എഡ്മിന്റൻ: ആൽബർട്ടയിലെ സ്കൂളുകളിൽ കാനഡയുടെയും പ്രവിശ്യയുടെയും പതാകകൾ പ്രദർശിപ്പിക്കുന്നതിനായി അധിക കൊടിമരങ്ങൾ സ്ഥാപിക്കേണ്ടതില്ലെന്ന് പ്രീമിയർ ഡാനിയേൽ സ്മിത്ത്. ജനുവരി മുതൽ പ്രാബല്യത്തിൽ വരുന്ന പുതിയ പതാക നിയമം നടപ്പാക്കാൻ നിലവിലുള്ള സൗകര്യങ്ങൾ ഉപയോഗിക്കാമെന്ന് അവർ വ്യക്തമാക്കി.
രണ്ട് കൊടിമരങ്ങളുള്ള സ്കൂളുകൾക്ക് രണ്ട് പതാകകളും പുറത്തു പ്രദർശിപ്പിക്കാം. ഒരു കൊടിമരം മാത്രമുള്ള സ്കൂളുകളിൽ കാനഡയുടെ പതാക പുറത്തും ആൽബർട്ടയുടെ പതാക പ്രവേശന കവാടത്തിന് സമീപവും സ്ഥാപിക്കാം. കൊടിമരങ്ങളില്ലാത്ത സ്കൂളുകൾക്ക് പ്രവേശന ഹാളിൽ സ്റ്റാൻഡുകൾ ഉപയോഗിച്ച് പതാകകൾ പ്രദർശിപ്പിക്കാനും അനുമതിയുണ്ട്.
പുതിയ നിയമം നടപ്പാക്കാൻ അധിക കൊടിമരങ്ങൾ സ്ഥാപിക്കുന്നത് വലിയ സാമ്പത്തിക ബാധ്യതയാകുമെന്ന് സ്കൂൾ ബോർഡുകൾ നേരത്തെ അറിയിച്ചിരുന്നു. കാൽഗറി വിദ്യാഭ്യാസ ബോർഡിന്റെ കണക്കനുസരിച്ച് 223 അധിക കൊടിമരങ്ങൾ സ്ഥാപിക്കാൻ ഏകദേശം 4 മില്യൺ ഡോളർ ചെലവാകുമായിരുന്നു.

ശനിയാഴ്ച സംപ്രേഷണം ചെയ്ത റേഡിയോ പരിപാടിയിലാണ് സ്മിത്ത് ബദൽ മാർഗങ്ങൾ വിശദീകരിച്ചത്. അതേസമയം, സ്കൂളുകളിലെ സാഹചര്യങ്ങൾ പരിശോധിക്കാതെയാണ് സർക്കാർ നിയമം കൊണ്ടുവന്നതെന്ന് ആൽബർട്ട എൻഡിപി നേതാവ് നഹീദ് നെൻഷി വിമർശിച്ചു.
ജനുവരിയിൽ നിയമം പ്രാബല്യത്തിൽ വരാനിരിക്കെ, അധിക സാമ്പത്തിക ബാധ്യതയില്ലാതെ പതാകകൾ പ്രദർശിപ്പിക്കാനുള്ള മാർഗങ്ങളാണ് സർക്കാർ മുന്നോട്ടുവച്ചിരിക്കുന്നത്.
