വൻകൂവർ: ബ്രിട്ടീഷ് കൊളംബിയ പ്രൊവിൻഷ്യൽ നോമിനി പ്രോഗ്രാം (BC PNP) തങ്ങളുടെ ഏറ്റവും പുതിയ നറുക്കെടുപ്പ് ഫലങ്ങൾ പുറത്തുവിട്ടപ്പോൾ 484 പേർക്ക് ഇൻവിറ്റേഷൻ ലഭിച്ചു. ഇതിൽ ഹൈ വേജ് വിഭാഗത്തിൽ 252 ഐടിഎകളും (ITA), സ്കോർ ബേസ്ഡ് വിഭാഗത്തിൽ 232 ഐടിഎകളുമാണ് അനുവദിച്ചത്. 2026 ഹൈ ഇക്കണോമിക് ഇംപാക്ട് വിഭാഗത്തിന് കീഴിലുള്ള ഉദ്യോഗാർത്ഥികളെ ലക്ഷ്യം വെച്ചാണ് പ്രധാനമായും ഈ നറുക്കെടുപ്പ് നടത്തിയത്. ഹൈ വേജ് വിഭാഗത്തിൽ ഉൾപ്പെടാൻ കുറഞ്ഞത് മണിക്കൂറിന് 62 ഡോളറോ അല്ലെങ്കിൽ പ്രതിവർഷം 1,25,000 ഡോളറോ വേതനം ഉണ്ടായിരിക്കണം. സ്കോർ ബേസ്ഡ് വിഭാഗത്തിൽ തിരഞ്ഞെടുക്കപ്പെടുന്നതിനുള്ള കുറഞ്ഞ സ്കോർ 138 ആണ്.
ഈ ഡ്രോയിൽ ഉൾപ്പെട്ട ഉദ്യോഗാർത്ഥികൾ ബിസിയുടെ സാമ്പത്തിക വളർച്ചയ്ക്ക് ഉയർന്ന സംഭാവന നൽകാൻ കഴിയുന്ന തൊഴിൽ മേഖലകളിൽ നിന്നുള്ളവരാകണമെന്നാണ് ചട്ടം. തിരഞ്ഞെടുക്കപ്പെട്ടവർക്ക് തങ്ങളുടെ നോമിനേഷൻ അപേക്ഷ സമർപ്പിക്കുന്നതിനായി നിശ്ചിത സമയപരിധി ഉണ്ടായിരിക്കും. അപേക്ഷകർക്ക് സാധുവായ ഒരു ജോബ് ഓഫർ ഉണ്ടായിരിക്കുക ആണ് ഏറ്റവും പ്രധാന നിബന്ധന. യോഗ്യരായ ഉദ്യോഗാർത്ഥികൾക്ക് ഈ നോമിനേഷൻ വഴി കാനഡയിലെ സ്ഥിരതാമസത്തിനുള്ള (PR) വഴി കൂടുതൽ എളുപ്പമാകും. കൂടുതൽ വിവരങ്ങളും അപേക്ഷയും വിശദാംശങ്ങളും ബിസി പിഎൻപി (BC PNP) ഔദ്യോഗിക വെബ്സൈറ്റിൽ ലഭിക്കും.
