ലക്നൗ: ഉത്തരേന്ത്യയിൽ വീശിയടിച്ച ശക്തമായ പൊടിക്കാറ്റിലും മിന്നലിലും പെട്ട് 96 പേർ മരിച്ചതായി റിപ്പോർട്ട്. ഉത്തർപ്രദേശിലെ വിവിധ ജില്ലകളിലുണ്ടായ ഈ പ്രകൃതിക്ഷോഭത്തിൽ അൻപതിലധികം പേർക്ക് പരുക്കേൽക്കുകയും വീടുകൾക്കും കെട്ടിടങ്ങൾക്കും വ്യാപകമായ നാശനഷ്ടങ്ങൾ സംഭവിക്കുകയും ചെയ്തു. മരങ്ങൾ കടപുഴകി വീണും കെട്ടിടങ്ങൾ തകർന്നുമാണ് മിക്ക അപകടങ്ങളും ഉണ്ടായത്. റോഡുകളിലും റെയിൽവേ ട്രാക്കുകളിലും വീണ മരങ്ങൾ നീ ക്കം ചെയ്യാൻ അധികൃതർ ക്രെയിനുകളും മറ്റും ഉപയോഗിച്ച് കഠിനശ്രമം നടത്തുകയാണ്.
വേനൽക്കാലത്ത് ഉത്തരേന്ത്യയിൽ ഇത്തരം കാറ്റുകൾ പതിവാണെങ്കിലും ഇത്തവണ ഗ്രാമീണ മേഖലകളിൽ വലിയ തോതിലുള്ള നാശനഷ്ടങ്ങളാണ് റിപ്പോർട്ട് ചെയ്തിരിക്കുന്നത്. പെട്ടെന്നുണ്ടായ കാറ്റിൽ വീടുകളുടെ മേൽക്കൂരകൾ പറന്നുപോയതും മിന്നലും ജനങ്ങളെ പരിഭ്രാന്തിയിലാഴ്ത്തി. കൃഷിയിടങ്ങൾക്കും വൈദ്യുതി ലൈനുകൾക്കും കനത്ത നാശമുണ്ടായിട്ടുണ്ട്. പല കുടുംബങ്ങളും വീട് തകർന്നതിനെ തുടർന്ന് ബന്ധുവീടുകളിലാണ് അഭയം തേടിയിരിക്കുന്നത്.
രക്ഷാപ്രവർത്തനങ്ങൾ 24 മണിക്കൂറിനുള്ളിൽ പൂർത്തിയാക്കാൻ ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ഉദ്യോഗസ്ഥർക്ക് നിർദ്ദേശം നൽകി. ദുരന്തം ബാധിച്ച കുടുംബങ്ങൾക്ക് അടിയന്തര ധനസഹായവും മറ്റ് സഹായങ്ങളും എത്തിക്കാൻ അദ്ദേഹം ഉത്തരവിട്ടിട്ടുണ്ട്. നിലവിൽ ദുരിതബാധിത പ്രദേശങ്ങളിൽ അടിയന്തര സേനാ വിഭാഗങ്ങളെ വിന്യസിച്ചിട്ടുണ്ടെന്നും സേവന പ്രവർത്തനങ്ങൾ വേഗത്തിൽ നടക്കുന്നുണ്ടെന്നും സർക്കാർ അറിയിച്ചു.
