ഓട്ടവ: കാനഡ പൗരത്വ സർട്ടിഫിക്കറ്റിനായുള്ള അപേക്ഷകളിൽ വൻ വർധന. പുതിയ പൗരത്വ നിയമം പ്രാബല്യത്തിൽ വന്നതിന് പിന്നാലെ അപേക്ഷകളുടെ എണ്ണം കുത്തനെ ഉയർന്നതോടെ തീരുമാനത്തിനായി കാത്തിരിക്കുന്ന അപേക്ഷകളുടെ എണ്ണം 1,21,800 കടന്നു. അമേരിക്കയിൽ നിന്നുള്ള അപേക്ഷകളാണ് ഈ വർധനവിന് പ്രധാന കാരണമെന്നാണ് റിപ്പോർട്ട്.
കാനഡയുടെ പുതിയ ബിൽ C-3 പ്രകാരം, കാനഡയിൽ ജനിച്ച പൂർവികരുമായി ബന്ധം തെളിയിക്കാൻ കഴിയുന്ന വിദേശത്തുള്ളവർക്കും ചില നിബന്ധനകൾക്ക് വിധേയമായി കനേഡിയൻ പൗരത്വം നേടാൻ അവസരം ലഭിച്ചു. മുൻപ് വിദേശത്ത് ജനിച്ചവർക്ക് പൗരത്വം ലഭിക്കുന്നതുമായി ബന്ധപ്പെട്ട നിയന്ത്രണങ്ങൾ കോടതിയുടെ ഇടപെടലിനെ തുടർന്ന് മാറ്റുകയായിരുന്നു.
2025 ഡിസംബർ പകുതിയിൽ നിയമം പ്രാബല്യത്തിൽ വന്നതുമുതൽ 2026 മേയ് 31 വരെ 6,100 പേർക്ക് ബിൽ C-3 പ്രകാരം പൗരത്വ സർട്ടിഫിക്കറ്റ് അനുവദിച്ചതായി കണക്കുകൾ വ്യക്തമാക്കുന്നു. ഇതിന് പുറമെ, കനേഡിയൻ മാതാപിതാക്കന്മാരുടെ അടിസ്ഥാനത്തിൽ 17,390 പേർക്കും സർട്ടിഫിക്കറ്റ് ലഭിച്ചു.
അമേരിക്കക്കാരുടെ എണ്ണം ഉയരുന്നു
പുതിയ നിയമപ്രകാരം അംഗീകരിക്കപ്പെട്ടവരിൽ വലിയൊരു വിഭാഗവും അമേരിക്കയിൽ ജനിച്ചവരാണ്. ബിൽ C-3 പ്രകാരം പൗരത്വ സർട്ടിഫിക്കറ്റ് ലഭിച്ചവരിൽ 3,110 പേർ അമേരിക്കക്കാരാണ്. കനേഡിയൻ മാതാപിതാക്കന്മാരുടെ അടിസ്ഥാനത്തിൽ സർട്ടിഫിക്കറ്റ് ലഭിച്ച അമേരിക്കക്കാരുടെ എണ്ണം 8,125 ആണ്.
പൗരത്വ സർട്ടിഫിക്കറ്റ് ലഭിക്കുന്നതോടെ ഇവർക്ക് കനേഡിയൻ പാസ്പോർട്ടിന് അപേക്ഷിക്കാനും കാനഡയിൽ താമസിക്കാനും ജോലി ചെയ്യാനും സാധിക്കും. എന്നാൽ ഫെഡറൽ തിരഞ്ഞെടുപ്പിൽ വോട്ട് ചെയ്യുന്നതിന് ചില അധിക നിബന്ധനകൾ ബാധകമാണ്.
അപേക്ഷകളുടെ ബാക്ക്ലോഗ് കുതിച്ചുയർന്നു
പൗരത്വ സർട്ടിഫിക്കറ്റ് അപേക്ഷകളുടെ കാത്തിരിപ്പ് പട്ടികയാണ് ഇപ്പോൾ പ്രധാന ആശങ്ക. ഏപ്രിലിൽ ഏകദേശം 56,000 അപേക്ഷകൾ തീരുമാനത്തിനായി കാത്തിരിക്കുകയായിരുന്നു. മേയിൽ ഇത് 70,400 ആയി ഉയർന്നു. ഓഗസ്റ്റ് 10-ലെ കണക്കനുസരിച്ച് എണ്ണം 1,21,800 ആയി.
ഇതോടെ അപേക്ഷകളുടെ തീരുമാനം ലഭിക്കുന്നതിനുള്ള കണക്കാക്കിയ സമയവും ഇരട്ടിയിലധികമായി. മേയിൽ 12 മാസമായിരുന്ന കാത്തിരിപ്പ് സമയം ഓഗസ്റ്റ് 10-ന് 25 മാസമായി ഉയർന്നു.
പഴയ രേഖകൾക്കായി ആർക്കൈവുകളിൽ തിരക്ക്
പൗരത്വത്തിനായി കനേഡിയൻ പൂർവികരുമായി ബന്ധം തെളിയിക്കുന്ന രേഖകൾ ആവശ്യമായതിനാൽ രാജ്യത്തെ ആർക്കൈവുകളിലും തിരക്ക് വർധിച്ചു. കുടുംബചരിത്രവുമായി ബന്ധപ്പെട്ട പഴയ രേഖകൾ തേടിയുള്ള അപേക്ഷകൾ ചില സ്ഥാപനങ്ങളിൽ 100 മുതൽ 300 ശതമാനം വരെ വർധിച്ചതായി അസോസിയേഷൻ ഓഫ് കനേഡിയൻ ആർക്കൈവിസ്റ്റ്സ് (Association of Canadian Archivists) വ്യക്തമാക്കി.
നൂറുകണക്കിന് വർഷം പഴക്കമുള്ള രേഖകൾ പോലും ചില അപേക്ഷകൾക്കായി പരിശോധിക്കേണ്ടിവരുന്നുണ്ട്. ചെറിയ പള്ളികളുടെ ആർക്കൈവുകളിലും പഴയ മൈക്രോഫിലിം രേഖകളിലും വരെ തിരച്ചിൽ നടത്തേണ്ട സാഹചര്യമാണുള്ളതെന്ന് ആർക്കൈവിസ്റ്റുകൾ പറയുന്നു.
ഈ അധിക ജോലിഭാരം നേരിടാൻ രാജ്യത്തെ ആർക്കൈവുകൾക്ക് കൂടുതൽ ധനസഹായം നൽകണമെന്നും സംഘടന ആവശ്യപ്പെട്ടു.
കൂടുതൽ അപേക്ഷകൾ എത്തുമോ?
ബിൽ C-3 പ്രാബല്യത്തിൽ വന്നതോടെ കൂടുതൽ അപേക്ഷകൾ എത്താനുള്ള സാധ്യതയുണ്ടെന്നാണ് ആർക്കൈവിസ്റ്റുകളുടെ ആശങ്ക. ഇതിനകം അനുവദിച്ച ചില പൗരത്വ സർട്ടിഫിക്കറ്റുകൾ രേഖകളിലെ പ്രശ്നങ്ങളെ തുടർന്ന് സസ്പെൻഡ് ചെയ്ത സംഭവങ്ങളും റിപ്പോർട്ട് ചെയ്തിട്ടുണ്ട്.
ഏകദേശം 100 സർട്ടിഫിക്കറ്റുകൾ സസ്പെൻഡ് ചെയ്തതിൽ 83 കേസുകൾ പരിഹരിച്ച് സർട്ടിഫിക്കറ്റുകൾ പുനഃസ്ഥാപിച്ചതായി കാനഡയുടെ ഇമിഗ്രേഷൻ വകുപ്പ് അറിയിച്ചു. ശേഷിക്കുന്ന ചില അപേക്ഷകരോട് കനേഡിയൻ പൂർവികത തെളിയിക്കുന്ന അധിക രേഖകൾ സമർപ്പിക്കാൻ ആവശ്യപ്പെട്ടിട്ടുണ്ട്.
