എഡ്മിന്റൻ: ആൽബർട്ട പ്രവിശ്യയിലെ ജനങ്ങൾക്ക് ആശ്വാസമാകുന്ന പുതിയ ചെലവുകുറവ് പദ്ധതി ഇന്ന് പ്രഖ്യാപിക്കുമെന്ന് പ്രവിശ്യ സർക്കാർ അറിയിച്ചു. പ്രീമിയർ ഡാനിയേൽ സ്മിത്ത് ബുധനാഴ്ച കാൽഗറിയിലെ ഹെറിറ്റേജ് പാർക്കിൽ നടക്കുന്ന ചടങ്ങിൽ പദ്ധതിയുടെ വിശദാംശങ്ങൾ അവതരിപ്പിക്കും.
ധനകാര്യ മന്ത്രി ജേസൺ നിക്സൺ, അഫോർഡബിലിറ്റി ആൻഡ് യൂട്ടിലിറ്റീസ് മന്ത്രി ആർ.ജെ. സിഗുർഡ്സൺ, ട്രെല്ലിസ് സൊസൈറ്റി സി.ഇ.ഒ ജെഫ് ഡയർ എന്നിവരും പ്രഖ്യാപനത്തിൽ പങ്കെടുക്കും.
പദ്ധതിയുടെ വിശദാംശങ്ങൾ ഇതുവരെ പുറത്തുവിട്ടിട്ടില്ലെങ്കിലും, ഉയർന്ന ജീവിതച്ചെലവിനെ നേരിടുന്ന ആൽബർട്ടയിലെ വ്യക്തികൾക്കും കുടുംബങ്ങൾക്കും സാമ്പത്തിക ആശ്വാസം നൽകുകയാണ് ഇതിന്റെ ലക്ഷ്യമെന്ന് സർക്കാർ അറിയിച്ചു.
വിലക്കയറ്റവും ഉയർന്ന ജീവിതച്ചെലവും തുടരുന്ന സാഹചര്യത്തിൽ സർക്കാർ പ്രഖ്യാപിക്കുന്ന പുതിയ നടപടികൾ ജനങ്ങൾക്ക് എത്രത്തോളം സഹായകരമാകുമെന്നത് ശ്രദ്ധേയമാകും.
