വിനിപെഗ്: കാനഡയിലെ മാനിറ്റോബയില് ഹൈവേയില് ചെറുവിമാനം അടിയന്തരമായി ഇറക്കി. വ്യാഴാഴ്ച വൈകുന്നേരമുണ്ടായ അപകടത്തില് വിമാനത്തിലുണ്ടായിരുന്ന ഒരാളെ നിസ്സാര പരുക്കുകളോടെ ആശുപത്രിയില് പ്രവേശിപ്പിച്ചു.
ദി പാസില് (The Pas) നിന്നും ബ്രാന്ഡനിലേക്ക് (Brandon) പറക്കുകയായിരുന്ന ടി.ബി.എം 8 (TBM 8) വിഭാഗത്തില്പ്പെട്ട സിങിള് എഞ്ചിന് ചെറുവിമാനമാണ് അപകടത്തില്പ്പെട്ടതെന്ന് റോയല് കനേഡിയന് മൗണ്ടഡ് പോലീസ് വ്യക്തമാക്കി. യാത്രയ്ക്കിടയില് പെട്ടെന്നുണ്ടായ സാങ്കേതിക തകരാറിനെ തുടര്ന്ന് പൈലറ്റ് വിമാനം ഹൈവേ 45-ല് ഇറക്കാന് നിര്ബന്ധിതനാവുകയായിരുന്നു. നിയന്ത്രണംവിട്ട വിമാനം റോഡിന്റെ വടക്കുവശത്തുള്ള അഴുക്കുചാലിലേക്ക് ചരിഞ്ഞാണ് നിന്നത്.
അപകടസമയത്ത് പൈലറ്റ് ഉള്പ്പെടെ നാല് പേരാണ് വിമാനത്തില് ഉണ്ടായിരുന്നത്. ഇതില് ഒരാള്ക്കാണ് പരുക്കേറ്റത്. സംഭവത്തെക്കുറിച്ച് കാനഡ ട്രാന്സ്പോര്ട്ടേഷന് സേഫ്റ്റി ബോര്ഡിനെ അറിയിച്ചിട്ടുണ്ടെന്നും അപകടകാരണത്തെക്കുറിച്ച് അന്വേഷണം ആരംഭിച്ചതായും പോലീസ് കൂട്ടിച്ചേര്ത്തു.
