മലപ്പുറം: വാല്പ്പാറയിലുണ്ടായ ദാരുണമായ അപകടത്തില് പൊലിഞ്ഞ പ്രിയ അധ്യാപകര്ക്ക് വിങ്ങുന്ന ഹൃദയത്തോടെ വിടനല്കി മലപ്പുറം. തങ്ങളെ അക്ഷരമുറ്റത്തേക്ക് കൈപിടിച്ചു നടത്തിയ ഗുരുനാഥന്മാരുടെ വേര്പാട് ഉള്ക്കൊള്ളാനാകാതെ വിതുമ്പുന്ന പൂര്വവിദ്യാര്ത്ഥികളും നാട്ടുകാരും പാങ്ങ് ഗ്രാമത്തിന്റെ നൊമ്പരമായി മാറി. എല്.കെ.ജി മുതല് തങ്ങളെ പഠിപ്പിച്ച മജീദ് മാഷ്, റംല ടീച്ചര്, സുഹ്റ ടീച്ചര്, ആശ ടീച്ചര് എന്നിവരുടെ വേര്പാട് ഒരു വലിയ ശൂന്യതയാണ് തങ്ങളില് സൃഷ്ടിച്ചിരിക്കുന്നതെന്ന് പൊതുദര്ശനത്തിനെത്തിയവര് കണ്ണീരോടെ ഓര്ത്തെടുത്തു.
കാഴ്ചാപരിമിതിയുള്ളപ്പോഴും അറിവിന്റെ വെളിച്ചം പകര്ന്നു നല്കിയ മജീദ് മാഷിന്റെയും, സ്നേഹനിധികളായ അധ്യാപകരുടെയും ഓര്മ്മകള് ശിഷ്യരെ വല്ലാതെ ഉലയ്ക്കുന്നുണ്ട്. പഠനം കഴിഞ്ഞിറങ്ങി വര്ഷങ്ങള് പിന്നിട്ടിട്ടും തങ്ങളുടെ ഓരോ വളര്ച്ചയിലും താങ്ങായി നിന്ന പ്രിയപ്പെട്ടവരെ അവസാനമായി ഒരുനോക്ക് കാണാന് നൂറുകണക്കിന് ആളുകളാണ് പാങ്ങ് അമ്പലപ്പറമ്പ് സ്കൂളിലെ പൊതുദര്ശന വേദിയില് എത്തിയത്. കുഞ്ഞുനാളിലെ കൂട്ടുകാരന്റെ വിയോഗം കൂടിയായപ്പോള് ഒരു നാട് മുഴുവന് വിറങ്ങലിച്ചു നില്ക്കുന്ന കാഴ്ചയായിരുന്നു അവിടെ.
വെള്ളിയാഴ്ച വൈകീട്ട് വാല്പ്പാറയിലെ ഹെയര്പിന് വളവില് വെച്ച് നിയന്ത്രണം വിട്ട ടെമ്പോ ട്രാവലര് കൊക്കയിലേക്ക് മറിഞ്ഞാണ് അധ്യാപകരും കുടുംബാംഗങ്ങളും ഉള്പ്പെടെ ഒമ്പത് പേര് മരിച്ചത്. ഇന്ന് രാവിലെ ഒമ്പത് മണിയോടെ മൃതദേഹങ്ങള് നാട്ടിലെത്തിച്ചു. ഓരോ ചടങ്ങുകളിലും ആവേശമായിരുന്ന പ്രിയ ഗുരുനാഥന്മാരുടെ ചിത്രങ്ങള് നെഞ്ചോട് ചേര്ത്തുവെച്ച് ആദരാഞ്ജലികള് അര്പ്പിക്കുമ്പോള് മലപ്പുറത്തെ ഈ ഗ്രാമം കണ്ണീരിലാണ്ടിരിക്കുകയാണ്.
