ബ്രസീലിയ: ബ്രസീലില്‍ ലുല ഡി സില്‍വയ്ക്ക് വീണ്ടും മിന്നുന്ന വിജയം. നിലവിലെ പ്രസിഡന്റും ഇടത് നേതാവുമായ ലുല ഡി സില്‍വ ബ്രസീലിന്റെ പ്രസിഡന്റായി നാലാം തവണയും തെരഞ്ഞെടുക്കപ്പെട്ടു. തീവ്ര വലതുപക്ഷ മുന്‍ പ്രസിഡന്റ് ജെയര്‍ ബോള്‍സൊനാരോയുടെ മകനും സെനറ്ററുമായ ഫ്‌ലാവിയോ ബോള്‍സൊനാരോയെ കടുത്ത പോരാട്ടത്തില്‍ അട്ടിമറിച്ചാണ് ലുല വീണ്ടും അധികാരത്തിലെത്തുന്നത്. ലാറ്റിന്‍ അമേരിക്കയിലെ ഏറ്റവും വലിയ രാജ്യമായ ബ്രസീലില്‍ നാലാം തവണയും പ്രസിഡന്റാകുന്ന ഏക വ്യക്തിയാണ് ലുല ഡി സില്‍വ.
വിജയം രണ്ടാം ഘട്ട വോട്ടെടുപ്പില്‍
ആദ്യഘട്ട വോട്ടെടുപ്പില്‍ ഫ്‌ലാവിയോ ബോള്‍സൊനാരോ മുന്നിലെത്തിയിരുന്നെങ്കിലും, രണ്ടാം ഘട്ട തെരഞ്ഞെടുപ്പില്‍ ലുല വന്‍ തിരിച്ചുവരവ് നടത്തുകയായിരുന്നു. ബ്രസീലിലെ സുപ്പീരിയര്‍ ഇലക്ടറല്‍ കോടതി പുറത്തുവിട്ട ഔദ്യോഗിക കണക്കുകള്‍ പ്രകാരം ലുല ഡി സില്‍വ 51.8% വോട്ടുകള്‍ നേടിയപ്പോള്‍, ഫ്‌ലാവിയോ ബോള്‍സൊനാരോയ്ക്ക് 48.2% വോട്ടുകളാണ് ലഭിച്ചത്.
ഫലം തള്ളി ബോള്‍സൊനാരോ, വീഥികളില്‍ വിജയാഘോഷം
തെരഞ്ഞെടുപ്പ് ഫലം അംഗീകരിക്കാന്‍ ഫ്‌ലാവിയോ ബോള്‍സൊനാരോ വിസമ്മതിച്ചു. മോശം കാലാവസ്ഥയും ട്രാഫിക് ബ്ലോക്കും കാരണം വോട്ടെടുപ്പ് സമയം നീട്ടിനല്‍കിയത് തെരഞ്ഞെടുപ്പ് പ്രക്രിയയെ ബാധിച്ചെന്നും ഫലം റദ്ദാക്കണമെന്നുമാണ് അദ്ദേഹത്തിന്റെ ആവശ്യം. അതേസമയം, തെരഞ്ഞെടുപ്പ് വിജയം സ്ഥിരീകരിച്ചതിന് പിന്നാലെ ഭാര്യ റോസാംഗല ഡാ സില്‍വയ്ക്കും അടുത്ത അനുയായികള്‍ക്കുമൊപ്പം ലുല സന്തോഷം പങ്കുവെച്ചു. സാവോ പോളോ ഉള്‍പ്പെടെയുള്ള പ്രധാന നഗരങ്ങളില്‍ ആയിരക്കണക്കിന് ലൂല അനുകൂലികള്‍ ചുവന്ന പതാകകളുമായി വിജയാഘോഷം സംഘടിപ്പിച്ചു.
അമേരിക്കന്‍ നയങ്ങള്‍ക്കുള്ള തിരിച്ചടി
അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ നയങ്ങളുടെ കടുത്ത വിമര്‍ശകനാണ് ലുല. ലാറ്റിന്‍ അമേരിക്കയില്‍ അമേരിക്കയുടെ സ്വാധീനം വര്‍ദ്ധിച്ചുവരുന്നതില്‍ ആശങ്കയുണ്ടായിരുന്നവര്‍ക്ക് ലുലയുടെ വിജയം വലിയ ആശ്വാസമാണ് നല്‍കുന്നത്. ഈ വിജയത്തോടെ ലാറ്റിന്‍ അമേരിക്കയിലെ ഏറ്റവും വലിയ രണ്ട് രാജ്യങ്ങളായ മെക്‌സിക്കോയും ബ്രസീലും ഇടത് ആഭിമുഖ്യമുള്ള ഭരണത്തിന് കീഴിലായി.
