വാൻകൂവർ : രാജ്യത്തെ സമ്പദ്‌വ്യവസ്ഥയെ പ്രതികൂലമായി ബാധിക്കുന്ന ബ്രിട്ടീഷ് കൊളംബിയൻ തുറമുഖങ്ങളിൽ ജൂലൈ 1 മുതൽ ആരംഭിച്ച ഡോക്ക് തൊഴിലാളികളുടെ പണിമുടക്ക് അവസാനിപ്പിക്കാൻ 24 മണിക്കൂർ സമയപരിധി നൽകി ഫെഡറൽ ലേബർ മിനിസ്റ്റർ സീമസ് ഒ റീഗൻ.
പണിമുടക്ക് അവസാനിപ്പിക്കുന്നതിന് കാനഡ ലേബർ കോഡിന് കീഴിലുള്ള തന്റെ നിയമപരമായ അധികാരങ്ങൾ ഉപയോഗിക്കുമെന്നും സീമസ് ഒ റീഗൻ വ്യക്തമാക്കി.
ബിസി മാരിടൈം എംപ്ലോയേഴ്‌സ് അസോസിയേഷനും ഇന്റർനാഷണൽ ലോംഗ്‌ഷോർ ആൻഡ് വെയർഹൗസ് യൂണിയൻ കാനഡയുമായി ചേർന്ന് 24 മണിക്കൂറിനുള്ളിൽ സെറ്റിൽമെന്റിന്റെ നിബന്ധനകൾ തയ്യാറാക്കാൻ മധ്യസ്ഥനെ നിയോഗിച്ചിട്ടുണ്ടെന്നും അദ്ദേഹം അറിയിച്ചു.ഈ നിബന്ധനകൾ ലഭിച്ചതിന് ശേഷം, ഇരുപക്ഷത്തിനും അവരവരുടെ അംഗങ്ങൾക്ക് അംഗീകാരത്തിനായി നിബന്ധനകൾ ശുപാർശ ചെയ്യുന്നതിനുള്ള അവരുടെ സന്നദ്ധത അവലോകനം ചെയ്യാനും ആശയവിനിമയം നടത്താനും 24 മണിക്കൂർ കൂടി സമയം നൽകും, മന്ത്രി സീമസ് ഒ റീഗൻ അറിയിച്ചു.
ഏപ്രിൽ മുതൽ ചർച്ചകൾ നടക്കുകയും എന്നാൽ, പണിമുടക്ക് ആരംഭിക്കുകയും ചെയ്തിട്ടുണ്ടെങ്കിലും ഈ സമയപരിധിക്കുള്ളിൽ ഇരുപക്ഷത്തിനും ഒരുപോലെ പ്രയോജനകരമായ കരാർ സാധ്യമാകുമെന്ന് വിശ്വാസമുള്ളതിനാലാണ് ഈ നീക്കം നടത്തുന്നതെന്നും ഒ റീഗൻ പറഞ്ഞു. പതിനൊന്ന് ദിവസത്തെ ജോലി സ്തംഭനത്തിന് ശേഷം, തൊഴിലുടമയുടെയും യൂണിയന്റെയും നിലപാടുകൾ തമ്മിലുള്ള വ്യത്യാസം തുടർച്ചയായ ജോലി നിർത്തിവയ്ക്കുന്നതിനെ ന്യായീകരിക്കാൻ പര്യാപ്തമല്ലെന്നും അദ്ദേഹം കൂട്ടിച്ചേർത്തു.
ഏഷ്യയിൽ നിന്ന് അടക്കം വിദേശ രാജ്യങ്ങളിൽ നിന്നും വരുന്നതും പോകുന്നതുമായ ചരക്കുകളുടെ പ്രാഥമിക തുറമുഖങ്ങളായ വാൻകൂവർ തുറമുഖവും പടിഞ്ഞാറൻ തീരത്തെ മറ്റ് 30-ലധികം സമുദ്ര ഗേറ്റ്‌വേകളും രാജ്യത്തിൻറെ സമ്പദ്‌വ്യവസ്ഥയുടെ പ്രവർത്തനത്തിന് നിർണായകമാണ്.
പണിമുടക്ക് നീണ്ടുനിൽക്കുന്നതിനനുസരിച്ച് രാജ്യത്തുടനീളം സാധനങ്ങളുടെ വില ഉയരുമെന്നും പ്രതിദിനം 500 മില്യൺ ഡോളറിന്റെ നഷ്ടം രാജ്യത്തിൻറെ സമ്പദ്‌വ്യവസ്ഥയ്ക്ക് ഉണ്ടാക്കുമെന്നും വിദഗ്ധർ പറയുന്നു.
