ഓട്ടവ: കാനഡ-യുഎസ് വ്യാപാര തർക്കം ക്ഷീരമേഖല, വാഹന വ്യവസായം, പ്രകൃതിവിഭവങ്ങൾ എന്നിവയിൽ നിന്ന് ഒടിടി പ്ലാറ്റ്ഫോമുകളിലേക്കും വ്യാപിക്കുന്നു. കനേഡിയൻ പ്രാദേശിക ഉള്ളടക്കമായ ‘Cancon’ നെ സംരക്ഷിക്കുന്നതിനുള്ള നിയമങ്ങൾ പിൻവലിക്കണമെന്ന യുഎസ് നിലപാടാണ് വ്യാപാരചർച്ചകളിൽ പുതിയ തർക്കത്തിന് വഴിവെച്ചിരിക്കുന്നത്.
നെറ്റ്ഫ്ലിക്സ്, ഡിസ്നി പ്ലസ്, യൂട്യൂബ്, ആമസോൺ പ്രൈം തുടങ്ങിയ സ്ട്രീമിങ് പ്ലാറ്റ്ഫോമുകളിൽ കനേഡിയൻ ഉള്ളടക്കത്തിന് കൂടുതൽ പ്രാധാന്യം നൽകുകയും പ്രാദേശിക നിർമാണങ്ങൾക്ക് സാമ്പത്തിക പിന്തുണ ഉറപ്പാക്കുകയും ചെയ്യുന്ന നയത്തിൽ വിട്ടുവീഴ്ച ചെയ്യില്ലെന്ന് പ്രധാനമന്ത്രി മാർക്ക് കാർണി വ്യക്തമാക്കി. കാനഡയുടെ സാംസ്കാരിക പരമാധികാരവും ഫ്രഞ്ച് ഭാഷാ ഉള്ളടക്കത്തിന്റെ സംരക്ഷണവും വിട്ടുകൊടുക്കാനാകില്ലെന്നാണ് സർക്കാരിന്റെ നിലപാട്.
ഡിജിറ്റൽ പ്ലാറ്റ്ഫോമുകളിലും ‘Cancon’
റേഡിയോ, ടെലിവിഷൻ മേഖലകളിൽ കനേഡിയൻ ഉള്ളടക്കം നിർബന്ധമാക്കുന്ന നയം കാനഡ പതിറ്റാണ്ടുകളായി പിന്തുടരുന്നുണ്ട്. എന്നാൽ ഒടിടി പ്ലാറ്റ്ഫോമുകളുടെ വളർച്ചയോടെ വിദേശ സ്ട്രീമിങ് കമ്പനികൾക്ക് സമാനമായ നിയന്ത്രണങ്ങൾ ബാധകമല്ലാതിരുന്നത് കനേഡിയൻ നിർമാതാക്കൾക്ക് വെല്ലുവിളിയായി.
ഈ സാഹചര്യം പരിഹരിക്കുന്നതിനായി മുൻ പ്രധാനമന്ത്രി ജസ്റ്റിൻ ട്രൂഡോയുടെ സർക്കാർ 2022ൽ ബ്രോഡ്കാസ്റ്റിങ് നിയമത്തിൽ മാറ്റം വരുത്തി ഓൺലൈൻ സ്ട്രീമിങ് പ്ലാറ്റ്ഫോമുകളെയും നിയന്ത്രണ പരിധിയിൽ കൊണ്ടുവന്നു. 2023 ഏപ്രിലിൽ നിയമഭേദഗതികൾ പ്രാബല്യത്തിൽ വന്നു.
ഒടിടി കമ്പനികളിൽ നിന്ന് സാമ്പത്തിക വിഹിതം
കാനഡയിൽ നിശ്ചിത പരിധിക്ക് മുകളിലുള്ള വരുമാനമുള്ള ഒടിടി കമ്പനികളിൽ നിന്ന് പ്രാദേശിക വാർത്തകൾ, ഫ്രഞ്ച് ഭാഷാ ഉള്ളടക്കം, തദ്ദേശീയ ജനവിഭാഗങ്ങളുടെ ഉള്ളടക്കം തുടങ്ങിയവയ്ക്കായി സാമ്പത്തിക സംഭാവന നൽകണമെന്ന് കനേഡിയൻ റേഡിയോ-ടെലിവിഷൻ ആൻഡ് ടെലികമ്യൂണിക്കേഷൻസ് കമ്മീഷൻ (CRTC) നിർദേശിച്ചിരുന്നു.
ആദ്യഘട്ടത്തിൽ 5 ശതമാനമായിരുന്ന സംഭാവന പിന്നീട് 15 ശതമാനമായി ഉയർത്താനുള്ള തീരുമാനമാണ് വ്യാപാര തർക്കം കൂടുതൽ രൂക്ഷമാക്കിയത്. ആഗോള ഒടിടി കമ്പനികളെ പ്രതിനിധീകരിക്കുന്ന മോഷൻ പിക്ചർ അസോസിയേഷൻ (MPA) ഈ നിയന്ത്രണത്തെ കോടതിയിൽ ചോദ്യം ചെയ്യുകയും കാനഡ-യുഎസ്-മെക്സിക്കോ കരാറായ CUSMAയുടെ വ്യവസ്ഥകൾക്ക് വിരുദ്ധമാണെന്ന് വാദിക്കുകയും ചെയ്തു.
സാമ്പത്തിക വിഹിതത്തേക്കാൾ വലിയ തർക്കം
ഒടിടി കമ്പനികൾക്ക് അധിക സാമ്പത്തിക ബാധ്യത ഏർപ്പെടുത്തുന്നതിന് പകരം സർക്കാർ ഫണ്ട് ഉപയോഗിച്ച് കനേഡിയൻ സിനിമകളും ടെലിവിഷൻ പരിപാടികളും പിന്തുണയ്ക്കുന്ന സംവിധാനത്തെക്കുറിച്ച് ഓട്ടവ ആലോചിച്ചിരുന്നു. വരിക്കാർക്ക് നിരക്ക് വർധനയുടെ ഭാരം ഉണ്ടാകാതിരിക്കണമെന്നതും ഇതിന് പിന്നിലെ ലക്ഷ്യമായിരുന്നു.
എന്നാൽ ഇപ്പോഴത്തെ പ്രധാന തർക്കം സാമ്പത്തിക സംഭാവനയെക്കാൾ കനേഡിയൻ ഉള്ളടക്കം സ്ട്രീമിങ് പ്ലാറ്റ്ഫോമുകളിൽ ഉപയോക്താക്കൾക്ക് എളുപ്പത്തിൽ കണ്ടെത്താൻ കഴിയുന്ന തരത്തിൽ പ്രദർശിപ്പിക്കണമെന്ന വ്യവസ്ഥയെ ചുറ്റിപ്പറ്റിയാണ്.
സാംസ്കാരിക പരമാധികാരം പ്രധാനമെന്ന് കാർണി
കനേഡിയൻ സാംസ്കാരിക ഉള്ളടക്കത്തിന്റെ പ്രചാരണത്തിലും വിതരണത്തിലും സർക്കാരിനുള്ള നിയന്ത്രണം ഉപേക്ഷിക്കാൻ കാനഡ തയ്യാറല്ലെന്നാണ് വിദഗ്ധരുടെ വിലയിരുത്തൽ.
കാനഡയെ അമേരിക്കയുടെ താൽപര്യങ്ങൾക്ക് മാത്രം വഴങ്ങുന്ന രാജ്യമായി മാറ്റാൻ അനുവദിക്കില്ലെന്ന നിലപാടാണ് കാർണി സ്വീകരിച്ചിരിക്കുന്നത്. വ്യാപാര ചർച്ചകളിൽ സാമ്പത്തിക വിഷയങ്ങൾക്കൊപ്പം സാംസ്കാരിക നയങ്ങളും നിർണായകമായ വിലപേശൽ വിഷയമായി മാറിയിരിക്കുകയാണ്.
കാനഡയുടെ സിനിമ, ടെലിവിഷൻ, ഫ്രഞ്ച് ഭാഷാ മാധ്യമ മേഖലകളെ സംരക്ഷിക്കാനുള്ള ശ്രമവും അമേരിക്കൻ സാംസ്കാരിക സ്വാധീനത്തെ ചെറുക്കാനുള്ള നയവും തമ്മിലുള്ള ഏറ്റുമുട്ടലായാണ് പുതിയ തർക്കത്തെ സാംസ്കാരിക മേഖലയിലെ നിരീക്ഷകർ വിലയിരുത്തുന്നത്. കാനഡ-യുഎസ് വ്യാപാരബന്ധത്തിലെ തർക്കങ്ങൾ കൂടുതൽ മേഖലകളിലേക്ക് വ്യാപിക്കുന്നതിന്റെ സൂചന കൂടിയാണിത്.
