വിനിപെഗ്: കാനഡയിലെ 2026-ലെ സെൻസസ് നടപടികളുടെ ആദ്യ സമയപരിധി മെയ് 12-ന് അവസാനിച്ചതായി റിപ്പോർട്ട്. രാജ്യത്തെ ഓരോ വീടുകളിലും മെയ് 4 മുതൽ സെൻസസ് സ്ലിപ്പുകൾ എത്തിത്തുടങ്ങിയിരുന്നു. ഇതുവരെ മികച്ച രീതിയിലുള്ള പങ്കാളിത്തമാണ് ജനങ്ങളിൽ നിന്ന് ലഭിക്കുന്നതെന്ന് സ്റ്റാറ്റിസ്റ്റിക്സ് കാനഡ അറിയിച്ചു. ബജറ്റ് വിഹിതം നിശ്ചയിക്കുന്നതിനും സ്കൂളുകൾ, ആശുപത്രികൾ തുടങ്ങിയ പൊതുസേവനങ്ങൾ എവിടെയൊക്കെ വേണമെന്ന് തീരുമാനിക്കുന്നതിനും സെൻസസ് വിവരങ്ങൾ വളരെ പ്രധാനമാണെന്ന് അധികൃതർ വ്യക്തമാക്കി.
സെൻസസ് നടപടികളോട് വിനിപെഗ് നിവാസികൾ സമ്മിശ്രമായാണ് പ്രതികരിക്കുന്നത്. സെൻസസ് വിവരങ്ങൾ തങ്ങളുടെ പൈതൃകം തിരിച്ചറിയാനും ചരിത്രം രേഖപ്പെടുത്താനും സഹായിക്കുമെന്ന് ചിലർ അഭിപ്രായപ്പെട്ടു. എന്നാൽ, വ്യക്തിവിവരങ്ങൾ ശേഖരിക്കുന്നതിലെ സ്വകാര്യതയെക്കുറിച്ച് ഒരു വിഭാഗം ആളുകൾ ആശങ്ക പ്രകടിപ്പിച്ചു. അതേസമയം, വിവരങ്ങൾ അതീവ രഹസ്യമായി സൂക്ഷിക്കുമെന്നും ജനങ്ങളുടെ സ്വകാര്യത സംരക്ഷിക്കാൻ കർശന നടപടികൾ എടുത്തിട്ടുണ്ടെന്നും സ്റ്റാറ്റിസ്റ്റിക്സ് കാനഡ ഉറപ്പുനൽകി.
ഇതുവരെ സെൻസസ് സ്ലിപ്പുകൾ ലഭിക്കാത്ത ചിലർ പിഴ ശിക്ഷയെക്കുറിച്ചുള്ള ആശങ്ക പങ്കുവെച്ചു. സെൻസസ് പൂരിപ്പിക്കാത്തവർക്ക് 500 ഡോളർ വരെ പിഴ ഈടാക്കുന്നത് ഒഴിവാക്കണമെന്നും തങ്ങൾക്ക് ഇത് പൂർത്തിയാക്കാൻ താല്പര്യമുണ്ടെന്നും അവർ പറഞ്ഞു. മെയ് 12 ആദ്യ കാലാവധി ആയിരുന്നെങ്കിലും, വരാനിരിക്കുന്ന വേനൽക്കാലത്തിന്റെ പകുതി വരെ വിവരങ്ങൾ ശേഖരിക്കുന്നത് തുടരുമെന്ന് അധികൃതർ അറിയിച്ചു. 2021-ലെ കഴിഞ്ഞ സെൻസസിൽ 98 ശതമാനമായിരുന്നു ജനപങ്കാളിത്തം.
