ബ്രിട്ടിഷ് കൊളംബിയ: കാനഡ ഡേ ആഘോഷങ്ങള് മുന്നോടിയായി ബ്രിട്ടിഷ് കൊളംബിയയിലെ കാംലൂപ്സ് നഗരത്തില് പടക്കങ്ങള് കൈവശം വെക്കുന്നതിനും പൊട്ടിക്കുന്നതിനും പൂര്ണ്ണ നിരോധനം ഏര്പ്പെടുത്തിയതായി ഫയര് ചീഫ് കെന് ഉസെലോക്. കടുത്ത വേനലും വരണ്ട കാലാവസ്ഥയും കാരണം കാട്ടുതീ പടരാനുള്ള സാധ്യത കണക്കിലെടുത്താണ് ബി.സി. വൈല്ഡ്ഫയര് സര്വീസ് പ്രവിശ്യയിലെ ഭൂരിഭാഗം ഗ്രാമീണ മേഖലകളിലും കരിമരുന്ന് പ്രയോഗത്തിന് കര്ശന നിയന്ത്രണം ഏര്പ്പെടുത്തിയിരിക്കുന്നത്.
ഇതിന്റെ ഭാഗമായി കാംലൂപ്സ് സിറ്റി കൗണ്സില് തങ്ങളുടെ ബൈലോ (Bylaw) പുതുക്കുകയും നിയമലംഘനം നടത്തുന്നവര്ക്ക് 1,000 കനേഡിയന് ഡോളര് പിഴ ചുമത്താന് തീരുമാനിക്കുകയും ചെയ്തിട്ടുണ്ട്. പടക്കങ്ങള് പൊട്ടിക്കുന്നത് മാത്രമല്ല, അവ കൈവശം വെക്കുന്നതും സൂക്ഷിക്കുന്നതും ഈ പിഴയുടെ പരിധിയില് വരും. എന്നാല് ജൂലൈ 1ന് നഗരത്തില് ഔദ്യോഗികമായി കാനഡ ഡേ ഫയര്വര്ക്സ് ഡിസ്പ്ലേ ഉണ്ടായിരിക്കുമെന്നും അത് കൃത്യമായ പെര്മിറ്റുള്ള വിദഗ്ദ്ധരായ പ്രൊഫഷണലുകള് മാത്രമായിരിക്കും കൈകാര്യം ചെയ്യുകയെന്നും ഫയര് ചീഫ് വ്യക്തമാക്കി. സുരക്ഷിതമായ അന്തരീക്ഷവും ആവശ്യമായ സുരക്ഷാ മുന്കരുതലുകളും ഉറപ്പാക്കിയായിരിക്കും ഇതെന്നും അദ്ദേഹം കൂട്ടിച്ചേര്ത്തു.
പരിശീലനം സിദ്ധിക്കാത്ത ആളുകള് അശ്രദ്ധമായി പടക്കങ്ങള് പൊട്ടിച്ച് കാട്ടുതീ ഉണ്ടാകുന്നത് തടയുകയാണ് ഈ പുതിയ നിയമത്തിന്റെ ലക്ഷ്യം. നിയമം ലംഘിച്ച് ആരെങ്കിലും പടക്കം പൊട്ടിക്കുകയും അത് വഴി തീപിടുത്തമുണ്ടാകുകയും ചെയ്താല്, രക്ഷാപ്രവര്ത്തനത്തിന് വരുന്ന ഫയര്ഫോഴ്സിന്റെ മുഴുവന് ചെലവും ആ വ്യക്തിയില് നിന്ന് ഈടാക്കുമെന്നും ഫയര് ചീഫ് മുന്നറിയിപ്പ് നല്കി. വരും ദിവസങ്ങളില് ശക്തമായ കാറ്റും ഉയര്ന്ന താപനിലയും പ്രവിശ്യയിലുടനീളം പ്രവചിക്കപ്പെട്ടിട്ടുള്ളതിനാല്, കാട്ടുതീക്ക് കാരണമായേക്കാവുന്ന യാതൊരുവിധ പ്രവര്ത്തനങ്ങളിലും ഏര്പ്പെടരുതെന്ന് ബി.സി. വൈല്ഡ്ഫയര് സര്വീസും ജനങ്ങളോട് അഭ്യര്ത്ഥിച്ചു.
