മൺട്രിയോൾ: കെബെക്കിന്റെ പുതിയ പ്രീമിയർ ക്രിസ്റ്റിൻ ഫ്രെഷെറ്റിന്റെ നേതൃത്വം ഭരണകക്ഷിയായ ‘Coalition Avenir Québec’ (CAQ) പാർട്ടിക്ക് ജനങ്ങൾക്കിടയിൽ വലിയ മുന്നേറ്റമുണ്ടാക്കുന്നതായി പുതിയ സർവേ. ‘ലെഗർ’ നടത്തിയ ഏറ്റവും പുതിയ സർവേ പ്രകാരം CAQ പാർട്ടി 22 ശതമാനം വോട്ടർമാരുടെ പിന്തുണ നേടിയിട്ടുണ്ട്. മുൻ പ്രീമിയർ ഫ്രാൻസ്വ ലെഗോൾട്ട് പാർട്ടി വിട്ടതിനുശേഷം 9 പോയിന്റിന്റെയും, കഴിഞ്ഞ ഒരു മാസത്തിനിടെ മാത്രം 5 പോയിന്റിന്റെയും വൻ വർധനവാണ് പാർട്ടിക്ക് ഉണ്ടായിരിക്കുന്നത്.
നിലവിൽ 31 ശതമാനം വോട്ടുകളോടെ ‘പാർട്ടി കെബെക്കോയിസ്’ (PQ) ആണ് ഒന്നാം സ്ഥാനത്തുള്ളതെങ്കിലും അവർക്ക് ഒരു പോയിന്റിന്റെ ഇടിവുണ്ടായിട്ടുണ്ട്. മറ്റൊരു പ്രമുഖ കക്ഷിയായ കെബെക്ക് ലിബറൽ പാർട്ടി (PLQ) 28 ശതമാനം വോട്ടുകളോടെ രണ്ടാം സ്ഥാനം നിലനിർത്തുന്നു. അതേസമയം, സർവേയിൽ പങ്കെടുത്ത പകുതിയോളം വോട്ടർമാർ തങ്ങളുടെ രാഷ്ട്രീയ തീരുമാനം ഇനിയും മാറിയേക്കാമെന്നാണ് വ്യക്തമാക്കുന്നത്.
‘മെയിൻസ്ട്രീറ്റ് റിസർച്ച്’ നടത്തിയ രണ്ടാമത്തെ സർവേയിലും സിഎക്യു (CAQ) പാർട്ടി 25 ശതമാനത്തിനടുത്ത് വോട്ട് വിഹിതവുമായി ശക്തി തെളിയിക്കുന്നുണ്ട്. മൺട്രിയോൾ മേഖല കേന്ദ്രീകരിച്ചു നടത്തിയ ഈ സർവേയിൽ കെബെക്കിന്റെ പരമാധികാരത്തെ മൂന്നിൽ രണ്ട് ഭാഗം ആളുകളും ശക്തമായി എതിർക്കുന്നതായും കണ്ടെത്തി. 1,225 പേരിൽ ഫോൺ കോളുകൾ വഴി നടത്തിയ ഈ സർവേ ഫലങ്ങൾ കൃത്യമായ ജനസംഖ്യാ കണക്കുകളെ അടിസ്ഥാനമാക്കിയാണ് തയ്യാറാക്കിയിട്ടുള്ളത്.
