കാലിഫോര്ണിയ: യുഎസിലെ കാലിഫോര്ണിയയിലുള്ള ഹൈസ്കൂള് ബിരുദദാന ചടങ്ങിനിടെ വെടിവെപ്പ്. ബുധനാഴ്ച വൈകിട്ടോടെ ഫെയര്ഫീല്ഡ് ഹൈസ്കൂളിന്റെ പാര്ക്കിങ് ഗ്രൗണ്ടിലായിരുന്നു നാടിനെ നടുക്കിയ ഈ ദാരുണ സംഭവം അരങ്ങേറിയത്. വെടിവെപ്പില് പതിനെട്ട് വയസ്സുകാരന് കൊല്ലപ്പെട്ടു. വെടിയേറ്റ ഉടന് തന്നെ പതിനെട്ടുകാരന് സംഭവസ്ഥലത്തു വെച്ചുതന്നെ മരണപ്പെടുകയായിരുന്നു. ആക്രമണത്തില് ഒരു കുട്ടിയുള്പ്പെടെ മൂന്ന് പേര്ക്ക് പരുക്കേറ്റതായും പോലീസ് അറിയിച്ചു. ്.
ഫെയര്ഫീല്ഡ് ഹൈസ്കൂളുമായി കാമ്പസ് പങ്കിടുന്ന സെം യെറ്റോ ഹൈസ്കൂളിലെ ബിരുദദാന ചടങ്ങുകള് അവസാനിച്ചതിന് തൊട്ടുപിന്നാലെയായിരുന്നു അക്രമം. ചടങ്ങിന് ശേഷം വിദ്യാര്ത്ഥികളും ബന്ധുക്കളും പാര്ക്കിങ് ഏരിയയില് ഒത്തുകൂടി ചിത്രങ്ങള് പകര്ത്തിക്കൊണ്ടിരുന്ന സമയത്താണ് പെട്ടെന്ന് വെടിയൊച്ച കേട്ടതെന്ന് ദൃക്സാക്ഷികള് പറഞ്ഞു. വെടിവെപ്പുണ്ടായതോടെ പരിഭ്രാന്തരായ ജനങ്ങള് നിലവിളിച്ചുകൊണ്ട് സുരക്ഷിത സ്ഥാനങ്ങളിലേക്ക് ഓടിമാറുകയായിരുന്നു.
വെടിവെപ്പില് പരുക്കേറ്റവരില് 11 വയസ്സുള്ള ഒരു ആണ്കുട്ടിയും 20, 25 വയസ്സ് വീതം പ്രായമുള്ള രണ്ട് മുതിര്ന്നവരും ഉള്പ്പെടുന്നു. പരുക്കേറ്റ മൂന്നുപേരെയും ഉടന് തന്നെ സമീപത്തെ ആശുപത്രിയില് പ്രവേശിപ്പിച്ചു. നിലവില് ഇവര് വിദഗ്ധ ചികിത്സയില് തുടരുകയാണെങ്കിലും ഇവരുടെ ആരോഗ്യനിലയെക്കുറിച്ചുള്ള കൃത്യമായ വിവരങ്ങള് അധികൃതര് ഇതുവരെ പുറത്തുവിട്ടിട്ടില്ല.
സംഭവം നടന്നയുടന് തന്നെ വന് പോലീസ് സന്നാഹവും ആംബുലന്സുകളും രക്ഷാപ്രവര്ത്തകരും സ്ഥലത്തെത്തി ആവശ്യമായ നടപടികള് സ്വീകരിച്ചു. അക്രമിയെക്കുറിച്ചുള്ള വിവരങ്ങളോ വെടിവെപ്പിലേക്ക് നയിച്ച യഥാര്ത്ഥ കാരണങ്ങളോ കണ്ടെത്താന് പോലീസിന് കഴിഞ്ഞിട്ടില്ല. സംഭവത്തില് പോലീസ് വിശദമായ അന്വേഷണം ആരംഭിച്ചിട്ടുണ്ട്. നിലവില് പ്രദേശവാസികള്ക്ക് മറ്റ് സുരക്ഷാ ഭീഷണികള് ഒന്നും തന്നെയില്ലെന്ന് അധികൃതര് വ്യക്തമാക്കി.
