ഹാലിഫാക്സ്: പ്രവിശ്യയുടെ വ്യാപാര മേഖല കൂടുതൽ വൈവിധ്യവത്കരിക്കുന്നതിനുള്ള ശ്രമങ്ങളുടെ ഭാഗമായി ഈ ആഴ്ച സ്വിറ്റ്സർലൻഡ് സന്ദർശിക്കാൻ ഒരുങ്ങി നോവസ്കോഷ പ്രീമിയർ ടിം ഹൂസ്റ്റൺ. ഹാലിഫാക്സ് പോർട്ട് അതോറിറ്റിയുമായി സഹകരിച്ച് തുറമുഖങ്ങളുടെ ശേഷി വർദ്ധിപ്പിക്കുന്നതിനും അതുവഴി സാമ്പത്തിക വളർച്ച കൈവരിക്കുന്നതിനുമായി വിദേശ നിക്ഷേപം ആകർഷിക്കുകയാണ് ഈ സന്ദർശനത്തിന്റെ പ്രധാന ലക്ഷ്യം. സ്വകാര്യ നിക്ഷേപ പങ്കാളികളുമായി ചർച്ച നടത്തുന്നതിനായി ഹാലിഫാക്സ് പോർട്ട് അതോറിറ്റി പ്രസിഡന്റും സി.ഇ.ഒയുമായ ഫുൾവിയോ ഫ്രാക്കാസിക്കൊപ്പം ബുധനാഴ്ച വരെ പ്രീമിയർ ജനീവയിലുണ്ടാകും.
കാനഡ തങ്ങളുടെ വ്യാപാര പാതകൾ കൂടുതൽ വൈവിധ്യവത്കരിക്കേണ്ടതുണ്ടെന്നും വിതരണ ശൃംഖലയുടെ സുരക്ഷിതത്വം വർദ്ധിപ്പിക്കുന്നതിൽ മുൻകൈയെടുക്കാൻ നോവസ്കോഷ സജ്ജമാണെന്നും പ്രീമിയർ ടിം ഹൂസ്റ്റൺ വ്യക്തമാക്കി. രാജ്യത്തിന്റെ സാമ്പത്തിക പരമാധികാരം സംരക്ഷിക്കാൻ ഈ നീക്കം അനിവാര്യമാണെന്നും അദ്ദേഹം കൂട്ടിച്ചേർത്തു. വ്യാപാര അടിസ്ഥാന സൗകര്യങ്ങൾ മെച്ചപ്പെടുത്തുന്നതിനായി ലക്ഷ്യമിട്ടുള്ള കാനഡ ട്രേഡ് ഡൈവേഴ്സിഫിക്കേഷൻ കോറിഡോർസ് ഫണ്ടിന് (Canada Trade Diversification Corridors Fund) കീഴിൽ പോർട്ട് അതോറിറ്റി സമർപ്പിച്ച അപേക്ഷയ്ക്ക് ശക്തമായ പിന്തുണ നൽകുന്നതാണ് ഈ ഔദ്യോഗിക സന്ദർശനമെന്ന് പ്രവിശ്യാ ഭരണകൂടം അറിയിച്ചു.
