തിരുവനന്തപുരം: വിദ്യാഭ്യാസ രംഗത്ത് കേരളത്തെ ആഗോള നിലവാരത്തിലേക്ക് ഉയർത്തുമെന്ന് മുഖ്യമന്ത്രി V. D. Satheesan പറഞ്ഞു. സംസ്ഥാന സ്കൂൾ പ്രവേശനോത്സവം ഉദ്ഘാടനം ചെയ്യുകയായിരുന്നു അദ്ദേഹം.
കേരളം വിദ്യാഭ്യാസത്തിന്റെ ഡെസ്റ്റിനേഷൻ പോയിന്റായി മാറുമെന്നും, വിദേശരാജ്യങ്ങളിൽ നിന്നുപോലും വിദ്യാർത്ഥികൾ ഇവിടെ എത്തുന്ന സാഹചര്യം സൃഷ്ടിക്കുമെന്നും അദ്ദേഹം പറഞ്ഞു. ഭാവിയിൽ പഠനത്തിനായി സംസ്ഥാനത്തിന് പുറത്തേക്ക് പോകേണ്ട സാഹചര്യം ഉണ്ടാകില്ലെന്നും അദ്ദേഹം കൂട്ടിച്ചേർത്തു.
കുട്ടികളുടെ വിദ്യാഭ്യാസ പുരോഗതിയിൽ അമ്മമാരുടെ പങ്ക് നിർണായകമാണെന്ന് പറഞ്ഞ അദ്ദേഹം, അധ്യാപകരും രക്ഷിതാക്കളും തമ്മിൽ നല്ല ബന്ധം നിലനിർത്തേണ്ടതുണ്ടെന്നും ആവശ്യപ്പെട്ടു. കുട്ടികളുടെ കഴിവുകൾ പരസ്പരം പങ്കുവെക്കണമെന്നും അദ്ദേഹം നിർദേശിച്ചു.
ഇന്നത്തെ കുട്ടികൾ പുതിയ സാങ്കേതികവിദ്യകളും നിർമിത ബുദ്ധിയും നിറഞ്ഞ ലോകത്തിലാണ് ജീവിക്കുന്നതെന്നും, അതിനനുസരിച്ച് വിദ്യാഭ്യാസരംഗവും മുന്നേറേണ്ടതുണ്ടെന്നും അദ്ദേഹം പറഞ്ഞു.
കേരളത്തിൽ നിന്നുള്ള പെൺകുട്ടികൾ രാജ്യാന്തര സർവകലാശാലകളിൽ പഠിക്കുന്നതിൽ വലിയ മുന്നേറ്റമുണ്ടായിട്ടുണ്ടെന്നും, വിദ്യാഭ്യാസ രംഗത്ത് അവർ കൈവരിച്ച നേട്ടങ്ങൾ ശ്രദ്ധേയമാണെന്നും വ്യക്തമാക്കി.
പുതിയ തലമുറയാണ് ഏറ്റവും വലിയ നിക്ഷേപമെന്നും, മയക്കുമരുന്നിനെതിരെ ശക്തമായ നിലപാട് സ്വീകരിക്കണമെന്നും അദ്ദേഹം ആവശ്യപ്പെട്ടു. യുവാക്കളെ ലഹരിയിൽ നിന്ന് പിന്തിരിപ്പിക്കാൻ കൂട്ടായ ശ്രമം ആവശ്യമാണെന്നും അദ്ദേഹം പറഞ്ഞു.
