വാഷിങ്ടന് – അമേരിക്കയിലെ കാന്സസ് പ്രവിശ്യയിലുണ്ടായ ശക്തമായ വെള്ളപ്പൊക്കത്തില് കാര് ഒഴുക്കില്പ്പെട്ട് ഇന്ത്യന് സ്വദേശിയായ ഐടി പ്രഫഷനല് മരിച്ചു. ആന്ധ്രപ്രദേശ് സ്വദേശിയായ വെങ്കിടേഷ് ദൊപ്പലപ്പുടി (33) ആണ് അന്തരിച്ചത്. നെബ്രാസ്കയിലെ ഒമാഹയില് താമസിച്ചിരുന്ന ഇദ്ദേഹം ശനിയാഴ്ച ഉച്ചതിരിഞ്ഞ് ഹൂസ്റ്റണില് നിന്നും സ്വന്തം കാറോടിച്ച് മടങ്ങുന്നതിനിടെയാണ് കാന്സസിലെ കനത്ത വെള്ളപ്പൊക്കത്തില്പ്പെട്ട് അപകടത്തില് മരിച്ചത്.
വെങ്കിടേഷ് ദൊപ്പലപ്പുടി ആന്ധ്രപ്രദേശില് നിന്നുള്ള ഇന്ത്യന് വിദ്യാര്ഥിയും ഐടി രംഗത്ത് പ്രവര്ത്തിച്ചിരുന്ന പ്രഫഷനലുമാണെന്ന് വാര്ത്താ ഏജന്സിയായ പിടിഐ (PTI) റിപ്പോര്ട്ട് ചെയ്തു. കനത്ത മഴയെത്തുടര്ന്ന് റോഡില് അപ്രതീക്ഷിതമായി രൂപപ്പെട്ട ശക്തമായ വെള്ളപ്പാച്ചിലില് കാര് ഒഴുക്കില്പ്പെടുകയായിരുന്നു എന്നാണ് ലഭിക്കുന്ന വിവരം.
അമേരിക്കയിലെ ഇന്ത്യന് സമൂഹത്തെ ആകെ സങ്കടത്തിലാഴ്ത്തിയ ഈ ദാരുണ സംഭവത്തില് ഹൂസ്റ്റണിലെ ഇന്ത്യന് കോണ്സുലേറ്റ് ജനറല് അനുശോചനം രേഖപ്പെടുത്തി. മൃതദേഹം നാട്ടിലെത്തിക്കാനും തുടര്നടപടികള്ക്കുമായി കുടുംബാംഗങ്ങളുമായും പ്രാദേശിക അധികാരികളുമായും ബന്ധപ്പെട്ട് വരികയാണെന്നും ആവശ്യമായ എല്ലാ സഹായങ്ങളും നല്കുമെന്നും കോണ്സുലേറ്റ് വൃത്തങ്ങള് അറിയിച്ചു.
