ഓട്ടവ: കനേഡിയന്‍ ഉല്‍പ്പന്നങ്ങള്‍ക്ക് മേല്‍ യുഎസ് പ്രസിഡന്റ് ഡോണള്‍ഡ് ട്രംപ് ഭരണകൂടം ഏര്‍പ്പെടുത്തിയ പുതിയ ഇറക്കുമതി തീരുവ കാനഡയിലെ വുഡ് ഫ്‌ലോറിങ് (ഹാര്‍ഡ്വുഡ്) മേഖലയെ കടുത്ത പ്രതിസന്ധിയിലാക്കുന്നു. പുതിയ തീരുമാനം മൂലം ആയിരക്കണക്കിന് തൊഴിലുകള്‍ ഇല്ലാതാകുമെന്നും മേഖല തകര്‍ച്ചയുടെ വക്കിലാണെന്നും മുന്‍നിര കനേഡിയന്‍ ഹാര്‍ഡ്വുഡ് ഫ്‌ലോറിങ് നിര്‍മ്മാതാക്കളായ ‘പ്രിവെര്‍കോ’യുടെ (Preverco) പ്രസിഡന്റും സി.ഇ.ഒയുമായ ഴാങ്-ഫ്രാങ്കോയിസ് ഡുഫ്രെസ്‌നെ മുന്നറിയിപ്പ് നല്‍കി.
കാനഡയില്‍ നിന്നുള്ള ചില ഉല്‍പ്പന്നങ്ങളെ തീരുവ പട്ടികയില്‍ നിന്ന് ഒഴിവാക്കുകയും പകരം പുതിയ ഉല്‍പ്പന്നങ്ങള്‍ക്ക് മേല്‍ നികുതി ചുമത്തുകയുമാണ് ട്രംപ് ഭരണകൂടം ചെയ്തത്. ഷാംപൂ, സോപ്പുകള്‍, പെയിന്റുകള്‍, കൊക്കോ ഉല്‍പ്പന്നങ്ങള്‍, പരവതാനികള്‍ എന്നിവയ്‌ക്കൊപ്പം ഫ്‌ലോറിങ് ഉള്‍പ്പെടെയുള്ള തടി ഉല്‍പ്പന്നങ്ങളുമാണ് പുതിയ നികുതി പട്ടികയില്‍ ഉള്‍പ്പെട്ടിട്ടുള്ളത്.
തങ്ങളുടെ ബിസിനസ്സിന്റെ 25 ശതമാനത്തോളം ഒറ്റരാത്രികൊണ്ട് ഇല്ലാതായെന്ന് ഡുഫ്രെസ്‌നെ പറഞ്ഞു. നികുതി ഭാരം ഉപഭോക്താക്കളിലേക്ക് മാറ്റാനോ തങ്ങള്‍ക്ക് തനിയെ താങ്ങാനോ കഴിയില്ല. യുഎസ് വിപണി നഷ്ടപ്പെടുന്നത് ഫ്‌ലോറിങ് വ്യവസായത്തെ മാത്രമല്ല, മരമില്ലുകള്‍, തടി വെട്ടുകാര്‍, ഈ വ്യവസായത്തെ ആശ്രയിച്ച് കഴിയുന്ന ഗ്രാമങ്ങളിലെ വ്യാപാര സ്ഥാപനങ്ങള്‍ എന്നിവയെപ്പോലും സാരമായി ബാധിക്കും.
അമേരിക്കന്‍ രാഷ്ട്രീയ നീക്കം
അമേരിക്കന്‍ ആഭ്യന്തര രാഷ്ട്രീയവും വരാനിരിക്കുന്ന ഇടക്കാല തിരഞ്ഞെടുപ്പുമാണ് ഈ നികുതി മാറ്റത്തിന് പിന്നിലെ പ്രധാന കാരണമെന്ന് നിരീക്ഷകര്‍ ചൂണ്ടിക്കാണിക്കുന്നു. മെയ്ന്‍ സംസ്ഥാനത്തു നിന്നുള്ള റിപ്പബ്ലിക്കന്‍ സെനറ്റര്‍ സുസന്‍ കോളിന്‍സിന് തങ്ങളുടെ സംസ്ഥാനത്തെ സാധാരണക്കാരുടെ വിലക്കയറ്റ ആശങ്കകള്‍ പരിഹരിക്കേണ്ടതുണ്ട്. കാനഡയുമായുള്ള വ്യാപാരത്തെ ഏറെ ആശ്രയിക്കുന്ന മെയ്ന്‍ സംസ്ഥാനത്ത് ജനരോഷം തണുപ്പിക്കാനും റിപ്പബ്ലിക്കന്‍ പാര്‍ട്ടിക്ക് മേല്‍ക്കൈ ഉറപ്പിക്കാനുമാണ് പുതിയ നീക്കമെന്ന് സി.ടി.വി ന്യൂസ് രാഷ്ട്രീയ നിരീക്ഷകന്‍ എറിക് ഹാം വിലയിരുത്തി.
ഓട്ടവയുടെ അടിയന്തര ഇടപെടല്‍ വേണം
അമേരിക്കന്‍ നികുതി നിലവില്‍ വരുന്ന ഒക്ടോബര്‍ 30-ന് മുമ്പായി കനേഡിയന്‍ സര്‍ക്കാര്‍ അടിയന്തരമായി ഇടപെടണമെന്ന് ഫ്‌ലോറിങ് വ്യവസായ മേഖല ആവശ്യപ്പെടുന്നു. ചൈനയില്‍ നിന്നടക്കം കാനഡയിലേക്ക് ഇറക്കുമതി ചെയ്യുന്ന ഹാര്‍ഡ്വുഡ് ഫ്‌ലോറിങ്ങിന് മേല്‍ 100 ശതമാനം സര്‍ചാര്‍ജ് ചുമത്തണമെന്ന് ആവശ്യപ്പെട്ട് ഡുഫ്രെസ്‌നെ കനേഡിയന്‍ ധനമന്ത്രി ഫ്രാങ്കോയിസ്-ഫിലിപ്പ് ഷാംപെയ്‌ന് കത്തയച്ചു. പ്രാദേശിക നിര്‍മ്മാതാക്കളെ സംരക്ഷിക്കാന്‍ സര്‍ക്കാര്‍ അടിയന്തര നടപടി സ്വീകരിച്ചില്ലെങ്കില്‍ ബിസിനസുകള്‍ എന്നെന്നേക്കുമായി പൂട്ടിപ്പോകേണ്ടി വരുമെന്നും അദ്ദേഹം കൂട്ടിച്ചേര്‍ത്തു.
