ജോഹന്നാസ്ബർഗ്: വിദേശ സഹായവും ആഗോള ആരോഗ്യ ധനസഹായവും വെട്ടിക്കുറയ്ക്കാനുള്ള കനേഡിയൻ സർക്കാരിന്റെ നടപടി പിൻവലിക്കണമെന്ന് UNAIDS മേധാവി വിന്നി ബയാനിമ.
‘പ്രധാനമന്ത്രി കാർണിയോടും കാനഡയോടും മറ്റ് എല്ലാ ദാതാക്കളോടും ഉള്ള എന്റെ സന്ദേശം, ഞങ്ങളെ പിന്തുണയ്ക്കുന്നത് തുടരുക. ആഗോള ഐക്യദാർഢ്യം ഇല്ലെങ്കിൽ, രാജ്യങ്ങൾ തമ്മിലുള്ള അസമത്വം വർധിച്ചുകൊണ്ടിരിക്കും. ഈ അസമത്വങ്ങൾ വർധിക്കുന്നതിനനുസരിച്ച് നമ്മൾ കൂടുതൽ അപകടകരമായ ഒരു ലോകത്തിലായിരിക്കും ജീവിക്കുന്നത്’, കഴിഞ്ഞ ആഴ്ച ജോഹന്നാസ്ബർഗിൽ നടന്ന ജി20 ഉച്ചകോടിക്കിടെ ബയാനിമ പറഞ്ഞു.
ലോകത്തിലെ ഏറ്റവും ദരിദ്ര രാജ്യങ്ങളിലെ പകർച്ചവ്യാധികൾക്കെതിരെ പോരാടുന്നതിനുള്ള ഗ്ലോബൽ ഫണ്ട് കാനഡ ആദ്യമായി വെട്ടിക്കുറയ്ക്കുന്നതായി കഴിഞ്ഞ ആഴ്ച കാർണി പ്രഖ്യാപിച്ചിരുന്നു. വിദേശ സഹായം 270 കോടി ഡോളർ വെട്ടിക്കുറയ്ക്കാൻ ഫെഡറൽ ബജറ്റ് ആഹ്വാനം ചെയ്തതിന് ഏതാനും ആഴ്ചകൾക്ക് ശേഷമായിരുന്നു ഈ നടപടി.
