ഓട്ടവ: കാനഡയുടെ 2026-ലെ ഫെഡറല്‍ ബജറ്റ് നവംബര്‍ 5-ന് അവതരിപ്പിക്കുമെന്ന് ധനമന്ത്രി ഫ്രാന്‍സ്വ ഫിലിപ്പ് ഷാംപെയ്ന്‍ അറിയിച്ചു. പ്രധാനമന്ത്രി മാര്‍ക്ക് കാര്‍ണിയുടെ നേതൃത്വത്തിലുള്ള ഫെഡറല്‍ സര്‍ക്കാര്‍ പാര്‍ലമെന്റില്‍ അവതരിപ്പിക്കുന്ന രണ്ടാമത്തെ ബജറ്റാണിത്. രാജ്യത്തിന്റെ സമ്പദ്വ്യവസ്ഥ വിവിധ സമ്മര്‍ദ്ദങ്ങളിലൂടെ കടന്നുപോകുന്ന നിര്‍ണായക ഘട്ടത്തിലാണ് ഈ ബജറ്റ് പ്രഖ്യാപനം വരുന്നത്.
പാര്‍ലമെന്ററി ബജറ്റ് ഓഫീസറുടെ (PBO) പുതിയ റിപ്പോര്‍ട്ട് പ്രകാരം, അടുത്ത അഞ്ച് വര്‍ഷത്തിനുള്ളില്‍ രാജ്യത്തിന്റെ ഫെഡറല്‍ കമ്മി പ്രതിവര്‍ഷം ശരാശരി 3 ബില്യണ്‍ ഡോളര്‍ അധികമായിരിക്കുമെന്നാണ് കണക്കാക്കുന്നത്. എന്നാല്‍, മിഡില്‍ ഈസ്റ്റിലെ സംഘര്‍ഷങ്ങളെ തുടര്‍ന്ന് ഇന്ധനവിലയിലുണ്ടായ വര്‍ധനവ് ഹ്രസ്വകാലത്തേക്ക് ഫെഡറല്‍ സര്‍ക്കാരിന്റെ വരുമാനം ഉയര്‍ത്താന്‍ കാരണമായിട്ടുണ്ട്. ഈ വരുമാന വര്‍ധന നടപ്പു സാമ്പത്തിക വര്‍ഷത്തിലെ ബജറ്റ് കമ്മി കുറയ്ക്കാന്‍ സഹായിക്കുമെന്നാണ് PBO-യുടെ വിലയിരുത്തല്‍.
നടപ്പ് സാമ്പത്തിക വര്‍ഷത്തിന്റെ രണ്ടാം പാദത്തില്‍ കനേഡിയന്‍ സമ്പദ്വ്യവസ്ഥ മികച്ച വളര്‍ച്ചയും കരുത്തും പ്രകടിപ്പിച്ചിരുന്നു. എങ്കിലും, ഓഗസ്റ്റില്‍ അമേരിക്കയുമായി നടന്ന വ്യാപാര ചര്‍ച്ചകള്‍ പരാജയപ്പെട്ടത് രാജ്യത്തിന്റെ വളര്‍ച്ചാ നിരക്കിനെ വീണ്ടും സമ്മര്‍ദ്ദത്തിലാക്കിയിട്ടുണ്ട്. ഈ പ്രതികൂല സാഹചര്യങ്ങളെ മറികടക്കാന്‍ ബജറ്റില്‍ എത്തരം സാമ്പത്തിക പരിഷ്‌കാരങ്ങളാകും സര്‍ക്കാര്‍ പ്രഖ്യാപിക്കുകയെന്നാണ് സാമ്പത്തിക ലോകം ഉറ്റുനോക്കുന്നത്.
