ഓട്ടവ: കാനഡയുടെ ആകാശത്ത് വിസ്മയം തീര്‍ക്കാന്‍ ഒറിയോണിഡ് ഉല്‍ക്കാവര്‍ഷം. വ്യാഴാഴ്ച പുലര്‍ച്ചെയോടെ ഒറിയോണിഡ് (Orionid) ഉല്‍ക്കാവര്‍ഷം അതിന്റെ പാരമ്യത്തിലെത്തും. പ്രശസ്തമായ ഹാലിയുടെ വാല്‍നക്ഷത്രത്തില്‍ (Halley’s comet) നിന്നുള്ള അവശിഷ്ടങ്ങളാണ് ഈ ഉല്‍ക്കാവര്‍ഷത്തിന് കാരണം. ഏകദേശം 76 വര്‍ഷത്തിലൊരിക്കല്‍ ഭൂമിക്ക് സമീപത്തുകൂടി കടന്നുപോകുന്ന ഹാലി വാല്‍നക്ഷത്രം ഇനി 2061-ല്‍ മാത്രമേ ഭൂമിക്ക് അടുത്തെത്തുകയുള്ളൂവെങ്കിലും, അത് അവശേഷിപ്പിച്ച ബഹിരാകാശ അവശിഷ്ടങ്ങളുടെ പാതയിലൂടെ ഭൂമി കടന്നുപോകുമ്പോള്‍ എല്ലാ വര്‍ഷവും ഈ പ്രതിഭാസം ദൃശ്യമാകാറുണ്ട്.
രാത്രി വൈകുന്നതോടെ വടക്കന്‍, തെക്കന്‍ അര്‍ദ്ധഗോളങ്ങളിലെവിടെയും ആകാശം മേഘാവൃതമല്ലെങ്കില്‍ ഈ കാഴ്ച കാണാന്‍ സാധിക്കും. ഒറിയോണിഡ് ഉല്‍ക്കാവര്‍ഷത്തിന്റെ പ്രഭാവം ഇതിന് മുന്‍പും പിന്‍പുമുള്ള ഏതാനും ആഴ്ചകളില്‍ നിലനില്‍ക്കുമെങ്കിലും, ബുധനാഴ്ച രാത്രിയോടെ മണിക്കൂറില്‍ 20 ഉല്‍ക്കകള്‍ വരെ ദൃശ്യമാകാന്‍ സാധ്യതയുണ്ടെന്ന് അമേരിക്കന്‍ മീറ്റിയോര്‍ സൊസൈറ്റി വ്യക്തമാക്കുന്നു. ആകാശത്ത് ‘ഒറിയോണ്‍’ (Orion) മണ്ഡലത്തിന്റെ ദിശയില്‍ നിന്ന് ഉത്ഭവിക്കുന്നതായി തോന്നുന്നതിനാലാണ് ഇവയ്ക്ക് ഒറിയോണിഡ് എന്ന പേര് ലഭിച്ചത്. സെക്കന്‍ഡില്‍ 66 കിലോമീറ്റര്‍ വരെ അതിവേഗത്തില്‍ സഞ്ചരിക്കുന്ന ഈ ഉല്‍ക്കകള്‍ തിളക്കമാര്‍ന്ന പ്രകാശരേഖകള്‍ അവശേഷിപ്പിച്ചാണ് ആകാശത്ത് മിന്നിമറയുന്നത്.
നഗരവെളിച്ചങ്ങളില്‍ നിന്നും മറ്റ് വെളിച്ച മലിനീകരണങ്ങളില്‍ നിന്നും മാറി നില്‍ക്കുന്നതാണ് ഈ പ്രതിഭാസം വ്യക്തമായി കാണാന്‍ അനുയോജ്യം. ഇത് കാണുന്നതിനായി പ്രത്യേകം ഉപകരണങ്ങളുടെയോ ടെലിസ്‌കോപ്പുകളുടെയോ ആവശ്യമില്ല. എന്നാല്‍, നിലവില്‍ 76 ശതമാനം പ്രകാശമുള്ള ചന്ദ്രന്റെ സാന്നിധ്യം കാഴ്ചയ്ക്ക് നേരിയ തടസ്സം സൃഷ്ടിച്ചേക്കാം. അതിനാല്‍ ചന്ദ്രാസ്തമയത്തിനും പ്രഭാതത്തിനും ഇടയിലുള്ള സമയമാണ് ഉല്‍ക്കാവര്‍ഷം കാണാന്‍ ഏറ്റവും അനുയോജ്യം.
ഹാലിഫാക്‌സില്‍ പുലര്‍ച്ചെ 2:16, മണ്‍ട്രിയോളില്‍ 1:56, ടൊറന്റോയില്‍ 2:24, വിനിപെഗില്‍ 2:26, കാല്‍ഗറിയില്‍ 2:34, വന്‍കൂവറില്‍ 2:16 എന്നിങ്ങനെയാണ് ചന്ദ്രാസ്തമയ സമയം. ഇനി വരാനിരിക്കുന്ന അടുത്ത പ്രധാന ഉല്‍ക്കാവര്‍ഷം നവംബര്‍ 4, 5 തീയതികളില്‍ രാത്രിയില്‍ പ്രതീക്ഷിക്കുന്ന ‘സതേണ്‍ ടോറിഡ്‌സ്’ (Southern Taurids) ആണ്.
