ഓട്ടവ : കനേഡിയൻ ഉൽപ്പന്നങ്ങൾക്ക് 50 ശതമാനം വരെ പുതിയ താരിഫ് ഏർപ്പെടുത്തുമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഭീഷണിയെ തുടർന്ന് കാനഡ–യുഎസ് വ്യാപാര ചർച്ചകൾ നിർണായക ഘട്ടത്തിലെത്തി. സിമന്റ് മുതൽ ഹോക്കി സ്റ്റിക്കുകൾ വരെയുള്ള വിവിധ ഉൽപ്പന്നങ്ങളെ പുതിയ നികുതികൾ ബാധിക്കുമെന്ന ആശങ്കയാണ് ഉയരുന്നത്.
പുതിയ താരിഫുകൾ ഓഗസ്റ്റ് 19ന് പ്രാബല്യത്തിൽ വരുമെന്ന സാഹചര്യത്തിൽ, അവസാന നിമിഷം വരെ ചർച്ചകൾ നടത്തി തീരുമാനം ഒഴിവാക്കാനുള്ള ശ്രമത്തിലാണ് കനേഡിയൻ സർക്കാർ. കാനഡയെ അന്യായമായി ലക്ഷ്യമിടുന്നുവെന്ന വിമർശനവും രാഷ്ട്രീയ രംഗത്ത് ശക്തമാകുകയാണ്.
പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള കനേഡിയൻ സംഘം അമേരിക്കൻ പ്രതിനിധികളുമായി ചർച്ചകൾ തുടരുകയാണ്. വ്യാപാര സംഘർഷം രൂക്ഷമായാൽ കനേഡിയൻ കയറ്റുമതിക്കാർക്കും ഉപഭോക്താക്കൾക്കും ഉണ്ടാകാവുന്ന സാമ്പത്തിക ആഘാതം ഒഴിവാക്കുന്നതിനുള്ള പരിഹാരമാണ് കാനഡ തേടുന്നത്. ഓഗസ്റ്റ് 19ന് മുമ്പ് ധാരണയിലെത്താനാകുമോ എന്നതാണ് ഇനി പ്രധാന ചോദ്യം.
