അഖില സുരേഷ്
പലപ്പോഴും പ്രതികരണങ്ങളിലൂടെ വാര്ത്തകളില് ഇടംപിടിക്കാറുള്ള വ്യക്തിയാണ് അമിതാഭ് ബച്ചന്റെ ഭാര്യ ജയ ബച്ചന്. ഇപ്പോള് ഇതാ അമിതാഭ് ബച്ചനുമായുള്ള വിവാഹവുമായി ബന്ധപ്പെട്ട് ജയ നടത്തിയ വെളിപ്പെടുത്തല് ശ്രദ്ധേയമാകുകയാണ്. വിവാഹത്തിന് മുമ്പ് അമിതാഭ് ബച്ചന് ഒരു കണ്ടീഷന് മുന്നോട്ടുവെച്ചിരുന്നു എന്നാണ് ജയ ബച്ചന് പറഞ്ഞത്.
9 മണി മുതല് 5 മണി വരെ വര്ക്ക് ചെയ്യുന്ന ഒരു ഭാര്യയെ അല്ല തനിയ്ക്ക് വേണ്ടതെന്ന് വിവാഹത്തിന് മുമ്പ് തന്നെ അമിതാഭ് ബച്ചന് പറഞ്ഞിരുന്നുവെന്ന് ജയ വെളിപ്പെടുത്തി. കൊച്ചുമകളായ നവ്യ നവേലി നന്ദയുടെ പോഡ്കാസ്റ്റിലായിരുന്നു ജയ ബച്ചന്റെ പ്രതികരണം. അമിതാഭ് ബച്ചന് എങ്ങനെയാണ് പ്രൊപ്പോസ് ചെയ്തതെന്ന നന്ദയുടെ ചോദ്യത്തിന് രസകരമായ സംഭവവും ജയ തുറന്നുപറഞ്ഞു.
കൊല്ക്കത്തയില് ഷൂട്ടിംഗ് നടക്കുന്നതിനിടയില് താനും അമിതാഭ് ബച്ചനും ഒരു കാര്യം തീരുമാനിച്ചു. ഒരുമിച്ച് അഭിനയിക്കുന്ന ഏതെങ്കിലും ഒരു സിനിമ ഹിറ്റായാല് ഒരുമിച്ച് അവധി ആഘോഷിക്കാം. അങ്ങനെ സഞ്ജീര് എന്ന സിനിമ ഹിറ്റായി. പക്ഷേ, ഒരു പ്രശ്നമുണ്ടെന്ന് അമിതാഭ് ബച്ചന് പറഞ്ഞു. ജയയുടെ കൂടെ അവധി ആഘോഷിക്കാന് പോകാന് രക്ഷിതാക്കള് അനുവദിച്ചില്ലെന്നും അങ്ങനെയെങ്കില് ജയയെ വിവാഹം കഴിക്കണമെന്ന് അവര് പറഞ്ഞെന്നും അമിതാഭ് അറിയിച്ചെന്ന് ജയ പറഞ്ഞു.
ഒക്ടോബറില് വിവാഹം കഴിക്കാനായിരുന്നു തീരുമാനം. എന്നാല് ഇക്കാരണത്താല് വിവാഹം നേരത്തെയാക്കാമെന്നും ജൂണിലേയ്ക്ക് മാറ്റാമെന്നും താന് പറഞ്ഞെന്ന് ജയ വെളിപ്പെടുത്തി. 9-5 വര്ക്ക് ചെയ്യാതെ ശരിയായ ആളുകള്ക്കൊപ്പം ശരിയായ സമയത്ത് വര്ക്ക് ചെയ്യണമെന്നും എല്ലാ ദിവസവും വര്ക്ക് ചെയ്യണ്ടെന്നുമായിരുന്നു അമിതാഭ് ബച്ചന്റെ കണ്ടീഷന്. ഈ കണ്ടീഷന് താന് അംഗീകരിച്ചെന്ന് ജയ ബച്ചന് പറഞ്ഞു.
1973ലാണ് അമിതാഭ് ബച്ചനും ജയയും വിവാഹിതരായത്. പിന്നീട് ഇരുവര്ക്കും ഒരു പെണ്കുഞ്ഞ് പിറന്നു – ശ്വേത ബച്ചന്. 1976ലാണ് രണ്ടാമനായി അഭിഷേക് ബച്ചന് ജനിച്ചത്. വിവാഹം കഴിഞ്ഞ് ഇത്രയേറെ വര്ഷങ്ങളായിട്ടും ഇന്നും പഴയ ചുറുചുറുക്കോടെയാണ് അമിതാഭ് ബച്ചനും ജയയും മുന്നോട്ട് പോകുന്നത്. ഇരുവരും ആരാധകരുമായി കപ്പിള്സ് ഗോള്സ് പങ്കുവെയ്ക്കാറുമുണ്ട്.