ടൊറന്റോ: കാനഡയിലെ മിസ്സിസാഗയിൽ വയോധികരായ ദമ്പതികൾ കൊല്ലപ്പെട്ട സംഭവത്തിൽ അവരുടെ മകനെ തേടി പൊലീസ് വ്യാപക തിരച്ചിൽ ആരംഭിച്ചു. സംഭവവുമായി ബന്ധപ്പെട്ട് 46-കാരനായ ജോർദാൻ സാങ്വിനെയാണ് പൊലീസ് തിരയുന്നത്. ഇയാൾ ‘ആയുധധാരിയും അപകടകാരിയും’ ആണെന്ന് പൊലീസ് പൊതുജനങ്ങൾക്ക് മുന്നറിയിപ്പ് നൽകി.
വ്യാഴാഴ്ച വൈകിട്ട് 7 മണിയോടെയാണ് ഹ്യൂറോണ്ടാരിയോ സ്ട്രീറ്റും ലേക്ക്ഷോർ റോഡ് ഈസ്റ്റും ഉൾപ്പെടുന്ന പ്രദേശത്തെ ഒരു വീട്ടിൽ ആക്രമണം നടന്നതായി പൊലീസിന് വിവരം ലഭിച്ചത്. സ്ഥലത്തെത്തിയ പാരാമെഡിക്കൽ സംഘം ഇരുവർക്കും പ്രാഥമിക ശുശ്രൂഷകൾ നൽകി ആശുപത്രിയിലേക്ക് മാറ്റിയെങ്കിലും ഇരുവരും പിന്നീട് മരണത്തിന് കീഴടങ്ങി.
ജോർദാൻ സാങ്വിനെക്കുറിച്ച് എന്തെങ്കിലും വിവരം ലഭിച്ചാൽ ഉടൻ എമർജൻസി സർവീസുമായി (Emergency Services) ബന്ധപ്പെടാൻ അധികൃതർ നിർദ്ദേശം നൽകി. ദമ്പതികൾ എങ്ങനെ കൊല്ലപ്പെട്ടുവെന്ന കാര്യത്തിൽ പൊലീസ് കൂടുതൽ വിവരങ്ങൾ പുറത്തുവിട്ടിട്ടില്ല. പൊലീസ് അന്വേഷണം തുടരുകയാണ്.
