര്‍ദ്ദേശം ലഭിക്കാനും തുടര്‍ന്ന് ഫെഡറല്‍ സര്‍ക്കാര്‍ വഴി പെര്‍മനന്റ് റെസിഡന്‍സിക്ക് അപേക്ഷിക്കാനുമുള്ള സാധ്യത വര്‍ധിപ്പിക്കും. എന്നാല്‍ 80,000 ഡോളറിലധികം വരുമാനമുള്ള എല്ലാവര്‍ക്കും നേരിട്ട് സ്ഥിരതാമസാവകാശം ഉറപ്പാകുന്നില്ല; പകരം, സ്ട്രീമിലെ മറ്റ് ഉദ്യോഗാര്‍ത്ഥികളുമായി താരതമ്യം ചെയ്താണ് അന്തിമ റാങ്കിങ് നിശ്ചയിക്കുന്നത്.
ഒന്റാരിയോയിലെ കുടിയേറ്റ പരിഷ്‌കരണങ്ങളുടെ അടുത്ത ഘട്ടത്തില്‍ ഹെല്‍ത്ത് കെയര്‍, എന്റര്‍പ്രണര്‍, എക്‌സെപ്ഷണല്‍ ടാലന്റ് എന്നീ വിഭാഗങ്ങള്‍ക്കായി കൂടുതല്‍ പ്രത്യേക സ്ട്രീമുകള്‍ അവതരിപ്പിക്കാന്‍ പ്രവിശ്യാ സര്‍ക്കാര്‍ പദ്ധതിയിടുന്നുണ്ട്. ഇവയുടെ ഉദ്ഘാടന തീയതികള്‍ പിന്നീട് പ്രഖ്യാപിക്കും.
