ബാക്കു: അസര്‍ബൈജാനിലെ പൊതുവിദ്യാലയങ്ങളില്‍ ഹിജാബ് ധരിക്കുന്നതിന് പരോക്ഷ വിലക്കേര്‍പ്പെടുത്തിയ സര്‍ക്കാര്‍ തീരുമാനത്തിനെതിരെ രാജ്യത്താകമാനം പ്രതിഷേധം ശക്തമാകുന്നു. ഹിജാബ് ധരിച്ചെത്തുന്ന വിദ്യാര്‍ഥികള്‍ക്കും അധ്യാപകര്‍ക്കും വിദ്യാലയങ്ങളില്‍ പ്രവേശനം നിഷേധിച്ചതാണ് പ്രതിഷേധം പുകയാന്‍ കാരണമായത്. സ്‌കൂളുകളിലെ ഏകീകൃത വസ്ത്രധാരണ രീതി ഉറപ്പാക്കാനും രാജ്യത്തിന്റെ മതനിരപേക്ഷ സ്വഭാവം നിലനിര്‍ത്താനും ലക്ഷ്യമിട്ടാണ് പുതിയ മാനദണ്ഡങ്ങളെന്നാണ് സര്‍ക്കാരിന്റെ വിശദീകരണം. എന്നാല്‍, വ്യക്തിപരമായ വസ്ത്രധാരണ സ്വാതന്ത്ര്യത്തിന്മേലുള്ള കടന്നുകയറ്റവും ഭരണഘടന ഉറപ്പുനല്‍കുന്ന മതസ്വാതന്ത്ര്യത്തിന്റെ ലംഘനവുമാണ് ഇതെന്ന് പ്രക്ഷോഭകര്‍ ആരോപിക്കുന്നു.
പുതിയ ചട്ടങ്ങള്‍ പ്രാബല്യത്തില്‍ വന്നതോടെ ഹിജാബ് ധരിച്ച അധ്യാപകരെ വിദ്യാലയങ്ങളില്‍ നിന്ന് നിര്‍ബന്ധപൂര്‍വം തിരിച്ചയക്കുന്നതിന്റെയും വിദ്യാര്‍ഥികള്‍ അതില്‍ പ്രതിഷേധിച്ച് ക്ലാസുകള്‍ ബഹിഷ്‌കരിക്കുന്നതിന്റെയും ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്. അധ്യാപിക സഹ്‌റ ഹസനോവ ഉള്‍പ്പെടെയുള്ളവര്‍ തങ്ങള്‍ക്ക് നേരിടേണ്ടിവന്ന വിലക്കിനെതിരെ പരസ്യമായി രംഗത്തെത്തി. ഭൂരിപക്ഷം വരുന്ന മുസ്ലിം ജനവിഭാഗത്തിന്റെ അവകാശങ്ങളെ ഹനിക്കുന്ന നടപടിയാണിതെന്ന വാദമുയര്‍ത്തി സോഷ്യല്‍ മീഡിയയിലും ശക്തമായ ക്യാമ്പയിനുകള്‍ ആരംഭിച്ചിട്ടുണ്ട്.
ഈ വിഷയം ഇപ്പോള്‍ അന്താരാഷ്ട്ര തലത്തിലും നയതന്ത്ര തര്‍ക്കങ്ങള്‍ക്ക് വഴിതുറന്നിരിക്കുകയാണ്. അസര്‍ബൈജാനിലെ ഹിജാബ് വിലക്കിനെതിരെ അയല്‍രാജ്യമായ തുര്‍ക്കിയില്‍ വന്‍ പ്രതിഷേധങ്ങളാണ് ഉയര്‍ന്നുവരുന്നത്. ഇസ്താംബൂളിലെ അസര്‍ബൈജാന്‍ കോണ്‍സുലേറ്റിന് മുന്നില്‍ ഒത്തുകൂടിയ പ്രതിഷേധക്കാര്‍ വിലക്ക് ഉടനടി പിന്‍വലിക്കണമെന്ന് ആവശ്യപ്പെട്ടു. 1997-ല്‍ തുര്‍ക്കിയില്‍ നിലനിന്നിരുന്ന ഹിജാബ് നിരോധനത്തിന് സമാനമായ സാഹചര്യമാണ് അസര്‍ബൈജാനിലും ഉടലെടുത്തിരിക്കുന്നതെന്ന് ചൂണ്ടിക്കാണിക്കപ്പെടുന്നു.
അതേസമയം, രാജ്യത്തിന്റെ ആഭ്യന്തര കാര്യങ്ങളില്‍ ബാഹ്യശക്തികള്‍ ഇടപെടേണ്ടതില്ലെന്ന് അസര്‍ബൈജാന്‍ പ്രസിഡന്റ് ഇല്‍ഹാം അലിയേവ് കടുത്ത ഭാഷയില്‍ മുന്നറിയിപ്പ് നല്‍കി. എന്നാല്‍ യു.എന്‍ പൊതുസഭയില്‍ അങ്കാറ നടത്തിയ പ്രസംഗത്തില്‍ മുസ്ലിം സ്ത്രീകള്‍ നേരിടുന്ന വിവേചനങ്ങളെക്കുറിച്ച് തുര്‍ക്കി പ്രസിഡന്റ് റജബ് ത്വയ്യിബ് എര്‍ദോഗന്‍ പരാമര്‍ശിച്ചിരുന്നു. പുതിയ വസ്ത്രധാരണ നിയമം അസര്‍ബൈജാനില്‍ മതനിരപേക്ഷത, വ്യക്തിസ്വാതന്ത്ര്യം, മതസ്വാതന്ത്ര്യം എന്നിവയെക്കുറിച്ചുള്ള വിപുലമായ രാഷ്ട്രീയ-സാമൂഹിക ചര്‍ച്ചകള്‍ക്കാണ് തിരികൊളുത്തിയിരിക്കുന്നത്.
