ഓട്ടവ: വിദേശരാജ്യങ്ങളിൽ നിർബന്ധിത തൊഴിലാളി ചൂഷണത്തിലൂടെ നിർമ്മിക്കുന്ന ഉൽപ്പന്നങ്ങൾ കാനഡയിലേക്ക് എത്തുന്നത് തടയാൻ ഫെഡറൽ സർക്കാർ നിയമങ്ങൾ കൂടുതൽ ശക്തമാക്കുന്നു. ഇതിന്റെ ഭാഗമായി ‘ബിൽ C-35’ എന്ന പുതിയ നിയമനിർമാണ നിർദ്ദേശം പാർലമെന്റിൽ അവതരിപ്പിച്ചു.
കാനഡയിൽ നിന്നുള്ള ചില ഉൽപ്പന്നങ്ങൾക്ക് 10 ശതമാനം അധിക നികുതി ഏർപ്പെടുത്തുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് ഭരണകൂടം മുന്നറിയിപ്പ് നൽകിയതിന് പിന്നാലെയാണ് ഈ നീക്കം ശ്രദ്ധ നേടുന്നത്. എന്നാൽ, ഈ പരിഷ്കാരം അമേരിക്കൻ സമ്മർദ്ദത്തിന്റെ ഫലമല്ലെന്നും, 2024-ൽ തന്നെ ലിബറൽ സർക്കാർ ഇത്തരമൊരു നിയമഭേദഗതി വാഗ്ദാനം ചെയ്തിരുന്നതാണെന്നും ലിബറൽ എം.പി റോബ് ഒലിഫന്റ് വ്യക്തമാക്കി.
പുതിയ നിയമപ്രകാരം, വിദേശത്തെ കനേഡിയൻ എംബസികളിൽ നിന്നുള്ള വിവരങ്ങളും രഹസ്യാന്വേഷണ റിപ്പോർട്ടുകളും അടിസ്ഥാനമാക്കി നിർബന്ധിത തൊഴിൽ നടക്കാൻ സാധ്യതയുള്ള പ്രദേശങ്ങളുടെയും ഉൽപ്പന്നങ്ങളുടെയും പൊതുപട്ടിക സർക്കാർ പ്രസിദ്ധീകരിക്കും. ഈ പട്ടികയിൽ ഉൾപ്പെടുന്ന ഉൽപ്പന്നങ്ങൾ ഇറക്കുമതി ചെയ്യുന്ന കമ്പനികൾ, അവ തൊഴിലാളി ചൂഷണം ഉപയോഗിച്ചല്ല നിർമ്മിച്ചതെന്ന് സ്വയം തെളിയിക്കേണ്ട ബാധ്യതയും ഏറ്റെടുക്കേണ്ടിവരും.
നിലവിൽ സംശയമുള്ള ചില ചരക്കുകൾ മാത്രം ലളിതമായി പരിശോധിക്കുന്ന കാനഡ ബോർഡർ സർവീസസ് ഏജൻസിക്ക് (CBSA), പുതിയ നിയമം പ്രാബല്യത്തിൽ വരുന്നതോടെ കൂടുതൽ വ്യക്തമായ മാർഗനിർദേശങ്ങളും കർശന പരിശോധനാ അധികാരങ്ങളും ലഭിക്കും.
ചൈനയിലെ ഉയ്ഗുർ മുസ്ലിം സമൂഹത്തിനെതിരായ നിർബന്ധിത തൊഴിൽ ആരോപണങ്ങൾ ഉൾപ്പെടെയുള്ള ആഗോള മനുഷ്യാവകാശ ആശങ്കകളുടെ പശ്ചാത്തലത്തിലാണ് നിയമഭേദഗതി. യൂറോപ്യൻ യൂണിയനും മെക്സിക്കോയും പിന്തുടരുന്ന കർശന വ്യാപാര മാനദണ്ഡങ്ങൾക്കൊപ്പമെത്താനും, അമേരിക്കയുമായുള്ള വ്യാപാരബന്ധം സംരക്ഷിക്കാനുമാണ് പുതിയ ബില്ലിലൂടെ സർക്കാർ ലക്ഷ്യമിടുന്നത്.
അതേസമയം, കാനഡയുടെ നടപടി ഏറെ വൈകിയെന്ന വിമർശനവുമായി പ്രതിപക്ഷം രംഗത്തെത്തി. സർക്കാർ ഇത്തരമൊരു നിയമം നടപ്പാക്കാൻ അഞ്ച് വർഷത്തിലേറെ വൈകിയെന്ന് കൺസർവേറ്റീവ് പാർട്ടിയുടെ വിദേശകാര്യ വക്താവ് മൈക്കൽ ചോങ് ആരോപിച്ചു.
2023-ൽ സമാനമായ നിയമം കൊണ്ടുവന്നിരുന്നെങ്കിലും അത് ഫലപ്രദമായി നടപ്പാക്കാൻ കഴിഞ്ഞിരുന്നില്ല. കാനഡ ബോർഡർ ഏജൻസിയുടെ കണക്കുകൾ പ്രകാരം, 2020 മുതൽ സംശയത്തിന്റെ പേരിൽ 50 ചരക്കുകൾ തടഞ്ഞുവെച്ചെങ്കിലും വെറും രണ്ട് കേസുകളിൽ മാത്രമാണ് നിർബന്ധിത തൊഴിൽ ഉപയോഗിച്ചതായി സ്ഥിരീകരിക്കാൻ കഴിഞ്ഞത്. 2024-ൽ വസ്ത്രങ്ങളുമായി ബന്ധപ്പെട്ട ഒരു കേസിലും, 2025-ൽ ഫ്രോസൺ സമുദ്രവിഭവങ്ങളുമായി ബന്ധപ്പെട്ട മറ്റൊരു കേസിലുമാണ് കുറ്റം തെളിഞ്ഞത്.
പുതിയ ബിൽ നിയമമായാൽ കാനഡയുടെ ഇറക്കുമതി വ്യാപാര രംഗത്ത് വലിയ മാറ്റങ്ങൾക്ക് വഴിയൊരുക്കുമെന്നാണ് സാമ്പത്തിക വിദഗ്ധരുടെ വിലയിരുത്തൽ.
