വാഷിങ്ടണ്‍: കാനഡയും അമേരിക്കയും തമ്മില്‍ പുതിയ വ്യാപാര കരാറിന് (Trade Deal) കളമൊരുങ്ങുന്നതായി സൂചന നല്‍കി യു.എസ് പ്രസിഡന്റ് ഡോണള്‍ഡ് ട്രംപ്. കാനഡയുമായി വളരെ മികച്ചൊരു കരാറിനോട് തങ്ങള്‍ ഏറെ അടുത്തിരിക്കുകയാണെന്നും, ഇതിനായി കാനഡ ശക്തമായി പരിശ്രമിക്കുന്നുണ്ടെന്നും വാഷിങ്ടണില്‍ മാധ്യമപ്രവര്‍ത്തകരോട് സംസാരിക്കവെ ട്രംപ് വ്യക്തമാക്കി. ചര്‍ച്ചകളില്‍ തങ്ങള്‍ക്കാണ് മേല്‍ക്കൈ ഉള്ളതെന്നും അദ്ദേഹം കൂട്ടിച്ചേര്‍ത്തു.
എന്നാല്‍, അമേരിക്കയില്‍ വരാനിരിക്കുന്ന ഇടക്കാല തിരഞ്ഞെടുപ്പിന് (Midterm Elections) മുന്നോടിയായി കരാര്‍ ഉണ്ടാകുമോ എന്ന കാര്യത്തില്‍ കാനഡയ്ക്ക് വലിയ ഉറപ്പില്ല. ഇരുരാജ്യങ്ങളുടെയും താല്‍പ്പര്യങ്ങള്‍ സംരക്ഷിക്കുന്ന നല്ലൊരു കരാറിനായി തുറന്ന മനസ്സോടെ ചര്‍ച്ചയ്ക്ക് തയ്യാറാണെന്ന് കാനഡ പ്രധാനമന്ത്രി മാര്‍ക്ക് കാര്‍ണി ഇസ്താംബൂളില്‍ പറഞ്ഞു. അമേരിക്ക തയ്യാറാണെങ്കില്‍ ഉടന്‍ തന്നെ കരാറൊപ്പിടാന്‍ കാനഡ സജ്ജമാണ്, എന്നാല്‍ അതിന് മാസങ്ങളോ പുതിയ ഭരണകൂടം വരുന്നതുവരെയോ കാത്തിരിക്കേണ്ടി വന്നാലും തങ്ങള്‍ക്ക് ധൃതിയില്ലെന്ന് കാര്‍ണി കൂട്ടിച്ചേര്‍ത്തു.
രാഷ്ട്രീയ ആരോപണങ്ങളും വ്യവസായ മേഖലയിലെ പ്രതിസന്ധിയും വ്യാപാര ചര്‍ച്ചകള്‍ ഒരുവശത്ത് നടക്കുമ്പോഴും ഇരുരാജ്യങ്ങളും തമ്മില്‍ രാഷ്ട്രീയ തര്‍ക്കങ്ങള്‍ രൂക്ഷമാണ്. യു.എസ് ഇടക്കാല തിരഞ്ഞെടുപ്പില്‍ കനേഡിയന്‍ നേതാക്കള്‍ രാഷ്ട്രീയമായി ഇടപെടുന്നുവെന്ന് ഓട്ടവയിലെ അമേരിക്കന്‍ സ്ഥാനപതി ആരോപിച്ചിരുന്നു. കനേഡിയന്‍ വ്യവസായ മന്ത്രി മെലാനി ജോളി (Melanie Joly) ഉള്‍പ്പെടെയുള്ളവരുടെ ഇടപെടലുകളാണ് അമേരിക്ക ചൂണ്ടിക്കാണിച്ചത്.
എന്നാല്‍ ഈ ആരോപണങ്ങള്‍ തള്ളിയ മെലാനി ജോളി, ഒന്റാരിയോയിലെ ‘സ്റ്റെല്‍ക്കോ’ (Stelco) സ്റ്റീല്‍ പ്ലാന്റിലെ 500 ഓളം തൊഴിലാളികളെ പിരിച്ചുവിടാനുള്ള തീരുമാനത്തിനെതിരെ യു.എസ് കമ്പനിയായ ക്ലീവ്ലാന്റ്-ക്ലിഫ്‌സിന് (Cleveland-Cliffs) ശക്തമായ മുന്നറിയിപ്പ് നല്‍കി. 2025 മാര്‍ച്ച് മാസത്തില്‍ കനേഡിയന്‍ സ്റ്റീല്‍, അലുമിനിയം മേഖലയ്ക്ക് മേല്‍ ട്രംപ് ഭരണകൂടം 25 ശതമാനം തീരുവ (Tariff) ചുമത്തിയിരുന്നു. പിന്നീട് ഇക്കഴിഞ്ഞ ജൂണില്‍ ഇത് 50 ശതമാനമായി ഉയര്‍ത്തുകയും ചെയ്തു. ഇതിന് മറുപടിയായി കാനഡയും അമേരിക്കയില്‍ നിന്നുള്ള 27.6 ബില്യണ്‍ ഡോളറിന്റെ ഉല്‍പ്പന്നങ്ങള്‍ക്ക് ശക്തമായ തിരിച്ചടി തീരുവ ഏര്‍പ്പെടുത്തി പ്രതിരോധം തീര്‍ക്കുകയാണ്.
