ഫുട്ബോൾ ലോകത്തെ ഞെട്ടിച്ചുകൊണ്ട് ലോകകപ്പ് വേദിയിൽ കരുത്തരായ സ്പെയിനിനെ ഗോൾരഹിത സമനിലയിൽ തളച്ച് കേപ് വെർദെ. ഈ ചരിത്രസമനിലയുടെ മുഴുവൻ ക്രെഡിറ്റും അവരുടെ ഗോൾവല കാത്ത വോസിഞ്ഞ എന്ന പോരാളിക്കാണ്. തന്റെ നാല്പതാം വയസ്സിൽ ലോകകപ്പിൽ അരങ്ങേറ്റം കുറിച്ച താരം, ഏഴ് അസാധ്യ സേവുകളുമായാണ് സ്പെയിനിന്റെ സൂപ്പർ താരങ്ങളെ നിഷ്പ്രഭരാക്കിയത്. ലോകകപ്പിൽ അരങ്ങേറുന്ന പ്രായം കൂടിയ രണ്ടാമത്തെ താരമെന്ന റെക്കോർഡും ഈ ഒറ്റ മത്സരത്തിലൂടെ വോസിഞ്ഞ സ്വന്തമാക്കി.
മത്സരശേഷം ഗ്രൗണ്ടിൽ വെച്ച് താരം വികാരാധീനനായി പൊട്ടിക്കരഞ്ഞത് ഫുട്ബോൾ ആരാധകരുടെ മനസ്സിൽ വലിയൊരു നൊമ്പരമായി മാറി. തന്നെ സ്നേഹിച്ചു വളർത്തിയ മുത്തശ്ശീമുത്തശ്ശന്മാർക്ക് ഈ ചരിത്രനിമിഷം കാണാൻ ഭാഗ്യമില്ലാതായതിന്റെ വേദനയും, സാമ്പത്തിക പരാധീനതകൾ കാരണം അമ്മയ്ക്ക് കളി കാണാൻ എത്തിച്ചേരാൻ കഴിഞ്ഞില്ലെന്ന സങ്കടവുമാണ് ആ കണ്ണീരിലൂടെ പുറത്തുവന്നത്.
25-ാം വയസ്സിൽ മാത്രം പ്രൊഫഷണൽ ഫുട്ബോളിലേക്ക് കടന്നുവന്ന വോസിഞ്ഞ, കഠിനാധ്വാനം കൊണ്ട് തന്റെ സ്വപ്നങ്ങളെ സാക്ഷാത്കരിച്ച കഥയാണ് ലോകത്തോട് പറയുന്നത്. മത്സരത്തിന് ശേഷം സഹതാരങ്ങൾ ‘ബിഗ് ലെജൻഡ്’ എന്ന് വിളിച്ചാദരിച്ച ഈ താരത്തിന്റെ ഇൻസ്റ്റഗ്രാം ഫോളോവേഴ്സ് 50,000-ൽ നിന്ന് 2.4 ദശലക്ഷമായി കുതിച്ചുയർന്നു.
